പ്രവാചക പ്രകീർത്തനങ്ങളാൽ മുഖരിതമായി നബിദിനം; കാസർകോട്ട് വർണാഭമായ റാലികൾ

കാസർകോട്: (KasargodVartha) പ്രവാചകൻ മുഹമ്മദ് നബി(സ)യുടെ ജന്മദിനം ആഘോഷിച്ച് നാടും നഗരവും. നബിദിനത്തോടനുബന്ധിച്ച് കാസർകോട് ജില്ലയിലെ വിവിധ ഭാഗങ്ങളിൽ വർണാഭമായ നബിദിന റാലികൾ നടന്നു. സ്നേഹത്തിന്റെയും സാഹോദര്യത്തിന്റെയും സന്ദേശങ്ങൾ ഉയർത്തിപ്പിടിച്ചാണ് വിശ്വാസികൾ റാലികളിൽ അണിനിരന്നത്.

പോലീസ് അധികാരികളുടെ നിർദേശങ്ങൾ പൂർണ്ണമായി പാലിച്ചുകൊണ്ടാണ് റാലികൾ സംഘടിപ്പിച്ചത്. പൊതുഗതാഗതത്തിന് തടസ്സമുണ്ടാകാത്ത രീതിയിലായിരുന്നു എല്ലായിടത്തും ഘോഷയാത്രകൾ കടന്നുപോയത്. മദ്ഹ് ഗീതങ്ങൾ പാടിയും പ്രവാചകന്റെ ജീവിത ചരിത്രം അയവിറക്കിയും മദ്രസ വിദ്യാർത്ഥികളും മുതിർന്നവരും അടങ്ങുന്ന വിശ്വാസ സമൂഹം റാലികളെ ധന്യമാക്കി.

കാസർകോട് തളങ്കര, നെല്ലിക്കുന്ന് എന്നിവിടങ്ങളിൽ നടന്ന റാലികൾ ജനശ്രദ്ധയാകർഷിച്ചു. ബേക്കൽ, പള്ളിക്കര, ചെങ്കള, ചെർക്കള, ബോവിക്കാനം, ബദിയടുക്ക, ചട്ടഞ്ചാൽ, കുണിയ, ചന്തേര, ചെറുവത്തൂർ, തൃക്കരിപ്പൂർ തുടങ്ങിയ ഭാഗങ്ങളിലെല്ലാം മദ്രസ വിദ്യാർഥികളുടെ റാലികൾ നടന്നു. മലയോര പ്രദേശങ്ങളിലും വർണാഭമായ റാലികൾ സംഘടിപ്പിച്ചു. നൂറുകണക്കിന് ആളുകളാണ് ഈ റാലികൾ കാണുന്നതിനായി റോഡിനിരുവശവും തടിച്ചുകൂടിയത്. കാഞ്ഞങ്ങാടും നബിദിന റാലിക്ക് വൻ ജനപങ്കാളിത്തമുണ്ടായി. ചില സ്ഥലങ്ങളിൽ ശനിയാഴ്ചയാണ് റാലി നടക്കുക.

വിവിധ മദ്രസകളുടെ നേതൃത്വത്തിൽ ആയിരക്കണക്കിന് ആളുകളാണ് റാലികളിൽ പങ്കെടുത്തത്. മൊഗ്രാൽ കൊപ്പളം സിറാജുൽ ഉലൂം മദ്രസ, മൊഗ്രാൽ ടൗൺ ഷാഫി ജുമാമസ്ജിദ് ഹയാത്തുൽ ഇസ്ലാം മദ്രസ, മുഹ് യദ്ദീൻ ജുമാ മസ്ജിദ് നൂറുൽഹുദാ മദ്രസ, ചളിയങ്കോട് ജുമാമസ്ജിദ് ശറഫുൽ ഇസ്ലാം മദ്രസ, നാങ്കി ജുമാമസ്ജിദ് ബദ്റുൽ ഉലൂം മദ്രസ, മൊഗ്രാൽ കടവത്ത് അൽ മദ്രസത്തുൽ ആലിയ തുടങ്ങിയ മദ്രസകളുടെ കമ്മിറ്റി ഭാരവാഹികളും അധ്യാപകരും റാലികൾക്ക് നേതൃത്വം നൽകി. കുമ്പളയിലും ബന്തിയോട്, മഞ്ചേശ്വരം ഭാഗങ്ങളിലും നടന്ന മീലാദ് റാലികൾ ശ്രദ്ധേയമായിരുന്നു.

നിങ്ങളുടെ പ്രദേശത്തെ നബിദിന റാലിയുടെ വിശേഷങ്ങൾ കമൻ്റിൽ പങ്കുവയ്ക്കാമോ?

Article Summary: Nabidin celebrated in Kasaragod with grand rallies.

#Nabidin #Mawlid #Kasaragod #Kerala #ReligiousFestival #Rally