അമ്മാമാരും കുട്ടികളും തള്ളിനീക്കിയത് ഭയചകിതമായ മണിക്കൂറുകള്‍

കണിക്കൊന്ന പൂത്തുലഞ്ഞ പശ്ചാത്തലത്തില്‍ വിഷുവിനെ വരവേല്‍ക്കാന്‍ സമൂഹമാകെ ആവേശത്തോടെ മുന്നിട്ടിറങ്ങുമ്പോള്‍, വിഷുകൊഴുപ്പിക്കാന്‍ പുത്തനുടുപ്പുകളും ഉടയാടകളും തിരഞ്ഞ് ജനങ്ങള്‍ വിപണിയിലിറങ്ങുമ്പോള്‍ കാസര്‍കോട്ടുകാരുടെ പ്രാര്‍ത്ഥന സുരക്ഷിതമായി എങ്ങയെങ്കിലും തിരിച്ച് വീട്ടിലെത്തണമെന്ന് മാത്രമാണ്. ഈ പ്രാര്‍ത്ഥന കേള്‍ക്കാന്‍ ആരുമില്ലെന്നതിന്റെ ദൃശ്യങ്ങളാണ് കഴിഞ്ഞദിവസങ്ങളില്‍ ജില്ലാ ആസ്ഥാനനഗരിയില്‍ ദൃശ്യമായത്. തിങ്കളാഴ്ച സന്ധ്യയോടെ പെയ്തിറങ്ങിയ അക്രമത്തെ സംബന്ധിച്ച നിറംപിടിപ്പിച്ച കഥകള്‍ അക്ഷരാര്‍ത്ഥത്തില്‍ സ്ത്രീകളടക്കമുള്ള ജനങ്ങളെ തെല്ലൊന്നുമല്ല സംഭ്രമിപ്പിച്ച് കളഞ്ഞത്.

സന്ധ്യാനേരത്ത് നഗരമുറ്റത്തെ ആരാധനാലയ പരിസരത്തു നിന്നും പടര്‍ന്ന ഭീതി രാത്രി പത്തുമണി വരെ കത്തിനിന്നു. ഇതിനിടയില്‍ ഷോപ്പിംഗിനിറങ്ങിയവര്‍, ജോലി കഴിഞ്ഞ് വീട്ടിലെത്തേണ്ടവര്‍, ആശുപത്രികളിലേക്കും തിരിച്ച് വീട്ടിലേക്കും പോകേണ്ടവര്‍ ഇവരൊന്നടങ്കം അക്രമ ഭീതിയുടെ മുള്‍മുനയില്‍ കുടുങ്ങി കിടക്കുകയായിരുന്നു. ഷോപ്പിംഗിനെത്തിയ സ്ത്രീകളെയും കുട്ടികളെയും സ്വന്തം കടയ്ക്കുള്ളില്‍ സംരക്ഷണ വലയം തീര്‍ത്ത് സുരക്ഷിതരാക്കുകയായിരുന്നു നഗരത്തിലെ വ്യാപാരി സമൂഹം. അതിനിടയില്‍ വാഹനങ്ങളും മറ്റും കിട്ടാതെ വീടുകളില്‍ എത്താന്‍ വിഷമിച്ച സ്ത്രീകളെയും കുട്ടികളെയും സുമനസുകളായ ചിലര്‍ വേണ്ട സൗകര്യങ്ങള്‍ ചെയ്തു കൊടുത്തും മാതൃക കാട്ടി.