കുട്ടികളിലെ വിളർച്ച തടയാം; വിര നശീകരണ ഗുളിക വിതരണം ആരംഭിച്ചു

കാസർകോട്: (KasargodVartha) ദേശീയ വിരവിമുക്ത ദിനാചരണത്തിന്റെ 2026-ലെ ജില്ലാതല ഉദ്ഘാടനം വെള്ളച്ചാൽ മോഡൽ റസിഡൻഷ്യൽ സ്കൂളിൽ നടന്നു. നീലേശ്വരം ബ്ലോക്ക് പഞ്ചായത്ത് പ്രസിഡന്റ് സി.എം മീനാകുമാരി ടീച്ചർ ഉദ്ഘാടന കർമ്മം നിർവ്വഹിച്ചു. 

പിലിക്കോട് ഗ്രാമപഞ്ചായത്ത് പ്രസിഡന്റ് ഇ. കുഞ്ഞിരാമൻ അധ്യക്ഷത വഹിച്ച ചടങ്ങിൽ ജില്ലാ മെഡിക്കൽ ഓഫീസർ ഡോ: എ.വി. രാംദാസ് മുഖ്യപ്രഭാഷണം നടത്തി. കുട്ടികളുടെ വളർച്ചയെയും ആരോഗ്യത്തെയും പ്രതികൂലമായി ബാധിക്കുന്ന വിരബാധയ്ക്കെതിരെ ബോധവൽക്കരണം നൽകുന്നതായിരുന്നു ചടങ്ങ്.

ഒന്നു മുതൽ 19 വയസ്സുവരെയുള്ള എല്ലാ കുട്ടികൾക്കും വിര നശീകരണത്തിനുള്ള ആൽബൻഡസോൾ ഗുളിക നൽകുകയാണ് ഈ പരിപാടിയുടെ പ്രധാന ലക്ഷ്യം. ജില്ലയിൽ ഇതുവരെ 2,52,891 കുട്ടികൾക്ക് ഗുളിക വിതരണം ചെയ്തു കഴിഞ്ഞു. 

വിരബാധ കുട്ടികളിൽ വിളർച്ചയ്ക്കും പോഷകക്കുറവിനും കാരണമാകുന്നുണ്ടെന്നും ഇത് അവരുടെ പഠനശേഷിയെയും ശാരീരിക വളർച്ചയെയും ബാധിക്കുമെന്നും ചടങ്ങിൽ സംസാരിച്ചവർ ചൂണ്ടിക്കാട്ടി. ലോകാരോഗ്യ സംഘടനയുടെ കണക്കുകൾ പ്രകാരം ഇന്ത്യയിൽ ഒന്നു മുതൽ 14 വയസ്സുവരെയുള്ള 64 ശതമാനം കുട്ടികളിലും വിരബാധയുണ്ടാകാൻ സാധ്യതയുണ്ട്.

ഇതിന്റെ അടിസ്ഥാനത്തിൽ 2015 മുതലാണ് ദേശീയതലത്തിൽ വിരവിമുക്ത ദിനം ആചരിച്ചു തുടങ്ങിയത്. വർഷത്തിൽ ആറ് മാസത്തെ ഇടവേളകളിലായി രണ്ടു പ്രാവശ്യം സ്കൂളുകളും അങ്കണവാടികളും വഴി കുട്ടികൾക്ക് വിര നശീകരണ ഗുളിക നൽകിവരുന്നു. 

ഈ വർഷം ജനുവരി 06-നാണ് വിരവിമുക്ത ദിനമായി നിശ്ചയിച്ചിരിക്കുന്നത്. വിദ്യാലയങ്ങളിൽ എത്തുന്ന കുട്ടികൾക്ക് അവിടെനിന്നും സ്കൂളിൽ പോകാത്ത ഒന്നു മുതൽ 19 വയസ്സുവരെയുള്ളവർക്ക് അങ്കണവാടികൾ വഴിയും ഗുളിക നൽകുന്നുണ്ട്. ഏതെങ്കിലും കാരണത്താൽ നിശ്ചിത ദിവസം ഗുളിക കഴിക്കാൻ സാധിക്കാത്ത കുട്ടികൾക്കായി 2026 ജനുവരി 12 തിങ്കളാഴ്ച ഗുളിക വിതരണം ചെയ്യുമെന്നും അധികൃതർ അറിയിച്ചു.

മണ്ണിൽ കളിക്കുന്നതിലൂടെയും പാദരക്ഷകൾ ഉപയോഗിക്കാതിരിക്കുന്നതിലൂടെയുമാണ് സാധാരണയായി കുട്ടികളിൽ വിരബാധയുണ്ടാകുന്നത്. ശരീരത്തിന്റെ വികാസത്തിന് ആവശ്യമായ പോഷകഘടകങ്ങൾ വിരകൾ വലിച്ചെടുക്കുന്നതോടെ കുട്ടികൾക്ക് പോഷണക്കുറവ് അനുഭവപ്പെടും. 

സാധാരണ കുടലുകളിലാണ് ഉരുളൻ വിര, കൊക്കൊപ്പുഴു, കൃമി, നാടവിര, ചാട്ട വിര എന്നിവ കാണപ്പെടുന്നത്. ആറുമാസത്തിലൊരിക്കൽ വിരയിളക്കൽ നടത്തിയാൽ ഈ പ്രശ്നം പരിഹരിക്കാനും മറ്റുള്ളവരിലേക്ക് പകരുന്നത് തടയാനും സാധിക്കുമെന്ന് ആരോഗ്യവകുപ്പ് വ്യക്തമാക്കുന്നു.

കാസർകോട് ജില്ലയിൽ ആകെ 3,41,745 കുട്ടികൾക്കാണ് സ്കൂളുകൾ, അങ്കണവാടികൾ എന്നിവ കേന്ദ്രീകരിച്ച് വിര ഗുളിക വിതരണം നടത്താൻ ലക്ഷ്യമിടുന്നത്. ഈ പരിപാടിയോട് എല്ലാ രക്ഷിതാക്കളും അധ്യാപകരും സഹകരിക്കണമെന്ന് ജില്ലാ മെഡിക്കൽ ഓഫീസർ അഭ്യർത്ഥിച്ചു. ആരോഗ്യവും ബുദ്ധിശക്തിയുമുള്ള യുവതലമുറയെ വാർത്തെടുക്കാനുള്ള ഈ പ്രവർത്തനത്തിന്റെ തുടർച്ച ആരോഗ്യവകുപ്പ് ഏറ്റെടുക്കുമെന്നും അദ്ദേഹം പറഞ്ഞു.

ഗ്രാമപഞ്ചായത്തംഗം വി.കെ സരോജ, സ്കൂൾ സൂപ്രണ്ട് തിരുമലേശ.പി.കെ, ഹെഡ്മിസ്ട്രസ് ബിന്ദു പി, എം.സി.എച്ച് ഓഫീസർ പി. ഉഷ, ഡി.പി.എച്ച് എൻ. എം. ശാന്ത എന്നിവർ ചടങ്ങിൽ ആശംസകൾ നേർന്നു. 

ജില്ലാ എഡ്യുക്കേഷൻ ആൻഡ് മീഡിയ ഓഫീസർ അബ്ദുൾ ലത്തീഫ് മഠത്തിൽ സ്വാഗതവും ഓലാട്ട് കുടുംബാരോഗ്യ കേന്ദ്രം ഹെൽത്ത് ഇൻസ്പെക്ടർ പി.വി. മഹേഷ്‌കുമാർ നന്ദിയും പറഞ്ഞു. ഉദ്ഘാടനത്തിന് ശേഷം സ്കൂളിലെ കുട്ടികൾക്ക് വിര ഗുളിക നൽകുന്ന ചടങ്ങും നടന്നു.

കാസർകോട്ട് ആരോഗ്യ വകുപ്പിന്റെ ആഭിമുഖ്യത്തിൽ മാധ്യമ ശില്പശാല സംഘടിപ്പിച്ചു

കാസർകോട്: ജില്ലാ മെഡിക്കൽ ഓഫീസ് (ആരോഗ്യം), ദേശീയ ആരോഗ്യ ദൗത്യം എന്നിവയുടെ സംയുക്ത ആഭിമുഖ്യത്തിൽ കാസർകോട് പ്രസ് ക്ലബ്ബുമായി ചേർന്ന് വിവിധ ആരോഗ്യ വിഷയങ്ങളെക്കുറിച്ച് മാധ്യമ ശില്പശാല സംഘടിപ്പിച്ചു. കാസർകോട് പ്രസ് ഫോറത്തിൽ നടന്ന ശില്പശാല ജില്ലാ ആർ സി എച്ച് ഓഫീസർ ഡോ. ഷാന്റി കെ കെ ഉദ്ഘാടനം ചെയ്തു. പ്രസ് ക്ലബ് പ്രസിഡന്റ് സിജു കണ്ണൻ ചടങ്ങിൽ അധ്യക്ഷനായിരുന്നു.

വിരവിമുക്ത ദിനത്തെക്കുറിച്ച് ജില്ലാ ആർ സി എച്ച് ഓഫീസർ ഡോ. ഷാന്റി കെ കെ വിഷയാവതരണം നടത്തി. 'അശ്വമേധം 7.0' എന്ന പേരിൽ നടത്തുന്ന കുഷ്ഠരോഗ നിർണയ ഭവന സന്ദർശന ക്യാമ്പയിനെക്കുറിച്ച് ജില്ലാ ലെപ്രസി ഓഫീസർ ഡോ. സന്തോഷ് കെ സംസാരിച്ചു. 2026 ജനുവരി 7 മുതൽ 20 വരെയാണ് ഈ പരിപാടി ജില്ലയിൽ സംഘടിപ്പിക്കുന്നത്.

സംസ്ഥാനത്ത് 2026 ജനുവരി 1 മുതൽ ആരംഭിച്ച 'ആരോഗ്യം ആനന്ദം വൈബ് ഫോർ വെൽനസ്' ക്യാമ്പയിനെക്കുറിച്ച് ഡെപ്യൂട്ടി ജില്ലാ മെഡിക്കൽ ഓഫീസർ ഡോ. അജയ് രാജൻ വിശദീകരിച്ചു. ആരോഗ്യകരമായ ആഹാരം, സ്ഥിരമായ ശാരീരിക വ്യായാമം, ലഹരിവസ്തുക്കളുടെ വർജ്ജനം, മാനസികാരോഗ്യ സംരക്ഷണം എന്നീ നാല് പ്രധാന വിഷയങ്ങളിലാണ് ഈ ക്യാമ്പയിൻ കേന്ദ്രീകരിക്കുന്നത്.

ആന്റി മൈക്രോബിയൽ റെസിസ്റ്റൻസ് അഥവാ ആന്റിബയോട്ടിക് മരുന്നുകളുടെ ദുരുപയോഗം തടയുന്നതിനെക്കുറിച്ച് ഡോ. ബേസിൽ വർഗ്ഗീസ് ക്ലാസ്സെടുത്തു. അനാവശ്യമായ ആന്റിബയോട്ടിക് ഉപയോഗം തടയുകയാണ് ഈ ബോധവൽക്കരണത്തിലൂടെ ലക്ഷ്യമിടുന്നത്. 

ജില്ലാ എഡ്യൂക്കേഷൻ ആൻഡ് മീഡിയ ഓഫീസർ അബ്ദുൽ ലത്തീഫ് മഠത്തിൽ സ്വാഗതവും, ദേശീയ ആരോഗ്യ ദൗത്യം കൺസൽട്ടന്റ് കമൽ കെ ജോസ് നന്ദിയും പറഞ്ഞു.

നിങ്ങളുടെ കുട്ടികൾക്ക് വിര ഗുളിക നൽകിയോ? ഈ പ്രധാന അറിയിപ്പ് മറ്റുള്ളവരിലേക്കും പങ്കുവെക്കൂ. 

Article Summary: Kasaragod district launched National Deworming Day 2026 at Vellachal MRS, targeting over 3.4 lakh children with Albendazole tablets.

#DewormingDay #KasaragodNews #HealthKerala #Albendazole #ChildHealth #KasaragodVartha