തലപ്പാടി മുതൽ ചെങ്കള വരെ പത്തോളം അപകടങ്ങൾ; ദേശീയപാതയിൽ ജീവൻ നഷ്ടപ്പെടുന്നവരുടെ എണ്ണം കൂടുന്നു

കാസർകോട്: (KasargodVartha) ജില്ലയിൽ ദേശീയപാതയിൽ വാഹനാപകടങ്ങൾ തുടർക്കഥയാവുകയാണ്. ഏറ്റവും ഒടുവിൽ പെർവാട് വെച്ചും മൊഗ്രാൽ മേൽപ്പാലത്തിലും ലോറികൾ കൂട്ടിയിടിച്ച് അപകടങ്ങൾ സംഭവിച്ചു. ഈ അപകടങ്ങളിൽ ആളപായം സംഭവിച്ചില്ലെങ്കിലും ഡ്രൈവർമാർക്ക് പരിക്കേറ്റിട്ടുണ്ട്.

പെർവാട് വെച്ച് നിർമ്മാണ സാമഗ്രികളുമായി പോവുകയായിരുന്ന ടിപ്പർ ലോറി, നിർത്തിയിട്ടിരുന്ന മറ്റൊരു ലോറിയിൽ ഇടിച്ചാണ് അപകടമുണ്ടായത്. ഈ അപകടത്തിൽ ടിപ്പർ ലോറിക്ക് കാര്യമായ കേടുപാടുകൾ സംഭവിച്ചു.

മറ്റൊരു സംഭവത്തിൽ, വ്യാഴാഴ്ച രാവിലെ ആറുമണിയോടെ മംഗളൂരിൽ നിന്ന് ജില്ലിയുമായി പയ്യന്നൂരിലേക്ക് പോവുകയായിരുന്ന ടോറസ് ലോറി മൊഗ്രാൽ മേൽപ്പാലത്തിന് മുകളിൽ വെച്ച് നിയന്ത്രണം തെറ്റി നിർത്തിയിട്ടിരുന്ന മറ്റൊരു ടോറസ് ലോറിയുടെ പിന്നിലിടിച്ചു.

ഇടിയുടെ ആഘാതത്തിൽ ലോറിയുടെ ക്യാബിൻ തകരുകയും ഡ്രൈവർ തൃശ്ശൂർ കൊടകര സ്വദേശി ജോബിബിജു (22) ഗുരുതരമായി പരിക്കുകളോടെ ക്യാബിനകത്ത് കുടുങ്ങുകയും ചെയ്തു. അഗ്നിരക്ഷാ സേനാംഗങ്ങളെത്തി ഹൈഡ്രോളിക് കട്ടർ ഉപയോഗിച്ച് ഏറെ പണിപ്പെട്ടാണ് യുവാവിനെ പുറത്തെടുത്തത്. ഗുരുതരമായി പരിക്കേറ്റ ഡ്രൈവറെ ഉടൻതന്നെ കാസർകോട്ടെ ആശുപത്രിയിൽ പ്രവേശിപ്പിച്ചു.

കഴിഞ്ഞ കുറച്ചു ദിവസങ്ങളായി കുമ്പള ഭാഗത്ത് മഴ ശക്തമായതോടെ ദേശീയപാതയിൽ അപകടങ്ങൾ വർധിച്ചു വരുന്നതായി നാട്ടുകാർ പറയുന്നു. പുതിയതായി നിർമ്മിച്ച റോഡുകളുടെ മിനുസവും അമിത വേഗതയുമൊക്കെയാണ് അപകടങ്ങൾക്ക് പ്രധാന കാരണം.

ദേശീയപാത തുറന്നുകൊടുത്തതിന് ശേഷം തലപ്പാടി മുതൽ ചെങ്കള വരെയുള്ള ഭാഗത്ത് ഏകദേശം പത്തോളം അപകടങ്ങൾ സംഭവിച്ചിട്ടുണ്ട്. ഇതിനോടകം മൂന്നു പേർക്ക് ജീവൻ നഷ്ടപ്പെടുകയും ചെയ്തു.

തുടർച്ചയായ അപകടങ്ങളുടെ പശ്ചാത്തലത്തിൽ ദേശീയപാതയിൽ അടിയന്തരമായി സിഗ്നൽ സംവിധാനങ്ങൾ സ്ഥാപിക്കണമെന്നും ട്രാഫിക് നിയമങ്ങൾ ബോർഡുകളിൽ പ്രദർശിപ്പിക്കണമെന്നും നാട്ടുകാർ ആവശ്യപ്പെടുന്നു. കൂടാതെ, വാഹനങ്ങളുടെ വേഗത നിയന്ത്രിക്കുന്നതിന് താൽക്കാലികമായി ട്രാഫിക് പോലീസിന്റെ സഹായം തേടണമെന്നും അവർ അഭ്യർത്ഥിക്കുന്നു.

ദേശീയപാതയിലെ അപകടങ്ങളെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: A series of accidents plagues the national highway in Kumbala, with a recent tipper-lorry collision in Peruvad. High speed on the newly built, smooth road is blamed for the increasing accidents, which have claimed three lives.

#NationalHighway #RoadSafety #KeralaAccidents #Peruvad #TrafficSafety #Kumbala