കാസര്‍കോട്ടെ കുടിവെള്ളക്ഷാമം; വാട്ടര്‍ അതോറിറ്റി മാനേജിംഗ് ഡയറക്ടര്‍ നേരിട്ട് ഇടപെടണമെന്ന് എന്‍.എ നെല്ലിക്കുന്ന്

കാസര്‍കോട്: (www.kasargodvartha.com 27/03/2015) കേരളത്തില്‍ മറ്റൊരിടത്തും ഇല്ലാത്ത വിധത്തില്‍ മഴക്കാലത്ത് പോലും കുടിവെള്ളത്തിനു കാത്തിരിക്കേണ്ട ഗതികേടാണ് കാസര്‍കോട്ടെ ജനങ്ങള്‍ക്കുള്ളത്. നീണ്ട ദിവസങ്ങള്‍ ഒരു വീട്ടില്‍ കുടിവെള്ളം എത്തിയില്ലെങ്കില്‍ അനുഭവപ്പെടുന്ന കഷ്ടക മനസിലാക്കാന്‍ ഉദ്യോഗസ്ഥന്മാര്‍ തയ്യാറാകുന്നില്ല.

വെള്ളം മുടങ്ങി പ്രാഥമികാവശ്യങ്ങള്‍ പോലും നിര്‍വ്വഹിക്കാന്‍ കഴിയാതെ വരുമ്പോള്‍ രോഷം ഉണ്ടാകുക സ്വാഭാവികമാണ്. ഈ രോഷം സര്‍ക്കാരിനെതിരെ ആയുധമാക്കാന്‍ ചില ഉദ്യോഗസ്ഥന്മാര്‍ കരുതിക്കൂട്ടി അവസരം സൃഷ്ടിക്കുകയാണോ എന്ന് സംശയിക്കേണ്ടിയിരിക്കുന്നുവെന്ന് എം.ഡി. ക്കു നല്‍കിയ കത്തില്‍ എം.എല്‍.എ. പറഞ്ഞു. മാനേജിംഗ് ഡയറക്ടര്‍ കാസര്‍കോട്ടെത്തി ഉദ്യോഗസ്ഥന്മാരെയും ജനപ്രതിനിധികളേയും ഒന്നിച്ചിരുത്തി ഗൗരവമേറിയ ഈ പ്രശ്‌നം ചര്‍ച്ച ചെയ്തു ഫലപ്രദമായ തീരുമാനമെടുക്കണം.

നിരന്തരം കേടുവരുന്ന മോട്ടോറുകള്‍ റിപ്പയര്‍ ചെയ്യാന്‍ സ്ഥിരം മെക്കാനിക്കുകള്‍ വേണമെന്നും പുറമെ നിന്ന് നിയോഗിച്ച മെക്കാനിക്കുകളുടെ കുടിശ്ശിക വളരെ പെട്ടെന്ന് കൊടുത്തു തീര്‍ക്കണമെന്നും എന്‍.എ. നെല്ലിക്കുന്ന് ആവശ്യപ്പെട്ടു.