നെല്ലിക്കുന്ന് റോഡ് നരകയാത്ര; മഴ കഴിഞ്ഞാൽ ടാറിങ് തുടങ്ങുമെന്ന് നഗരസഭാ ചെയർമാൻ

കാസർകോട്: (KasargodVartha) നെല്ലിക്കുന്ന് കടപ്പുറം ഫിർദൗസ് നഗർ ജങ്ഷൻ മുതൽ ചീരുംബാ റോഡ് ചേരങ്കൈ വരെ പൊട്ടിപ്പൊളിഞ്ഞ് കുണ്ടും കുഴിയുമായി യാത്രക്കാർ ദുരിതത്തിലായി. മഴക്കാലമായതോടെ ഈ കുഴികളിൽ വെള്ളം നിറഞ്ഞ് ചെളിക്കുളമായി മാറിയിരിക്കുകയാണ്. ഇതുവഴിയുള്ള യാത്ര ഇരുചക്ര വാഹനക്കാർക്കും ഓട്ടോറിക്ഷക്കാർക്കും വലിയ ബുദ്ധിമുട്ടുകൾ സൃഷ്ടിക്കുന്നു. അപകടങ്ങളിൽപ്പെട്ട് പല യാത്രക്കാർക്കും പരിക്കേൽക്കുകയും ചെയ്തിട്ടുണ്ട്. രാത്രിയാത്രക്കാർക്കാണ് ദുരിതം കൂടുതൽ. കാൽനടയാത്രക്കാരും ചെളിവെള്ളം തെറിച്ചും മറ്റും ബുദ്ധിമുട്ടുന്നു.

മുനിസിപ്പൽ ചെയർമാന്റെ വാർഡിലെ റോഡിന്റെ ഈ ശോചനീയവസ്ഥ പരിഹരിക്കുന്നതിൽ എന്തുകൊണ്ടാണ് കാലതാമസം നേരിടുന്നതെന്നാണ് നാട്ടുകാരുടെ ചോദ്യം. ഗ്രാമീണ മിഷൻ പദ്ധതിയിൽ ഉൾപ്പെടുത്തി എം.എൽ.എ. ഫണ്ടിൽനിന്ന് 45 ലക്ഷം രൂപ അനുവദിച്ചിട്ടും റോഡിന്റെ പണി ഇതുവരെ തുടങ്ങിയിട്ടില്ല. 

ഈ പൊട്ടിപ്പൊളിഞ്ഞ റോഡിലൂടെയുള്ള യാത്ര ജനങ്ങളുടെ നടുവൊടിക്കുകയാണെന്ന് അവർ പറയുന്നു. സ്കൂൾ കുട്ടികൾക്കും പൊതുജനങ്ങൾക്കും ഇത് വലിയ യാത്രാദുരിതമുണ്ടാക്കുന്നു. ഇതുവഴി കടന്നുപോകുന്ന വാഹനങ്ങൾ കാൽനടയാത്രക്കാരുടെ മേലേക്ക് ചെളി തെറിപ്പിക്കുന്നതിനാൽ പല വീടുകളുടെയും മതിലുകൾ ചെളിക്കറ പിടിച്ച നിലയിലാണ്.

റോഡ് നവീകരണത്തിനായി നാട്ടുകാർ പ്രതികരിക്കാൻ തുടങ്ങിയിട്ട് കാലങ്ങളായി. ശ്രീ ചീരുംബാ ഭഗവതി ക്ഷേത്രത്തിന് സമീപം റോഡ് വലിയൊരു കുളമായി മാറിയിരിക്കുന്നു. റോഡിന്റെ അറ്റകുറ്റപ്പണിക്കുള്ള യാതൊരു മുന്നൊരുക്കങ്ങളും കാണാത്തതിൽ നാട്ടുകാർക്ക് പ്രതിഷേധമുണ്ട്. 

നഗരസഭയുടെ കുടിവെള്ള പൈപ്പുകൾ സ്ഥാപിക്കാൻ റോഡിന്റെ വശങ്ങൾ കുഴിച്ചതിന് ശേഷം പകുതി ഭാഗം മാത്രം കോൺക്രീറ്റ് ചെയ്തതും ബാക്കി ഭാഗം പൂർത്തിയാക്കാത്തതും യാത്രാക്ലേശം വർദ്ധിപ്പിക്കുന്നു. മറ്റ് വാഹനങ്ങൾക്ക് സൈഡ് കൊടുക്കുമ്പോൾ ടയർ കുഴിയിൽ കുടുങ്ങിപ്പോകുന്നത് പതിവാണ്.

നഗരസഭയുടെ അനാസ്ഥയാണ് റോഡ് പണി വൈകാൻ കാരണമെന്നാണ് പൊതുവായ ആക്ഷേപം. തിരഞ്ഞെടുപ്പ് അടുക്കുമ്പോൾ മാത്രമാണ് ജനപ്രതിനിധികൾ രംഗത്തെത്തുന്നതെന്നും, വികസന മുരടിപ്പിന് ഇത് കാരണമാകുന്നുവെന്നും നാട്ടുകാർ ആരോപിക്കുന്നു.

അതേസമയം, മഴ കഴിഞ്ഞാലുടൻ റോഡിന്റെ ടാറിങ് തുടങ്ങുമെന്ന് നഗരസഭാ ചെയർമാൻ അബ്ബാസ് ബീഗം കാസർകോട് വാർത്തയോട് പറഞ്ഞു. 45 ലക്ഷം രൂപയുടെ ടെൻഡർ നടപടികൾ പൂർത്തിയായെന്നും ചെർക്കള സ്വദേശിയായ വി. എം. അബ്ദുല്ലയാണ് കരാർ ഏറ്റെടുത്തതെന്നും അദ്ദേഹം അറിയിച്ചു. ടാറിങ് പൂർത്തിയാകുന്നതോടെ ഏകദേശം രണ്ട് കിലോമീറ്ററോളം വരുന്ന ഈ റോഡ് തിളക്കമുള്ളതാകുമെന്നും ചെയർമാൻ കൂട്ടിച്ചേർത്തു.

നെല്ലിക്കുന്ന് റോഡിന്റെ ഇപ്പോഴത്തെ അവസ്ഥയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Nellikkunnu road in Kasaragod is in bad condition due to rain.

#Kasaragod #Nellikkunnu #Roads #Infrastructure #Kerala #LocalNews