സ്ത്രീകളും കുട്ടികളും മാത്രമുള്ള വീട്ടില്‍ അതിക്രമിച്ചെത്തി പണവുമായി കടന്നുകളഞ്ഞ കേസില്‍ മുഖ്യപ്രതി അറസ്റ്റില്‍, പിടിയിലായത് നിരവധി കേസുകളില്‍ പ്രതിയായ യുവാവ്, കൂട്ടുപ്രതികള്‍ക്കു വേണ്ടി അന്വേഷണം

ബദിയടുക്ക: (www.kasargodvartha.com 09.05.2018) സ്ത്രീകളും കുട്ടികളും മാത്രമുള്ള വീട്ടില്‍ അതിക്രമിച്ചെത്തി പണവുമായി കടന്നുകളഞ്ഞ കേസില്‍ മുഖ്യപ്രതിയെ പോലീസ് അറസ്റ്റു ചെയ്തു. പെര്‍ള കണ്ണാടിക്കാനയിലെ നവാസ് ഷരീഫ് എന്ന കത്തി നൗഷാദിനെ (36)യാണ് ബദിയടുക്ക പോലീസ് അറസ്റ്റു ചെയ്തത്. ഫെബ്രുവരി 22നാണ് കേസിനാസ്പദമായ സംഭവം. പെര്‍ള കണ്ണാടിക്കാനയിലെ ഗള്‍ഫുകാരന്റെ വീട്ടില്‍ അതിക്രമിച്ചെത്തിയാണ് നൗഷാദും സംഘവും പണവുമായി കടന്നു കളഞ്ഞത്.

സ്ത്രീയും കുട്ടികളും മാത്രമാണ് വീട്ടില്‍ താമസം. രാത്രി 11 മണിയോടെ വാതില്‍ മുട്ടിയപ്പോള്‍ ജനാല വഴി നോക്കിയ വീട്ടമ്മ പുറത്ത് മൂന്നുപേരെ കണ്ടു. പരിചയത്തിലുള്ള യുവാവും കൂട്ടത്തിലുള്ളതിനാല്‍ വാതില്‍ തുറക്കുകയായിരുന്നു. അതിനിടെ അകത്തുകയറിയ സംഘം വീട്ടമ്മയെ തള്ളിയിട്ട് അലമാരയില്‍ സൂക്ഷിച്ച 8,000 രൂപ തട്ടിയെടുത്തുവെന്നാണ് കേസ്. കേസിലെ മറ്റു പ്രതികളെ പിടികൂടാന്‍ പോലീസ് അന്വേഷണം ഊര്‍ജിതമാക്കിയിട്ടുണ്ട്.


ബദിയടുക്ക പോലീസ് സ്റ്റേഷനില്‍ നൗഷാദിനെതിരെ നാലു കേസുകള്‍ നിലവിലുണ്ടെന്ന് പൊലീസ് പറഞ്ഞു. കണ്ണാടിക്കാനയില്‍ വെച്ചാണ് നൗഷാദിനെ പിടികൂടിയത്.