ദേശീയപാതയിലെ ബസ് ഷെൽട്ടറുകൾ: നിർമ്മാണം ഇഴയുന്നു, വിദ്യാർത്ഥികളും പുസ്തകങ്ങളും മഴ നനയുന്നു

കുമ്പള: (KasargodVartha) ദേശീയപാതയിലെ തലപ്പാടി-ചെങ്കള റീച്ച് ഈ മാസം പകുതിയോടെ പൂർണ്ണമായും തുറന്നു കൊടുക്കാൻ സർക്കാർ ആലോചിക്കുന്നതിനിടെ, സർവീസ് റോഡിന് സമീപം ബസ് കാത്തിരിപ്പ് കേന്ദ്രങ്ങൾ സ്ഥാപിക്കുന്നതിലെ മെല്ലെപ്പോക്ക് യാത്രക്കാർക്കും വിദ്യാർത്ഥികൾക്കും ദുരിതമാവുകയാണ്.

ഇടതടവില്ലാതെ പെയ്യുന്ന മഴയിൽ ബസ് ഷെൽട്ടറുകളില്ലാത്തതിനാൽ വിദ്യാർത്ഥികൾ മഴ നനഞ്ഞ് ബസിനായി കാത്തുനിൽക്കേണ്ടി വരുന്നു. ഇത് വിദ്യാർത്ഥികളെ മാത്രമല്ല, അവരുടെ പുസ്തകങ്ങളെയും പഠനോപകരണങ്ങളെയും നനച്ച് പഠനത്തെയും ബാധിക്കുന്നതായി പറയുന്നു. 

പല കുട്ടികളും നനഞ്ഞത് കാരണം സ്കൂളിൽ പോകാതെ തിരിച്ചു വീട്ടിലേക്ക് പോകുന്നതായും റിപ്പോർട്ടുകളുണ്ട്. നനഞ്ഞ വസ്ത്രത്തോടെയാണ് പല വിദ്യാർത്ഥികളും ക്ലാസ്സിൽ വരുന്നതെന്ന് അധ്യാപകരും പറയുന്നു. ഇത് പനിയടക്കമുള്ള രോഗങ്ങൾ പിടിപെടാൻ കാരണമാകുമെന്ന് അധ്യാപകരും രക്ഷിതാക്കളും ഭയപ്പെടുന്നുണ്ട്.

അധ്യയന വർഷം ആരംഭിക്കുന്നതിന് മുമ്പ് തന്നെ ബസ് ഷെൽട്ടറുകളുടെ നിർമ്മാണം വേഗത്തിലാക്കണമെന്ന് സന്നദ്ധ സംഘടനകളും നാട്ടുകാരും സ്കൂൾ പിടിഎകളും അധികൃതരോട് ആവശ്യപ്പെട്ടതാണ്. 

ദേശീയപാത വികസനത്തിന്റെ ഭാഗമായി സമീപത്തുണ്ടായിരുന്ന കടകളും കെട്ടിടങ്ങളും പൊളിച്ചുമാറ്റിയതോടെ മഴ വന്നാൽ കയറി നിൽക്കാൻ ഇടമില്ലാത്തതാണ് വിദ്യാർത്ഥികൾ അടക്കമുള്ള യാത്രക്കാർക്ക് ദുരിതമാവുന്നത്. അതുകൊണ്ടുതന്നെ ബസ് കാത്തിരിപ്പ് കേന്ദ്രങ്ങൾ സ്ഥാപിക്കുന്ന നടപടി വേഗത്തിലാക്കണമെന്നാണ് പ്രധാനമായും ഉയരുന്ന ആവശ്യം.

അതിനിടെ, ജില്ലയിലെ വിവിധ ഭാഗങ്ങളിൽ നാമമാത്രമായി സ്ഥാപിച്ചിട്ടുള്ള ബസ് ഷെൽട്ടറുകളിൽ പത്തുപേർക്കുപോലും നിൽക്കാൻ പറ്റാത്ത അവസ്ഥയാണെന്ന് ആക്ഷേപമുണ്ട്. നീളവും വീതിയും കുറഞ്ഞ ഷെൽട്ടറുകളിൽ മേൽക്കൂര മാത്രമാണുള്ളതെന്നും, ഇത് മഴയെ പ്രതിരോധിക്കാൻ പര്യാപ്തമല്ലെന്നും യാത്രക്കാർ പറയുന്നു. 

സ്ത്രീകൾക്കും പുരുഷന്മാർക്കും ഇരിപ്പിടമുള്ള വിശാലമായ ബസ് കാത്തിരിപ്പ് കേന്ദ്രങ്ങളാണ് നിർമ്മിക്കേണ്ടിയിരുന്നതെന്നും യാത്രക്കാർ ചൂണ്ടിക്കാട്ടുന്നു.

ഈ വാർത്ത സുഹൃത്തുക്കളുമായി പങ്കുവെച്ച് വിഷയത്തിൽ നിങ്ങളുടെ അഭിപ്രായം രേഖപ്പെടുത്തുക.

Article Summary: Bus shelter construction delays affect students and commuters in Kerala.

#BusShelter #NationalHighway #Kerala #Students #Monsoon #Infrastructure