കാസർകോട്ട് പോലീസ് അപ്രഖ്യാപിത കർഫ്യൂ നടപ്പിലാക്കുന്നു; 10 മണിക്ക് ശേഷം കടകൾ അടപ്പിക്കുന്നതിനെതിരെ മുസ്ലിം ലീഗ്

കാസർകോട്: (KasargodVartha) നഗരത്തിലും പരിസര പ്രദേശങ്ങളിലും രാത്രി 10 മണിക്ക് ശേഷം കടകൾ തുറക്കാൻ പാടില്ലെന്ന പോലീസ് നിർദ്ദേശം അപ്രഖ്യാപിത കർഫ്യൂ നടപ്പിലാക്കലാണെന്ന് മുസ്ലിം ലീഗ് ജില്ലാ ജനറൽ സെക്രട്ടറി എ. അബ്ദുൽ റഹ്‌മാൻ ആരോപിച്ചു. 

ജനങ്ങളുടെ ജീവനും സ്വത്തിനും സംരക്ഷണം നൽകാൻ നിയോഗിക്കപ്പെട്ട പോലീസ് ജനങ്ങളെ ഭയപ്പെടുത്തിയും ഭീഷണിപ്പെടുത്തിയും വീട്ടുതടങ്കലിലാക്കുകയാണെന്ന് അദ്ദേഹം കുറ്റപ്പെടുത്തി.

നേരത്തെ ഉറങ്ങുന്ന കാസർകോട് നഗരത്തിൽ കടകമ്പോളങ്ങൾ രാത്രി വൈകിയും തുറന്നും, വാഹനങ്ങൾ ഓടിച്ചും ബസ് സർവീസുകൾ നടത്തിയും സജീവമാക്കാൻ ജനപ്രതിനിധികളും ജില്ലാ ഭരണകൂടവും തദ്ദേശ സ്വയംഭരണ സ്ഥാപനങ്ങളും വ്യാപാരികളും ഒരു വശത്ത് ശ്രമം നടത്തിവരികയാണ്. ഇതിനിടയിലാണ് ജനങ്ങളെ അകാരണമായി ഭയപ്പെടുത്തി വീട്ടിലിരുത്താൻ പോലീസ് ശ്രമിക്കുന്നതെന്ന് അദ്ദേഹം ചൂണ്ടിക്കാട്ടി.

പോലീസിന് മറ്റ് അജണ്ടകൾ?

കേരളത്തിലെ പ്രധാന പട്ടണങ്ങളിലെല്ലാം രാത്രികാലങ്ങളിലും സ്ത്രീകൾ ഉൾപ്പെടെയുള്ളവർക്ക് കുടുംബസമേതം ഷോപ്പിംഗിനും ഭക്ഷണത്തിനുമായി പുറത്തിറങ്ങുന്നത് പതിവാണ്. പട്ടണങ്ങൾ രാത്രികാലങ്ങളിൽ സജീവമാക്കുവാൻ ജില്ലാ ഭരണകൂടങ്ങളും തദ്ദേശഭരണ സ്ഥാപനങ്ങളും ശ്രമിച്ചുവരുമ്പോൾ കാസർകോട്ടെ പോലീസ് അധികാരികൾ ജനങ്ങളെ ഭീതിയിലാക്കുന്നതിന് പിന്നിൽ മറ്റ് അജണ്ടകളുണ്ടെന്ന് സംശയിക്കേണ്ടിയിരിക്കുന്നുവെന്നും അബ്ദുൽ റഹ്‌മാൻ പറഞ്ഞു.

പ്രതിഷേധം കടുപ്പിക്കും

പോലീസ് അധികാരികളുടെ ഈ ഏകപക്ഷീയ തീരുമാനം പിൻവലിക്കാൻ തയ്യാറായില്ലെങ്കിൽ ശക്തമായ പ്രതിഷേധം സംഘടിപ്പിക്കും. രാത്രിയിലും പുലരുന്നത് വരെയും വാഹനങ്ങളടക്കം നഗരത്തിലെത്തിച്ച് ജനങ്ങൾ പ്രതികരിക്കുമെന്നും അബ്ദുൽ റഹ്‌മാൻ മുന്നറിയിപ്പ് നൽകി.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Muslim League District Secretary A. Abdulla Rahman criticized the Kasaragod police for forcing shops to close after 10 PM.

#KasaragodNews #MuslimLeague #KeralaPolice #UnannouncedCurfew #AbdullaRahman #KasaragodVartha