മൊഗ്രാൽ സ്കൂൾ റോഡ്: വിദ്യാർത്ഥികൾ ദുരിതത്തിൽ, അധികൃതർ നിസ്സംഗതയിൽ

മൊഗ്രാൽ: (KasargodVartha) സ്കൂൾ തുറക്കാൻ ദിവസങ്ങൾ മാത്രം ബാക്കിനിൽക്കെ, മൊഗ്രാൽ വൊക്കേഷണൽ ഹയർസെക്കൻഡറി സ്കൂളിന് സമീപത്തെ മൊഗ്രാൽ-പേരാൽ പിഡബ്ല്യുഡി റോഡ് വിദ്യാർത്ഥികൾക്ക് ദുരിതമായി മാറാൻ സാധ്യത. 

റോഡിന്റെ ഒരു ഭാഗം തകർന്ന് മഴവെള്ളം കെട്ടി ചളിക്കുളമായി കിടക്കുന്നത് വിദ്യാർത്ഥികളുടെ യാത്രക്ക് വലിയ ബുദ്ധിമുട്ടുണ്ടാക്കും. പുതിയ അധ്യയന വർഷം ആരംഭിക്കുന്നതിന് മുമ്പ് റോഡ് കോൺക്രീറ്റ് ചെയ്ത് ഗതാഗതയോഗ്യമാക്കണമെന്ന സ്കൂൾ പിടിഎ കമ്മിറ്റിയുടെയും വിവിധ സംഘടനകളുടെയും ആവശ്യം അധികൃതർ അവഗണിക്കുകയാണെന്ന് പരാതിയുണ്ട്.

ജില്ലാ പഞ്ചായത്ത് മുൻപ് സ്കൂൾ റോഡ് സൗന്ദര്യവൽക്കരണത്തിനായി 10 ലക്ഷം രൂപ അനുവദിച്ചിരുന്നു. ഇതിലൂടെ ചുറ്റുമതിൽ, കൈവരികൾ, നടപ്പാത എന്നിവ നിർമ്മിച്ചെങ്കിലും, റോഡിന്റെ ഇടതുവശത്തുള്ള സ്ഥലം കാടുപിടിച്ച് ചളിവെള്ളം കെട്ടിക്കിടക്കുന്നത് വിദ്യാർത്ഥികൾക്കും കാൽനട യാത്രക്കാർക്കും ദുരിതമുണ്ടാക്കുന്നു. 

ഈ ഭാഗം മുതൽ യൂനാനി ഡിസ്പെൻസറി വരെ ഇൻ്റർലോക്ക് പാകി റോഡിന് സൗന്ദര്യവൽക്കരണം നടത്താൻ ഫണ്ട് അനുവദിക്കണമെന്ന് ആവശ്യപ്പെട്ട് മഞ്ചേശ്വരം എംഎൽഎ എ.കെ.എം അഷ്റഫിന് മൊഗ്രാൽ പിടിഎ കമ്മിറ്റിയും, മൊഗ്രാൽ ദേശീയ വേദിയും കഴിഞ്ഞ വർഷം നിവേദനം നൽകിയിരുന്നു. എന്നാൽ ഇതിന് ഇതുവരെ ഫണ്ട് അനുവദിച്ചിട്ടില്ല.

അതേസമയം, കുമ്പള ഗ്രാമപഞ്ചായത്ത് 2024-25 വർഷത്തെ വാർഷിക പദ്ധതിയിൽ സൗന്ദര്യവൽക്കരണ പദ്ധതി ഉൾപ്പെടുത്തുമെന്ന് വാർഡ് മെമ്പറും, കുമ്പള ഗ്രാമപഞ്ചായത്ത് വൈസ് പ്രസിഡണ്ടുമായ നാസർ മൊഗ്രാൽ അറിയിച്ചിരുന്നു. എന്നാൽ ഇതിനും തുടർ നടപടികൾ ഉണ്ടായിട്ടില്ല. 

പിഡബ്ല്യുഡിയുടെ അധീനതയിലുള്ള റോഡായിട്ടും ആയിരക്കണക്കിന് വിദ്യാർത്ഥികൾ ആശ്രയിക്കുന്ന ഈ സ്കൂൾ റോഡ് തകർന്നുകിടക്കുന്നത് അധികൃതരുടെ ഭാഗത്ത് നിന്നുള്ള ഗുരുതരമായ അനാസ്ഥയാണെന്നും, ഇത് വലിയ പ്രതിഷേധത്തിന് ഇടയാക്കുമെന്നും നാട്ടുകാർ പറയുന്നു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: The Mogral school road in Kasaragod is in disrepair, causing hardship for students with stagnant rainwater. Despite appeals from PTA and local organizations, authorities have neglected repairs, sparking public outrage. 

#Mogral #SchoolRoad #Kasaragod #StudentHardship #RoadSafety #KeralaNews