പീഡനത്തിനിരയായ 16 കാരിയുടെ നഗ്നരംഗങ്ങള്‍ ഇന്റര്‍നെറ്റില്‍ പ്രചരിക്കുന്നു
Apr 19, 2012, 17:00 IST
ചീമേനി: മുന്‍ ജയില്‍വാര്‍ഡന്റെ ലൈംഗിക പീഡനത്തിന് ഇരയായ 16 കാരിയായ സ്കൂള്‍ വിദ്യാര്‍ത്ഥിനിയുടെ നഗ്നരംഗങ്ങള്‍ ഇന്റര്‍നെറ്റിലും മൊബൈലിലും പ്രചരിക്കുന്നു. പീഡനകേസിലെ മുഖ്യ പ്രതിയും ചീമേനി തുറന്ന ജയിലിലെ മുന്‍ വാര്‍ഡനുമായ പൊതാവൂരിലെ പ്രവീണ്‍ (25) കേസിലുള്‍പ്പെടുന്നതിന് മുമ്പ് സുഹൃത്തായ ഓട്ടോ ഡ്രൈവറുടെ മൊബൈലിലേക്ക് അയച്ചുകൊടുത്ത പെണ്‍കുട്ടിയുടെ നഗ്നരംഗങ്ങളാണ് ഇപ്പോള്‍ മറ്റ് മൊബൈലുകളിലേക്കും ഇന്റര്‍നെറ്റിലേക്കും പ്രചരിച്ചിരിക്കുന്നത്.
ഇതോടെ പ്രശ്നം പൊതാവൂരില്‍ കൂടുതല്‍ ചൂട് പിടിച്ചിരിക്കുകയാണ്. ഒരു മാസം മുമ്പാണ് ചീമേനി ഗവണ്‍മെന്റ് ഹയര്‍ സെക്കണ്ടറി സ്കൂളിലെ പത്താംതരം വിദ്യാര്‍ത്ഥിയായ പൊതാവൂരിലെ പെണ്‍കുട്ടിയെ ബന്ധുവായ പ്രവീണ്‍ വീടിന് സമീപത്തെ കാട്ടിലേക്ക് പ്രലോഭിപ്പിച്ച് കൊണ്ടുപോയി ലൈംഗിക പീഡനത്തിന് ഇരയാക്കിയത്. വിവാഹ വാഗ്ദാനം ചെയ്തായിരുന്നു പീഡനം. ഇതുസംബന്ധിച്ച രംഗങ്ങള്‍ പ്രവീണ്‍ ക്യാമറയില്‍ പകര്‍ത്തുകയായിരുന്നു.
പിന്നീട് പ്രവീണ്‍ വിവാഹ വാഗ്ദാനത്തില്‍ നിന്ന് പിന്മാറി. അതോടൊപ്പം പെണ്‍കുട്ടിയുടെ നഗ്നചിത്രം മൊബൈലില്‍ പ്രചരിച്ച് തുടങ്ങിയതായുള്ള വിവരവും പുറത്ത് വന്നു. ഇതോടെയാണ് പെണ്‍കുട്ടിയുടെ വീട്ടുകാര്‍ പ്രവീണിനെതിരെ ചീമേനി പോലീസില്‍ പരാതി നല്‍കിയത്. പോലീസ് കേസെടുത്ത് അന്വേഷണമാരംഭിച്ചതോടെ പ്രവീണ്‍ ഒളിവില്‍ കഴിയുകയാണ്. അതെസമയം പ്രവീണിനെ രക്ഷപ്പെടുത്താന്‍ പോലീസില്‍ രാഷ്ട്രീയ ഇടപെടല്‍ ശക്തമായിരിക്കുകയാണ്.
പൊതാവൂരിലെ കോണ്‍ഗ്രസ് പ്രമുഖന്റെ മകനാണ് പീഡനക്കേസില്‍ പ്രതിയായ പ്രവീണ്‍. അതുകൊണ്ടുതന്നെ ഭരണ സ്വാധീനം ഉപയോഗിച്ച് കേസ് അട്ടിമറിക്കാന്‍ ശ്രമം നടക്കുന്നതായി സിപിഎം കേന്ദ്രങ്ങള്‍ ആരോപിക്കുന്നു. ഏപ്രില്‍ 10നാണ് ലൈംഗിക പീഡനം സംബന്ധിച്ച് പോലീസില്‍ പരാതി നല്‍കിയത്. കേസെടുത്ത് രണ്ടാഴ്ചയാകാറായിട്ടും പ്രതിയെ അറസ്റ് ചെയ്യാന്‍ പോലീസ് താല്‍പ്പര്യം കാണിക്കുന്നില്ലെന്നാണ് ആക്ഷേപം.
Keywords: Girl, Molestation, internet, Cheemeni, Kasaragod
Tags
Share this story
