ബസ് കാത്തിരിപ്പ് കേന്ദ്രങ്ങളില്ല; ദേശീയപാത തുറക്കരുതെന്ന് ആവശ്യം

കാസർകോട്: (KasargodVartha) ദേശീയപാത നിർമ്മാണവുമായി ബന്ധപ്പെട്ട്, നിർമ്മാണക്കമ്പനി അധികൃതർക്ക് ഏറ്റവും കൂടുതൽ വിമർശനം നേരിടേണ്ടി വന്ന സർവീസ് റോഡുകളുടെയും അനുബന്ധ നിർമ്മാണ പ്രവർത്തനങ്ങളുടെയും 25 ശതമാനത്തോളം ജോലികൾ ബാക്കിനിൽക്കെ, ദേശീയപാതയിലെ 3 റീച്ചുകൾ തുറന്നു കൊടുക്കാൻ നീക്കം തുടങ്ങി. ഇത് നാട്ടുകാരിൽ പ്രതിഷേധത്തിന് ഇടയാക്കിയിട്ടുണ്ട്.

39 കിലോമീറ്റർ ദൂരമുള്ള തലപ്പാടി-ചെങ്കള റീച്ചിൽ ഈ മാസം 15-ഓടെ പ്രവൃത്തികൾ പൂർത്തിയാക്കുമെന്നാണ് ഊരാളുങ്കൽ നിർമ്മാണക്കമ്പനി അധികൃതർ പറയുന്നത്. അതിനായുള്ള അവസാനഘട്ട പ്രവൃത്തികളിലാണ് അവർ. സുരക്ഷാ സ്ഥിതിഗതി പരിശോധിക്കാൻ രൂപവത്കരിച്ച വിദഗ്ധസമിതി ഇതിനകം റീച്ചുകൾ സന്ദർശിച്ച് സുരക്ഷ ഉറപ്പു വരുത്തിയിട്ടുണ്ട്. പൂർത്തിയായ മറ്റ് രണ്ട് റീച്ചുകൾ കോഴിക്കോട് ജില്ലയിലാണ്.

തലപ്പാടി-ചെങ്കള റീച്ചിന്റെ പ്രവൃത്തി 2021 നവംബർ മാസത്തിലാണ് ആരംഭിച്ചത്. 2024-ൽ തുറന്നു കൊടുക്കേണ്ടിയിരുന്ന ദേശീയപാതയുടെ പണി പൂർത്തിയാക്കാൻ സാധിക്കാത്തതിനാൽ സർക്കാർ ഊരാളുങ്കലിന് ഒരു വർഷം കൂടി സമയം അനുവദിച്ചു നൽകുകയായിരുന്നു. ഇപ്പോൾ 95 ശതമാനം ജോലികളും പൂർത്തിയായിട്ടുണ്ട്. പെയിന്റിങ് ജോലികളാണ് ബാക്കിയുള്ളത്.

27 മീറ്റർ വീതിയിൽ ദക്ഷിണേന്ത്യയിലെ ‘ബോക്സ് ഗർഡർ’ മാതൃകയിൽ നിർമ്മിച്ച ആദ്യത്തെ ഒറ്റത്തൂൺ മേൽപ്പാലം തലപ്പാടി-ചെങ്കള റീച്ചിലാണെന്ന പ്രത്യേകതയുമുണ്ട്. ഒന്നേകാൽ കിലോമീറ്റർ ദൈർഘ്യമുള്ള ഈ ഒറ്റത്തൂൺ മേൽപ്പാലം കാസർഗോഡ് നഗരത്തിലൂടെയാണ് കടന്നുപോകുന്നത്.

അതേസമയം, സർവീസ് റോഡുകളിലെ പ്രവൃത്തി പകുതി വഴിയിലാക്കി ദേശീയപാത തുറന്നു കൊടുക്കുന്നതിൽ നാട്ടുകാർക്കിടയിൽ വലിയ പ്രതിഷേധം ഉയർന്നു വരുന്നുണ്ട്. സർവീസ് റോഡുകളിൽ അവസാനഘട്ട അറ്റകുറ്റപ്പണികൾ നടന്നു വരുന്നുണ്ടെങ്കിലും പലയിടത്തും നടപ്പാത ഇല്ലാത്തത് വിദ്യാർത്ഥികൾ അടക്കമുള്ള കാൽനടയാത്രക്കാർക്ക് ഏറെ പ്രയാസമുണ്ടാക്കുന്നുണ്ട്. 

ബസ് കാത്തിരിപ്പ് കേന്ദ്രങ്ങളും ഇതുവരെ സ്ഥാപിക്കാത്ത സ്ഥലങ്ങൾ ഏറെയുണ്ട്. ചിലയിടങ്ങളിൽ ഓവുചാലുകളുടെ പ്രവൃത്തിയിലും അനിശ്ചിതത്വമുണ്ട്. ബസ് യാത്രക്കായും മറ്റും ജനങ്ങൾ ഏറെ ആശ്രയിക്കുന്ന സർവീസ് റോഡിന്റെ ജോലികളാണ് ആദ്യം പൂർത്തീകരിക്കേണ്ടിയിരുന്നതെന്നാണ് നാട്ടുകാരുടെ അഭിപ്രായം.

ദേശീയപാതയുടെ നിർമ്മാണത്തിലെ അപാകതകളെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Public protests as NH set to open in Kasaragod without complete service roads and bus stops.

#NationalHighway #Kasaragod #ServiceRoad #BusStop #Infrastructure #Kerala