വർഗീയ ഫാസിസത്തിനെതിരെ യുവത്വം ജാഗ്രത പാലിക്കണം; 'ഇങ്കിലാബ്' പ്രതിനിധി സമ്മേളനം ഉദ്ഘാടനം ചെയ്ത് മുനവ്വറലി ശിഹാബ് തങ്ങൾ

കാസർകോട്: (KasargodVartha) രാജ്യത്ത് വർധിച്ചുവരുന്ന വർഗീയ ധ്രുവീകരണത്തിനും ഫാസിസ്റ്റ് പ്രവണതകൾക്കുമെതിരെ യുവജന സമൂഹം അതീവ ജാഗ്രത പാലിക്കണമെന്ന് മുസ്ലിം യൂത്ത് ലീഗ് സംസ്ഥാന പ്രസിഡൻ്റ് പാണക്കാട് മുനവ്വറലി ശിഹാബ് തങ്ങൾ ആവശ്യപ്പെട്ടു. മുസ്ലിം യൂത്ത് ലീഗ് കാസർകോട് ജില്ലാ സമ്മേളനത്തിൻ്റെ ഭാഗമായുള്ള ഇങ്കിലാബ് പ്രതിനിധി സമ്മേളനം കാസർകോട് മുനിസിപ്പൽ കോൺഫറൻസ് ഹാളിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 

രാജ്യത്തിൻ്റെ ഭരണഘടനയും ജനാധിപത്യ മൂല്യങ്ങളും കടുത്ത വെല്ലുവിളി നേരിടുന്ന കാലഘട്ടത്തിലൂടെയാണ് നാം കടന്നുപോകുന്നത്. ഈ സാഹചര്യത്തിൽ മതനിരപേക്ഷത സംരക്ഷിക്കാനും അവകാശങ്ങൾ നേടിയെടുക്കാനുമുള്ള പോരാട്ടങ്ങളിൽ യൂത്ത് ലീഗ് പ്രവർത്തകർ മുൻപന്തിയിലുണ്ടാവണമെന്നും അദ്ദേഹം ഓർമിപ്പിച്ചു.

പോരാട്ടം ഫാസിസ്റ്റ് ശക്തികളോട്

കേരളത്തിലെ പല ജില്ലകളിലും മുസ്ലിം ലീഗ് പോരാടുന്നത് ഇടതുപക്ഷത്തോടാണ്. എന്നാൽ കാസർകോട് ജില്ലയിൽ ഫാസിസ്റ്റ് ശക്തികളോടാണ് മുസ്ലിം ലീഗിൻ്റെ പോരാട്ടം. തെക്കൻ ജില്ലകളിൽ ബിജെപി നുഴഞ്ഞുകയറുമ്പോൾ കാസർകോട് ജില്ലയിൽ ബിജെപിയുടെ വളർച്ച തടയാൻ വലിയ രാഷ്ട്രീയ ഉത്തരവാദിത്വമാണ് മുസ്ലിം ലീഗും യൂത്ത് ലീഗും ഏറ്റെടുത്ത് നടത്തുന്നത്. 

കഴിഞ്ഞ 10 വർഷമായി പ്രതിപക്ഷത്തിരുന്ന് സർക്കാരിൻ്റെ അനീതികൾക്കെതിരെ ശബ്ദമുയർത്താൻ സംഘടനയ്ക്ക് കഴിഞ്ഞു. ഭരണകൂടങ്ങൾ നീതി ഉറപ്പുവരുത്താൻ തയാറാകാത്തപ്പോൾ ശക്തമായി പ്രതികരിച്ച യുവജന സംഘടനയാണ് യൂത്ത് ലീഗ്. ന്യൂനപക്ഷങ്ങളുടെ ന്യായമായ ആവശ്യങ്ങൾക്ക് വേണ്ടി തുടർന്നും ശബ്ദിക്കുമെന്നും നീതി നിഷേധമുണ്ടായാൽ പ്രതികരിക്കുമെന്നും അദ്ദേഹം പറഞ്ഞു.

ലഹരിക്കെതിരെ പ്രതിരോധം

സമൂഹത്തെയും യുവതലമുറയെയും ഒരുപോലെ ഗ്രസിക്കുന്ന ലഹരി മാഫിയക്കെതിരെ ശക്തമായ പ്രതിരോധ പ്രവർത്തനങ്ങളും ബോധവൽക്കരണവും നടത്താൻ യൂത്ത് ലീഗ് നേതൃത്വം നൽകണം. ജീവകാരുണ്യ സാമൂഹിക സേവന രംഗത്ത് സംഘടന നടത്തുന്ന ഇടപെടലുകൾ കൂടുതൽ ജനകീയമാക്കാനും പാർശ്വവൽക്കരിക്കപ്പെട്ട ജനവിഭാഗങ്ങൾക്ക് താങ്ങായി മാറാനും പ്രവർത്തകർക്ക് സാധിക്കണം. വരാനിരിക്കുന്ന വെല്ലുവിളികളെ നേരിടാൻ സംഘടനാപരമായ ഐക്യവും കരുത്തും വർധിപ്പിക്കണമെന്നും അദ്ദേഹം ആഹ്വാനം ചെയ്തു.

പങ്കെടുത്ത പ്രമുഖർ

മുസ്ലിം യൂത്ത് ലീഗ് ജില്ലാ പ്രസിഡൻ്റ് അസീസ് കളത്തൂർ യോഗത്തിൽ അധ്യക്ഷത വഹിച്ചു. ജനറൽ സെക്രട്ടറി സഹീർ ആസിഫ് സ്വാഗതം പറഞ്ഞു. മുസ്ലിം ലീഗ് സംസ്ഥാന ട്രഷറർ സിടി അഹമ്മദലി, ജില്ലാ പ്രസിഡൻ്റ് കല്ലട്ര മാഹിൻ, ജനറൽ സെക്രട്ടറി എ അബ്ദുൽ റഹ്‌മാൻ, സംസ്ഥാന സെക്രട്ടേറിയറ്റ് അംഗങ്ങളായ എൻഎ നെല്ലിക്കുന്ന് എംഎൽഎ, ബഷീർ വെള്ളിക്കോത്ത് എന്നിവർ സംസാരിച്ചു. മുസ്ലിം ലീഗ് ജില്ലാ ഭാരവാഹികളായ കെഇഎ ബക്കർ, എഎം കടവത്ത്, അഡ്വ. എൻഎ ഖാലിദ്, അബ്ദുൽ റഹ്‌മാൻ വൺഫോർ, ടിഎ മൂസ, എബി ഷാഫി, യൂത്ത് ലീഗ് സംസ്ഥാന വൈസ് പ്രസിഡൻ്റ് അഷ്റഫ് എടനീർ, യൂത്ത് കോൺഗ്രസ് സംസ്ഥാന ജനറൽ സെക്രട്ടറി ജോമോൻ ജോസ്, കെഎം ബഷീർ, എംസി ഖമറുദ്ദീൻ, ടിഡി കബീർ, യൂസുഫ് ഉളുവാർ, എംബി ഷാനവാസ്, എംഎ നജീബ്, എ മുഖ്താർ, ഹാരിസ് തായൽ, ശംസുദ്ദീൻ ആവിയിൽ, ഹാരിസ് അങ്കക്കളരി, റഹ്‌മാൻ ഗോൾഡൻ, റഫീഖ് കേളോട്ട്, എജിസി ഷംസാദ്, എംപി നൗഷാദ്, നൂറുദ്ദീൻ ബെളിഞ്ചം, ഷാനിഫ് നെല്ലിക്കട്ട, സയ്യിദ് സൈഫുദ്ദീൻ കുന്നുംകൈ, അൻസാഫ് കുന്നിൽ തുടങ്ങിയവർ പ്രസംഗിച്ചു.

വിവിധ സെഷനുകൾ നയിച്ചവർ

ഫാസിസ്റ്റ് വിരുദ്ധ പോരാട്ടങ്ങളിലൂടെ ശ്രദ്ധേയയായ ഭോജ്പുരി കലാകാരി നേഹ സിങ് റാത്തോർ, മാധ്യമപ്രവർത്തകൻ സി ദാവൂദ്, തിരക്കഥാകൃത്ത് പിവി ഷാജികുമാർ, യൂത്ത് ലീഗ് സംസ്ഥാന വൈസ് പ്രസിഡൻ്റ് ഫൈസൽ ബാഫഖി തങ്ങൾ, മലപ്പുറം ജില്ലാ പ്രസിഡൻ്റ് ശരീഫ് കുറ്റൂർ, കെസി ബഷീർ എന്നിവർ സമ്മേളനത്തിലെ വിവിധ സെഷനുകൾക്ക് നേതൃത്വം നൽകി.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Muslim Youth League State President Panakkad Munavvarali Shihab Thangal inaugurated the 'Inquilab' delegates conference in Kasaragod, urging youth to remain vigilant against fascist tendencies and communal polarization.

#KasargodVartha #MuslimYouthLeague #MunavvaraliShihabThangal #KasaragodNews #KeralaPolitics #InquilabConference #MuslimLeague #MalayalamNews #AparnaNews