Commitment | സുനാമി ഫ്ലാറ്റ് നിവാസികളുടെ പ്രശ്‌നങ്ങൾക്ക് പരിഹാരം കാണുന്നതിന് ഇടപെടുമെന്ന് നഗരസഭ ചെയർമാൻ

കാസർകോട്: (KasargodVartha) ബീരന്ത്‌വയൽ സുനാമി ഫ്ലാറ്റിലെ നിവാസികളുടെ പ്രശ്‌നങ്ങൾക്ക് പരിഹാരം കാണാൻ നഗരസഭയും താമസക്കാരും ചർച്ച നടത്തി. നഗരസഭാ ചെയർമാൻ അബ്ബാസ് ബീഗത്തിന്റെ നേതൃത്വത്തിൽ നടന്ന യോഗത്തിൽ നിരവധി പ്രധാന തീരുമാനങ്ങൾ എടുത്തു.

ഫ്ലാറ്റിലെ തുമ്പൂർ മൊഴി മാലിന്യ നിർമാർജ്ജന യൂണിറ്റ് യാഥാർത്ഥ്യമാക്കുന്നതിനും ആർ.ആർ.എഫ് യൂണിറ്റ് സ്ഥാപിക്കുന്നതിനും നടപടികൾ സ്വീകരിക്കുമെന്ന് ചെയർമാൻ ഉറപ്പ് നൽകി. പട്ടയം ലഭിക്കാത്ത ഫ്ലാറ്റ് നിവാസികൾക്ക് ഇത് അനുവദിക്കുന്നതിനായി അധികൃതരുമായി ചർച്ച നടത്തുമെന്നും അദ്ദേഹം പറഞ്ഞു.

നഗരസഭാ അധികൃതർ ഉടൻ തന്നെ തുമ്പൂർ മൊഴി യൂണിറ്റ് പ്രവർത്തന സജ്ജമാക്കുന്നതിനും ആർ.ആർ.എഫ് യൂണിറ്റ് സ്ഥാപിക്കുന്നതിനുമുള്ള നടപടികൾ ആരംഭിക്കും. പട്ടയം അനുവദിക്കുന്നതിനുള്ള നടപടികളും ത്വരിതപ്പെടുത്തും.

ആരോഗ്യ സ്റ്റാന്റിംഗ് കമ്മിറ്റി ചെയർമാൻ ഖാലിദ് പച്ചക്കാട്, വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്സണ്‍ രജനി കെ, കൗണ്‍സിലര്‍ വീണാകുമാരി, നഗരസഭാ സെക്രട്ടറി ജസ്റ്റിന്‍ പി.എ, നഗരസഭാ എച്ച്.എസ്. ലതീഷ് കെ.സി, ജെ.എച്ച്.ഐമാരായ ആഷാമേരി, അംബിക എന്നിവർ ചർച്ചയിൽ പങ്കെടുത്തു.

നഗരസഭാ ചെയർമാന്റെ ഉറപ്പുകൾ ഫ്ലാറ്റ് നിവാസികളിൽ വലിയ ആശ്വാസം പകർന്നിട്ടൂണ്ട്. ഈ ഇടപെടൽ സുനാമി ഫ്ലാറ്റ് നിവാസികളുടെ ജീവിതത്തിൽ പുതിയ അധ്യായം തുറക്കുമെന്നും വർഷങ്ങളായി നേരിട്ടുവന്ന പ്രശ്‌നങ്ങൾക്ക് പരിഹാരം കാണുമെന്നുമാണ് അവരുടെ പ്രതീക്ഷ.

#Kasargod, #tsunami flats, #governmentintervention, #localgovernment, #housing, #disasterrelief, #communitydevelopment