Recognition | രോഗി പരിചരണ അവതരണത്തിൽ മികവ് തെളിയിച്ച് കാസർകോട് സ്വദേശിയായ ഡോ. മുഹമ്മദ് അഫ്സലിന് ദേശീയ അംഗീകാരം

കാസർകോട്: (KasargodVartha) ദേശീയ തലത്തിൽ ശ്രദ്ധേയമായ നേട്ടം കൈവരിച്ച് ചെമ്മനാട് സ്വദേശി ഡോ. സി എം മുഹമ്മദ് അഫ്സൽ നാടിന് അഭിമാനമായി. വാരാണസിയിൽ നടന്ന ഗാസ്‌ട്രോ എൻ്ററോളജി ദേശീയ കോൺഫറൻസിലാണ് ഡോ. അഫ്സൽ തന്റെ വൈദഗ്ധ്യവും മികവും തെളിയിച്ചത്. രാജ്യത്തിന്റെ വിവിധ ഭാഗങ്ങളിൽ നിന്നുള്ള വിദഗ്ധർ പങ്കെടുത്ത സമ്മേളനത്തിൽ, രോഗി പരിചരണത്തിലുള്ള കഴിവ് പ്രശംസിക്കപ്പെട്ടു.

ഡിസംബർ ഏഴിന് നടന്ന കോൺഫറൻസിന്റെ ഭാഗമായി സംഘടിപ്പിക്കപ്പെട്ട എൻഡോസ്‌കോപി  ക്ലിനികിലാണ് ഡോ. അഫ്സലിന്റെ അവതരണം ശ്രദ്ധേയമായത്. ദേശീയ തലത്തിൽ നിന്ന് തിരഞ്ഞെടുക്കപ്പെട്ട ആറ് പേർക്കായിരുന്നു ഈ പ്രത്യേക അവസരം ലഭിച്ചത് എന്നത് നേട്ടത്തിന്റെ മാറ്റ് കൂട്ടുന്നു. നൂതന സാങ്കേതിക വിദ്യകൾ ഉപയോഗിച്ച് രോഗികളെ എങ്ങനെ ഫലപ്രദമായി പരിചരിക്കാം എന്നതിനെക്കുറിച്ചുള്ള അദ്ദേഹത്തിന്റെ അവതരണം വിദഗ്ധരുടെ പ്രത്യേക പ്രശംസ നേടി. 

ഈ അംഗീകാരത്തിൽ ഏറെ സന്തോഷമുണ്ടെന്നും കൂടുതൽ മികച്ച സേവനം നൽകാൻ ഇത് പ്രചോദനമാകുമെന്നും ഡോ. അഫ്സൽ കാസർകോട് വാർത്തയോട് പ്രതികരിച്ചു. ചെമ്മനാട് വെസ്റ്റ് ഗവ. യു പി സ്കൂളിലാണ് പ്രാഥമിക വിദ്യാഭ്യാസം നേടിയത്. തുടർന്ന് എട്ടാം ക്ലാസ് മുതൽ പ്ലസ് ടു വരെ ചെമ്മനാട് ജമാഅത്ത് ഹയർ സെകൻഡറി സ്കൂളിലായിരുന്നു പഠനം. 

തൃശൂർ ഗവൺമെൻ്റ് മെഡിക്കൽ കോളജിൽ നിന്ന് എംബിബിഎസും എംഡിയും പൂർത്തിയാക്കിയ ശേഷം നിലവിൽ കോഴിക്കോട് ആസ്റ്റർ മിംസിൽ ഗ്യാസ്ട്രോ എൻ്ററോളജി വിഭാഗത്തിൽ തുടർപഠനം നടത്തുകയാണ് അദ്ദേഹം. ഹാജി സി എം ഇബ്രാഹിം - ഉമ്മാലിമ്മ ദമ്പതികളുടെ മകനാണ് ഡോ. അഫ്സൽ. ഡോ. ഹിബ തളങ്കരയാണ് ഭാര്യ. ചെമ്മനാട്ടെ പൊതുവിദ്യാലയങ്ങളിൽ നിന്നും വളർന്ന് ദേശീയ അംഗീകാരം നേടിയ ഡോ. അഫ്സൽ, നാടിനും പുതിയ തലമുറയിലെ വിദ്യാർഥികൾക്കും ഒരു പ്രചോദനമാണ്.

#NationalAward #MedicalExcellence #PatientCare #Gastroenterology #KeralaDoctor #DrAfsal