ഓട്ടോറിക്ഷയ്ക്ക് മേൽ അക്കേഷ്യ മരം വീണു: ഡ്രൈവർക്ക് ഗുരുതര പരിക്ക്; വാഹനം തകർന്നു

മുള്ളേരിയ: (KasargodVartha) മുള്ളേരിയ-ആളന്തടുക്ക സംസ്ഥാന പാതയിൽ ഓട്ടോറിക്ഷയുടെ മുകളിലേക്ക് കൂറ്റൻ അക്കേഷ്യ മരം കടപുഴകി വീണ് ഡ്രൈവർക്ക് ഗുരുതരമായി പരിക്കേറ്റു. ബുധനാഴ്ച രാവിലെ എട്ട് മണിയോടെ ആദൂർ ഭാഗത്ത് നിന്ന് മുള്ളേരിയയിലേക്ക് പോകുകയായിരുന്ന ഓട്ടോറിക്ഷയ്ക്ക് നേരെയാണ് അപകടമുണ്ടായത്.

ശക്തമായ കാറ്റിൽ റോഡരികിൽ നിന്നിരുന്ന കൂറ്റൻ മരം ഓട്ടോറിക്ഷയുടെ മുകളിലേക്ക് പതിക്കുകയായിരുന്നു. അപകടത്തിൽ ഡ്രൈവർ അബ്ദുല്ല കുഞ്ഞി (42) യുടെ കൈകാലുകൾക്ക് ഒടിവുകളോടെ ഗുരുതരമായി പരിക്കേറ്റു. ഓട്ടോറിക്ഷ പൂർണമായും തകർന്നു.

അപകടം കണ്ടയുടൻ ഓടിക്കൂടിയ നാട്ടുകാർ വിവരം കാസർകോട് അഗ്നിശമന സേനയെ അറിയിച്ചു. സീനിയർ ഫയർ ആൻഡ് റെസ്ക്യൂ ഓഫീസർ വി.എം. സതീശന്റെ നേതൃത്വത്തിൽ, സേനാംഗങ്ങളായ ജിത്തു തോമസ്, കെ.വി. ജിതിൻകൃഷ്ണൻ, ഒ.കെ. പ്രജിത്ത്, വി.വി. ഉണ്ണികൃഷ്ണൻ എന്നിവർ ചേർന്ന് ഓട്ടോറിക്ഷയ്ക്ക് മുകളിൽ വീണ മരം മുറിച്ചുമാറ്റി രക്ഷാപ്രവർത്തനം നടത്തി.

പരിക്കേറ്റ അബ്ദുല്ല കുഞ്ഞിയെ നാട്ടുകാരുടെ സഹായത്തോടെ ഉടൻതന്നെ സ്വകാര്യ ആശുപത്രിയിൽ പ്രവേശിപ്പിച്ചു. അപകടവിവരമറിഞ്ഞ് ആദൂർ പോലീസും സ്ഥലത്തെത്തിയിരുന്നു.

ഈ അപകടത്തെക്കുറിച്ച് നിങ്ങളുടെ അഭിപ്രായം പങ്കുവെക്കൂ.

Article Summary: Auto-rickshaw driver severely injured after acacia tree falls on vehicle.

#Mulleria #AutoAccident #TreeFall #RoadSafety #Kasaragod #Accident