മൊഗ്രാൽ കണ്ടത്തിൽ പള്ളിക്കുളത്തിൽ ആരവമൊതുങ്ങി; എം എസ് മുഹമ്മദ് കുഞ്ഞി ചികിത്സയിൽ, നീന്തൽ പരിശീലനം മുടങ്ങി

മൊഗ്രാൽ: (KasargodVartha) മൂന്നര പതിറ്റാണ്ടായി മൊഗ്രാൽ കണ്ടത്തിൽ പള്ളിക്കുളത്തിൽ സൗജന്യ നീന്തൽ പരിശീലനം നൽകി വന്ന നീന്തൽ വിദഗ്ധൻ എം.എസ്. മുഹമ്മദ് കുഞ്ഞിക്ക് ഈ വർഷം പരിശീലനം നടത്താൻ കഴിയില്ല. 

കഴിഞ്ഞ മാസം മാമ്പഴം പറിക്കുന്നതിനിടെ കാൽവഴുതി വീണ് ഗുരുതരമായി പരിക്കേറ്റതിനെത്തുടർന്ന് ചികിത്സയിലായിരുന്ന അദ്ദേഹം ഇപ്പോൾ വീട്ടിൽ വിശ്രമത്തിലാണ്. കോവിഡ് മഹാമാരി കാരണം രണ്ട് വർഷം മുടങ്ങിയതിന് ശേഷം ഇത് രണ്ടാം തവണയാണ് മുഹമ്മദ് കുഞ്ഞിയുടെ സൗജന്യ നീന്തൽ പരിശീലനം നിലയ്ക്കുന്നത്.
 

കഴിഞ്ഞ മാസം അവസാനമാണ് മാമ്പഴം പറിക്കുന്നതിനിടെ കാൽ വഴുതി മരച്ചില്ല ഒടിഞ്ഞുവീണ് മുഹമ്മദ് കുഞ്ഞിക്ക് സാരമായ പരിക്കേറ്റത്. ഒരാഴ്ചയോളം മംഗളൂരുവിലെ സ്വകാര്യ ആശുപത്രിയിൽ ചികിത്സയിലായിരുന്ന അദ്ദേഹത്തിന് രണ്ട് സർജറികളും വേണ്ടി വന്നു. 
 

നിലവിൽ വീട്ടിൽ വിശ്രമിക്കുന്നതിനാൽ ഈ വർഷം കുട്ടികൾക്ക് പരിശീലനം നൽകാൻ അദ്ദേഹത്തിന് സാധിക്കില്ല. നിരവധി രക്ഷിതാക്കൾ മുഹമ്മദ് കുഞ്ഞിയെ ഫോണിൽ ബന്ധപ്പെടുന്നുണ്ടെങ്കിലും, തന്റെ ആരോഗ്യനില മോശമാണെന്നും അടുത്ത വർഷം നോക്കാമെന്നും പറഞ്ഞ് അദ്ദേഹം അവരെ മടക്കി അയക്കുകയാണ്.

കഴിഞ്ഞ മൂന്നര പതിറ്റാണ്ടിനിടെ 3000-ത്തിലധികം കുട്ടികൾക്കാണ് എം.എസ്. മുഹമ്മദ് കുഞ്ഞി സൗജന്യമായി നീന്തൽ പരിശീലനം നൽകിയത്. അദ്ദേഹത്തിന്റെ ഈ സേവനം കാരണം ജില്ലയിൽ ഒട്ടാകെ നിരവധി സന്നദ്ധ സംഘടനകൾ അദ്ദേഹത്തെ ആദരിക്കുകയും അനുമോദിക്കുകയും ചെയ്തിട്ടുണ്ട്. മുഹമ്മദ് കുഞ്ഞിക്ക് സർക്കാർ അംഗീകാരം ലഭ്യമാക്കണമെന്ന് ആവശ്യപ്പെട്ട് മൊഗ്രാൽ ദേശീയവേദി സ്പോർട്സ് വകുപ്പ് മന്ത്രി വി. അബ്ദുൽ റഹ്‌മാൻ കാസർകോട് വെച്ച് രണ്ട് പ്രാവശ്യം നിവേദനവും സമർപ്പിച്ചിരുന്നു.
 

മൊഗ്രാൽ ദേശീയവേദിയുടെ സജീവ പ്രവർത്തകനും നിലവിൽ എക്സിക്യൂട്ടീവ് അംഗവുമാണ് എം.എസ്. മുഹമ്മദ് കുഞ്ഞി. ഇശൽ ഗ്രാമത്തിലെ നല്ലൊരു കലാകാരൻ കൂടിയായ അദ്ദേഹത്തിന് ‘അൽ അമീൻ’ എന്ന പേരിൽ ഒരു ദഫ്-കോൽക്കളി സംഘവുമുണ്ട്. 

പരമ്പരാഗത മത്സ്യത്തൊഴിലാളി കൂടിയായ മുഹമ്മദ് കുഞ്ഞി മൊഗ്രാലിൽ കോൺഗ്രസ് യൂണിറ്റ് കമ്മിറ്റിക്ക് അടിത്തറ പാകിയ വ്യക്തികൂടിയാണ്. സ്വന്തം ചെലവിൽ മൊഗ്രാൽ ലീഗ് ഓഫീസിന് സമീപം കോൺഗ്രസ് ഓഫീസ് തുറന്നാണ് അദ്ദേഹം ഇതിന് തുടക്കം കുറിച്ചത്. അതുകൊണ്ടുതന്നെ നാട്ടിൽ എം.എസ്. മുഹമ്മദ് കുഞ്ഞി ‘സകലകലാ വല്ലഭൻ’ എന്നാണ് അറിയപ്പെടുന്നത്.

 

ഈ വാർത്തയെ കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.
 

Summary: Mogral's free swimming coach M.S. Muhammed Kunhi injured, classes halted.

#Mogral, #SwimmingCoach, #MuhammedKunhi, #Kasargod, #CommunityService, #Injury