ദേശീയപാത അലംഭാവം: മൊഗ്രാലിൽ കാൽനടയാത്ര ദുഷ്കരം; ഹൈക്കോടതി ഉത്തരവിനും പുല്ലുവില

മൊഗ്രാൽ: (KasargodVartha) ദേശീയപാത നിർമ്മാണത്തിലെ ഗുരുതരമായ അപാകതകൾ നാട്ടുകാർ തുടർച്ചയായി ചൂണ്ടിക്കാണിച്ചിട്ടും അധികാരികൾ നിസ്സംഗത പാലിക്കുന്നത് മൊഗ്രാലിലെ കാൽനടയാത്രക്കാർക്കും സമീപവാസികൾക്കും ദുരിതമയമായ അവസ്ഥ സൃഷ്ടിക്കുന്നു. 

ആദ്യം പൂർത്തിയാക്കേണ്ടിയിരുന്ന ഓവുചാലുകളുടെയും നടപ്പാതയുടെയും നിർമ്മാണം അവസാന ഘട്ടത്തിലേക്ക് മാറ്റിവെച്ചത് മഴക്കാലത്ത് വലിയ ദുരിതങ്ങൾക്ക് കാരണമായി. പലയിടങ്ങളിലും ഓവുചാലുകളില്ലാത്തതും നടപ്പാതയുടെ അഭാവവും ദുരിതത്തിന് ആക്കം കൂട്ടി. ശക്തമായ മഴയിൽ ദേശീയപാതയുടെ സമീപപ്രദേശങ്ങളിലെല്ലാം വെള്ളക്കെട്ട് രൂക്ഷമാവുകയാണ്.

മൊഗ്രാൽ ലീഗ് ഓഫീസ് മുതൽ മുഹിയദ്ദീൻ ജുമാ മസ്ജിദ് വരെയുള്ള 500 മീറ്റർ ദൂരത്തിൽ ഇതുവരെ നടപ്പാതയുടെ നിർമ്മാണം പൂർത്തിയായിട്ടില്ല. ജൂൺ മൂന്നിന് സ്കൂളുകൾ തുറക്കാനിരിക്കെ, മൊഗ്രാൽ ടൗണിൽ നടപ്പാത ഇല്ലാത്തത് നൂറുകണക്കിന് വിദ്യാർത്ഥികൾക്ക് ദുരിതമാകും. ഇവർക്ക് സ്കൂളിലെത്താൻ സർവീസ് റോഡിലൂടെ നടന്നുപോകേണ്ട ഗതികേടാണ്. ഇത് രക്ഷിതാക്കളുടെ ആശങ്ക വർദ്ധിപ്പിക്കുന്നു.

നടപ്പാത നിർമ്മാണത്തിൽ കഴിഞ്ഞ വർഷം ഹൈക്കോടതി പോലും ഇടപെട്ട് ജനങ്ങൾക്ക് നടന്നുപോകാനുള്ള അവകാശം നിഷേധിക്കരുതെന്ന് നിർമ്മാണ കമ്പനി അധികൃതർക്ക് നിർദ്ദേശം നൽകിയിരുന്നു. എന്നിട്ടും അധികൃതർ ഈ വിഷയത്തിൽ ‘മെല്ലെപ്പോക്ക്’ നയമാണ് സ്വീകരിക്കുന്നത്. 

മൊഗ്രാൽ ടൗണിൽ നടപ്പാത നിർമ്മാണം ആരംഭിച്ചിട്ടുപോലുമില്ല. നിർമ്മാണം തുടങ്ങിയ സ്ഥലങ്ങളിലാകട്ടെ, അത് പാതിവഴിയിലാണ്. പലയിടങ്ങളിലും നടപ്പാതയ്ക്ക് ആവശ്യമായ സ്ഥലസൗകര്യമില്ലാത്തതും പ്രശ്നങ്ങൾക്ക് കാരണമാകുന്നു. ഇവിടെയെല്ലാം ‘ഒപ്പിക്കൽ’ രീതിയിലുള്ള നിർമ്മാണമാണ് നടക്കുന്നത്.

കഴിഞ്ഞ വർഷം സന്നദ്ധ സംഘടനാ പ്രവർത്തകർ നിർമ്മാണ കമ്പനി അധികൃതർക്ക് നൽകിയ പരാതികളും നിവേദനങ്ങളും വേണ്ടവിധം പരിഗണിക്കാത്തതാണ് ഇപ്പോൾ നടപ്പാത, ഓവുചാൽ വിഷയങ്ങളിൽ സമീപവാസികൾക്കും വിദ്യാർത്ഥികൾ ഉൾപ്പെടെയുള്ള കാൽനടയാത്രക്കാർക്കും ദുരിതമുണ്ടാക്കുന്നത്. നടപ്പാത നിർമ്മാണം അടിയന്തരമായി പൂർത്തിയാക്കാൻ ബന്ധപ്പെട്ടവർ തയ്യാറാകണമെന്ന് നാട്ടുകാർ ആവശ്യപ്പെടുന്നു.

ഈ വാർത്ത ഷെയർ ചെയ്യുക, നിങ്ങളുടെ അഭിപ്രായങ്ങൾ രേഖപ്പെടുത്തുക! 

Article Summary: Mogral lacks footpaths due to flawed road construction, causing hardship for students before school reopening.

#Mogral, #FootpathIssue, #StudentSafety, #RoadConstruction, #KeralaNews, #PublicGrievance