ട്രാൻസ്ഫോർമറിന് ചുറ്റും മുട്ടോളം വെള്ളം; കരാറുകാരൻ 'മുങ്ങി'യതോടെ സ്കൂൾ റോഡിൽ വിദ്യാർഥികൾക്ക് ദുരിതവും ഭീഷണിയും

കാസർകോട്: (KasargodVartha) കാലവർഷം ശക്തിപ്രാപിച്ചതോടെ പല റോഡുകളിലും വെള്ളക്കെട്ട് രൂക്ഷമാകുകയാണ്. മഴക്കാല പൂർവ ശുചീകരണ പ്രവർത്തനങ്ങളിലെ പാളിച്ചകളും അശാസ്ത്രീയമായ നിർമ്മാണ പ്രവർത്തനങ്ങളുമാണ് ഇതിന് പ്രധാന കാരണം. മൊഗ്രാൽ സ്കൂൾ റോഡിലെ വെള്ളക്കെട്ടിൽ വലഞ്ഞ് വിദ്യാർഥികളും കാൽനടയാത്രക്കാരും വലിയ ദുരിതമാണ് നേരിടുന്നത്. ട്രാൻസ്ഫോർമറിന് ചുറ്റും മുട്ടോളം വെള്ളം കെട്ടിക്കിടക്കുന്നത് ഇതുവഴി നടന്നു പോകുന്ന വിദ്യാർഥികൾക്കും കാൽനടയാത്രക്കാർക്കും വലിയ അപകട ഭീഷണിയാണ് ഉയർത്തുന്നത്. ഏതെങ്കിലും കാരണവശാൽ വൈദ്യുതി ചോർച്ച ഉണ്ടായാൽ വലിയ ദുരന്തമാകും സംഭവിക്കുക എന്നതിനാൽ രക്ഷിതാക്കളും കടുത്ത ഭീതിയിലാണ്.

കരാറുകാരനെ കാണാനില്ലെന്ന് ആക്ഷേപം

സ്കൂൾ റോഡ് നവീകരണത്തിൻ്റെ ഭാഗമായി സൗന്ദര്യവൽക്കരണത്തിന് പൊതുമരാമത്ത് വകുപ്പ് പദ്ധതി ആവിഷ്കരിക്കുകയും ടെൻഡർ വിളിച്ച് കരാർ നൽകുകയും ചെയ്തിരുന്നു. എന്നാൽ മാസങ്ങൾ പിന്നിട്ടിട്ടും കരാർ ഏറ്റെടുത്ത കരാറുകാരനെ ഈ വഴിക്ക് കാണാനില്ലെന്നാണ് നാട്ടുകാർ പറയുന്നത്. പാതിവഴിയിൽ ഉപേക്ഷിച്ച നിർമ്മാണ പ്രവർത്തനങ്ങൾ മഴക്കാലത്ത് നാട്ടുകാർക്ക് ഇരട്ടി ദുരിതമാണ് സമ്മാനിക്കുന്നത്.

പദ്ധതി സമയബന്ധിതമായി പൂർത്തിയാക്കിയിരുന്നുവെങ്കിൽ നിലവിലെ വെള്ളക്കെട്ട് പൂർണ്ണമായും ഒഴിവാക്കാമായിരുന്നുവെന്ന് മൊഗ്രാൽ സ്കൂൾ പിടിഎ ഭാരവാഹികളും മൊഗ്രാൽ ദേശീയവേദി പ്രവർത്തകരും പറയുന്നു. ദേശീയവേദി ഭാരവാഹികൾ ഈ വിവരം എ കെ എം അഷ്റഫ് എംഎൽഎയുടെ ശ്രദ്ധയിലും പെടുത്തിയിരുന്നു. വിദ്യാർഥികളുടെ സുരക്ഷയുമായി ബന്ധപ്പെട്ട വിഷയമായിട്ടും അധികൃതരുടെ ഭാഗത്തുനിന്നും കാര്യക്ഷമമായ ഇടപെടലുകൾ ഉണ്ടാകുന്നില്ലെന്ന വിമർശനവും ശക്തമാണ്.

നിർദേശങ്ങൾക്ക് പുല്ലുവില

ഏതാനും ദിവസം മുമ്പ് മൊഗ്രാൽ ദേശീയവേദി പ്രവർത്തകർ പിഡബ്ല്യുഡി അസിസ്റ്റൻ്റ് എൻജിനീയറെ നേരിൽ കണ്ട് കാര്യങ്ങൾ ബോധിപ്പിച്ചിരുന്നു. തുടർന്ന് ഉടൻ ജോലികൾ പൂർത്തിയാക്കാൻ കരാറുകാരന് അസിസ്റ്റൻ്റ് എൻജിനീയർ നിർദേശവും നൽകിയിരുന്നു. റോഡുകളിലെ വെള്ളക്കെട്ട് ഒഴിവാക്കാൻ ജില്ലയുടെ ചുമതലയുള്ള മന്ത്രിമാരുടെയും ജില്ലാ ഭരണകൂടത്തിൻ്റെയും ജനപ്രതിനിധികളുടെയും ആർഡിഒയുടെയും നിർദേശങ്ങളൊന്നും കരാറുകാർ ഗൗരവത്തോടെ ചെവിക്കൊണ്ടില്ല എന്നത് ശരിവെക്കുന്നതാണ് മൊഗ്രാൽ സ്കൂൾ റോഡിലെ ഇപ്പോഴത്തെ വെള്ളക്കെട്ട്. ഉന്നത ഉദ്യോഗസ്ഥരുടെയും ജനപ്രതിനിധികളുടെയും ഉത്തരവുകൾക്ക് പോലും കരാറുകാർ യാതൊരു വിലയും കൽപ്പിക്കുന്നില്ലെന്നതിൻ്റെ തെളിവാണിത്.

വെള്ളക്കെട്ട് മറികടക്കാനുള്ള വാഹനങ്ങളുടെയും കാൽനടയാത്രക്കാരുടെയും ശ്രമത്തിനിടെ സ്കൂൾ റോഡിൽ ഗതാഗത തടസ്സത്തിനും ഇത് കാരണമാക്കുന്നുണ്ട്. ട്രാൻസ്ഫോർമറിന് ചുറ്റും വെള്ളം കെട്ടിക്കിടക്കുന്നത് തന്നെയാണ് നാട്ടുകാരെ ഏറ്റവും കൂടുതൽ ആശങ്കപ്പെടുത്തുന്നത്. അടിയന്തരമായി അധികൃതർ ഇടപെട്ട് ശാശ്വതമായ പരിഹാരം കണ്ടില്ലെങ്കിൽ ശക്തമായ പ്രതിഷേധ പരിപാടികളിലേക്ക് കടക്കാനാണ് നാട്ടുകാരുടെ തീരുമാനം. 

നാട്ടുകാരുടെ സുരക്ഷയെ ബാധിക്കുന്ന ഈ വാർത്ത നിങ്ങളുടെ സുഹൃത്തുക്കൾക്കും പങ്കുവെക്കുക. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: The incomplete PWD road renovation project has caused severe waterlogging around a transformer on Mogral School Road, posing an electrocution threat to students and pedestrians. The contractor is reportedly ignoring orders from authorities, including the Assistant Engineer and local MLA.

#KeralaNews #PublicSafety #MonsoonIssues #RoadDevelopment #Waterlogging #KasaragodNews #AparnaNews