വീട്ടിനടുത്ത് മദ്യപിക്കുന്നതിനിടെ എതിര്‍ത്തതിന് വധശ്രമം; ഒരാള്‍ അറസ്റ്റില്‍

കാസര്‍കോട്: യുവാവിനെ തലക്കടിച്ചുകൊല്ലാന്‍ ശ്രമിച്ച കേസില്‍ ഒരാളെ പോലീസ് അറസ്റ്റു ചെയ്തു. ചൂരിയിലെ ഹാരിസിനെ (19) യാണ് ടൗണ്‍ പോലീസ് അറസ്റ്റുചെയ്തത്. ഞായറാഴ്ച ഉച്ചയ്ക്ക് അണങ്കൂരിലാണ് കേസിനാസ്പദമായ സംഭവം. കല്ലുകൊണ്ടിടിയേറ്റ് തലയ്ക്ക് ഗുരുതരമായി പരിക്കേറ്റ് അണങ്കൂരിലെ മുഹമ്മദ് ഷഫീലിനെ (22) കാസര്‍കോട് സ്വകാര്യാശുപത്രിയില്‍ പ്രവേശിപ്പിച്ചു.

മദ്യപിച്ചെത്തിയ രണ്ടംഗ സംഘം വീട്ടുപറമ്പില്‍ അതിക്രമിച്ചുകയറി തലക്ക് കല്ലുകൊണ്ടിടിക്കുകയായിരുന്നുവെന്ന് മുഹമ്മദ് പരാതിപ്പെട്ടു. ഇതുസംബന്ധിച്ച പരാതിയില്‍ അണങ്കൂരിലെ മുനീര്‍, ചൂരിയിലെ ഹാരിസ് എന്നിവര്‍ക്കെതിരെ വധശ്രമത്തിന് കേസെടുത്ത പോലീസ് ഹാരിസിനെ അറസ്റ്റുചെയ്തു. വീട്ടുപരിസരത്ത് മദ്യപാനം നടത്തുന്നത് ചോദ്യം ചെയ്ത വിരോധത്തിനാണ് അക്രമം.