Muslim League | ലീഗ് ഓഫീസുകൾ ജനങ്ങളുടെ സേവനകേന്ദ്രങ്ങളായി മാറിയെന്ന് പാണക്കാട് മുനവ്വിറലി ശിഹാബ് തങ്ങൾ

തൃക്കരിപ്പൂർ: (KasargodVartha) മുസ്ലീം ലീഗ് ഓഫീസുകൾ ജനങ്ങളുടെ സേവനകേന്ദ്രങ്ങളായി മാറിയെന്ന് യൂത്ത് ലീഗ് സംസ്ഥാന പ്രസിഡണ്ട് പാണക്കാട് മുനവ്വിറലി ശിഹാബ് തങ്ങൾ. 

പേക്കടം പെരിയോത്ത് ജംഗ്ഷനിൽ നിർമ്മിക്കുന്ന ഹൈദരലി ശിഹാബ് തങ്ങൾ സ്മാരക സൗധത്തിന്റെ ശിലാസ്ഥാപനം നിർവഹിച്ചുകൊണ്ട് സംസാരിക്കുകയായിരുന്നു അദ്ദേഹം. മുസ്ലീം ലീഗ് മുൻ സംസ്ഥാന പ്രസിഡണ്ട് പാണക്കാട് സയ്യിദ് ഹൈദരലി ശിഹാബ് തങ്ങളുടെ സ്മരണാർത്ഥം നിർമ്മിക്കുന്ന ഈ സൗധം പ്രദേശവാസികൾക്ക് ഒരു ആശ്വാസ കേന്ദ്രമായിരിക്കുമെന്നും മുനവ്വിറലി ശിഹാബ് തങ്ങൾ പറഞ്ഞു. ലീഗ് ഓഫീസുകൾ ജനങ്ങളുടെ പ്രശ്‌നങ്ങൾ കേൾക്കുകയും അവർക്ക് പരിഹാരം കാണുന്നതിന് വേണ്ടി പ്രവർത്തിക്കുകയും ചെയ്യേണ്ടതാണെന്നും അദ്ദേഹം ഊന്നിപ്പറഞ്ഞു.

പേക്കടം പെരിയോത്ത് ജംഗ്ഷനിൽ നടന്ന ചടങ്ങിൽ ചെയർമാൻ എൻ. റാഫി അധ്യക്ഷത വഹിച്ചു. അൻവർ തങ്ങൾ പ്രാർത്ഥന നടത്തി. മുസ്ലീം ലീഗ് ജില്ലാ സെക്രട്ടറി എ ജി സി ബഷീർ, വി വി അബ്ദുല്ല ഹാജി, ടി പി അഹമ്മദ് ഹാജി, പി കെ എം കുട്ടി, ശംസുദീൻ ആയിറ്റി, അബ്ദുല്ല ജൂബിലി, സജ്ജാദ് പെരിയോത്ത്, ടി എസ് നജീബ്, എം ടി പി. നിബ്രാസ്, അസറുദ്ദീൻ മണിയനോടി, വി പി പി ഷുഹൈബ്, മെഹബൂബ് ആയിറ്റി, സിറാജ് വടക്കുമ്പാട്, ജാബിർ തങ്കയം, എ കെ മുംതസിർ, സി സവാദ്, എ കെ നൗഫൽ, എൻ സഹൽ എന്നിവർ പ്രസംഗിച്ചു.

ചടങ്ങിൽ മുതിർന്ന മുസ്ലീം ലീഗ് നേതാക്കളായ ഇ കെ അഹമ്മദ് കുഞ്ഞി ഹാജി, എം എസ്.ഹമീദ് എന്നിവരെ മുനവ്വിറലി ശിഹാബ് തങ്ങൾ ആദരിച്ചു. എംഎസ്എഫ് ലിറ്റിൽ സ്റ്റാർ അവാർഡിന്റെ ലോഗോ പ്രകാശനവും ചടങ്ങിൽ നടന്നു. ഹൈദരലി ശിഹാബ് തങ്ങൾ സ്മാരക സൗധം നിർമ്മാണം പൂർത്തിയാകുന്നതോടെ പ്രദേശവാസികൾക്ക് ഒരു സമഗ്ര സേവന കേന്ദ്രം ലഭ്യമാകും. ഈ സൗധം വിദ്യാഭ്യാസം, ആരോഗ്യം, സാമൂഹിക സേവനം തുടങ്ങിയ മേഖലകളിൽ പ്രവർത്തിക്കുന്നതിന് വേണ്ടിയുള്ള ഒരു വേദിയായിരിക്കും. മുസ്ലീം ലീഗിന്റെ ജനസേവന പ്രവർത്തനങ്ങൾക്ക് ഒരു പുതിയ അധ്യായം തുറക്കുമെന്നും അദ്ദേഹം പറഞ്ഞു.