കാസർകോട് തീരദേശത്ത് കാലവർഷഭീതി; അവഗണന തുടരുന്നതിൽ പ്രതിഷേധം ശക്തം

കാസർകോട്: (KasargodVartha) വരാനിരിക്കുന്ന കാലവർഷം കടലോര നിവാസികളെ ഭീതിയിലാഴ്ത്തുന്നു. കാലവർഷമെത്തിയാൽ നെഞ്ചിടിപ്പേറുന്ന മത്സ്യത്തൊഴിലാളികൾ ഉൾപ്പെടെയുള്ള തീരദേശവാസികൾ ശാശ്വതമായ പരിഹാരത്തിനായി വർഷങ്ങളായി കാത്തിരിക്കുകയാണ്. 

വീടും സ്ഥലവും തൊഴിൽ ഉപകരണങ്ങളും നഷ്ടപ്പെട്ട വലിയൊരു വിഭാഗം ജനതയുടെ ആശങ്കകൾക്ക് പരിഹാരം കാണാൻ കേന്ദ്ര-സംസ്ഥാന ബഡ്ജറ്റുകളിൽ കാര്യമായ നീക്കങ്ങളില്ലാത്തത് പ്രതിഷേധത്തിന് കാരണമാകുന്നു.

അവഗണനയുടെ കണക്കുകൾ

തീരസംരക്ഷണത്തിനായി സമഗ്രവും ശാസ്ത്രീയവുമായ പദ്ധതികൾ വേണമെന്ന ആവശ്യത്തിന് വർഷങ്ങളുടെ പഴക്കമുണ്ട്. ജില്ലാ ഭരണകൂടവും ജനപ്രതിനിധികളും കടലാക്രമണ പ്രദേശങ്ങൾ സന്ദർശിച്ചു മടങ്ങാറുണ്ടെങ്കിലും പ്രായോഗികമായ പദ്ധതികളൊന്നും എത്തുന്നില്ലെന്ന് തീരദേശവാസികൾ പരാതിപ്പെടുന്നു. 

കേന്ദ്ര ബഡ്ജറ്റിൽ തീരദേശ സംരക്ഷണം 'ആമ' സംരക്ഷണ പദ്ധതികളിലൊതുങ്ങിയപ്പോൾ കേരളത്തിന് ലഭിച്ചത് നാമമാത്രമായ ഫണ്ട് മാത്രമാണ്. കടലാക്രമണം തടയാൻ ഇത്തവണയും പുതിയ പദ്ധതികളില്ലാത്തത് തീരദേശത്തെ ആശങ്കയിലാഴ്ത്തുന്നു.

തകർന്നടിഞ്ഞ തീരങ്ങൾ

കഴിഞ്ഞവർഷം കാസർകോട് ജില്ലയിൽ മഞ്ചേശ്വരം മുതൽ വലിയപറമ്പ് വരെയുള്ള തീരപ്രദേശങ്ങളിൽ രൂക്ഷമായ കടലാക്രമണമാണ് ഉണ്ടായത്. മഞ്ചേശ്വരം കണ്വതീർത്ഥ, ഉപ്പളയുടെ വിവിധ ഭാഗങ്ങൾ, കുമ്പള കോയിപ്പാടി, മൊഗ്രാൽ നാങ്കി, കാവുഗോളി, ചേരങ്കൈ, കീഴൂർ, ചെമ്പരിക്ക, ഉദുമ, തൃക്കണ്ണാട്, കോട്ടിക്കുളം, അജാനൂർ, വലിയപറമ്പ് എന്നിവിടങ്ങളിൽ നിരവധി വീടുകളും സ്ഥലങ്ങളും കടലെടുത്തു. 

തോണികൾ, വലകൾ, തെങ്ങുകൾ, തീരദേശ റോഡുകൾ എന്നിവയ്ക്കും കനത്ത നാശനഷ്ടം സംഭവിച്ചു. അധികൃതരുടെ അവഗണനയിൽ പ്രതിഷേധിച്ച് ജനങ്ങൾ തെരുവിലിറങ്ങിയെങ്കിലും ഇറിഗേഷൻ - ഫിഷറീസ് വകുപ്പുകൾ നൽകിയ ഉറപ്പുകൾ പാലിക്കപ്പെട്ടില്ല.

ബദൽ സംവിധാനങ്ങൾക്കായി മുറവിളി

പരീക്ഷിച്ച് പരാജയപ്പെട്ട ജിയോബാഗുകളും കരിങ്കൽ ഭിത്തികളും ഉപേക്ഷിച്ച് കോൺക്രീറ്റ് ഉപയോഗിച്ചുള്ള പുതിയ സാങ്കേതികവിദ്യകളോ നിലവിലുള്ള 'ടെട്രാപോഡു'കൾ ഉപയോഗിച്ചുള്ളതോ ആയ ശാസ്ത്രീയമായ കടൽഭിത്തി നിർമ്മിക്കണമെന്നാണ് തീരദേശവാസികളുടെ പ്രധാന ആവശ്യം. രാജ്യത്തിൻ്റെ മറ്റു ഭാഗങ്ങളിൽ പരീക്ഷിച്ച് വിജയിച്ച മറ്റ് പദ്ധതികളുണ്ടെങ്കിൽ അത് കാസർകോട് ജില്ലയിലും നടപ്പിലാക്കണമെന്ന് ഇവർ ആവശ്യപ്പെടുന്നു. 

എന്നാൽ ഈ നിർദ്ദേശത്തോട് അധികൃതർ മുഖം തിരിച്ചുനിൽക്കുകയാണെന്നാണ് ആക്ഷേപം. സർക്കാരുകളുടെ അവഗണനയ്ക്കെതിരെ ശക്തമായ പ്രതിഷേധത്തിനൊരുങ്ങുകയാണ് തീരദേശ ജനത.

വാട്സ്ആപ്പ് ഗ്രൂപ്പുകളിലും സോഷ്യൽ മീഡിയയിലും ഈ വാർത്ത പങ്കുവെക്കുമല്ലോ. ഇത്തരം വാർത്തകൾ അപ്പപ്പോൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Residents of the Kasaragod coastline are protesting against the lack of budgetary allocations for scientific sea protection as the monsoon approaches.

#KasaragodCoast #MonsoonSafety #SeaErosion #FishermenStruggle #Tetrapods #KeralaBudget #KasaragodNews