സ്കൂൾ ഗ്രൗണ്ടിൽ സ്ഥാപിച്ച ഇരുമ്പ് തൂൺ തകർന്നു വീണു; ഒഴിവായത് വൻ ദുരന്തം

മൊഗ്രാൽ: (KasargodVartha) മൊഗ്രാൽ സ്കൂൾ മൈതാനത്ത് ജില്ലാ പഞ്ചായത്ത് കഴിഞ്ഞ വർഷം മതിലിനോട് ചേർന്ന് നെറ്റ് വല സ്ഥാപിക്കാൻ നിർമ്മിച്ച ഇരുമ്പ് തൂണുകൾ കാറ്റിൽ തകർന്നു വീണു. ശനിയാഴ്ചയായതിനാലും സ്കൂൾ അവധിയായതിനാലും വലിയൊരു ദുരന്തമാണ് ഒഴിവായത്. 

200 മീറ്റർ നീളത്തിലും 100 മീറ്റർ ഉയരത്തിലുമായി നിർമ്മിച്ച ഈ തൂണുകൾ ഫുട്ബോൾ കളിക്കിടെ പന്തുകൾ പുറത്തേക്ക് പോകാതിരിക്കാൻ നെറ്റ് സ്ഥാപിക്കുന്നതിനായുള്ളതായിരുന്നു. തൂണുകൾ മൈതാനത്തിനകത്തേക്ക് തകർന്ന് വീണതിനാൽ സ്കൂൾ റോഡിലൂടെ പോയിരുന്ന വാഹനങ്ങളും കാൽനടയാത്രക്കാരും അപകടത്തിൽ നിന്ന് രക്ഷപ്പെട്ടു.

കാസർകോട് ജില്ലാ പഞ്ചായത്ത് കഴിഞ്ഞ വർഷം പത്ത് ലക്ഷം രൂപ ചിലവഴിച്ചാണ് സ്കൂൾ മതിൽ, കമാനം എന്നിവയുടെ നിർമ്മാണത്തോടൊപ്പം ഇരുമ്പ് തൂണുകളും സ്ഥാപിച്ചത്. എന്നാൽ തൂണുകളിൽ ഇതുവരെ നെറ്റ് വലകൾ സ്ഥാപിച്ചിട്ടുണ്ടായിരുന്നില്ല. 

അടുത്തിടെ നടന്ന റവന്യൂ ജില്ലാ സ്കൂൾ കലോത്സവത്തോടനുബന്ധിച്ച് ഈ തൂണുകളിൽ നിറയെ ഫ്ലക്സ് ബോർഡുകൾ സ്ഥാപിച്ചിരുന്നു. ഇതിന്റെ അധികഭാരമാണ് തൂണുകൾ ഒന്നടങ്കം ഒടിഞ്ഞു വീഴാൻ കാരണമായതെന്ന് പറയുന്നു.

ഹൈസ്കൂൾ വിഭാഗം വിദ്യാർത്ഥികൾക്ക് ക്ലാസ് ഉണ്ടായിരുന്ന സമയത്താണ് അപകടം നടന്നത്. എന്നാൽ വിദ്യാർത്ഥികൾ ക്ലാസ്സിനകത്തായിരുന്നതിനാൽ വൻ ദുരന്തം ഒഴിവായി. തൂണുകൾ മറുഭാഗത്തുള്ള സ്കൂൾ റോഡിലേക്ക് വീഴാതിരുന്നതും മറ്റൊരു അപകടം ഒഴിവാക്കി.

സ്ഥാപിച്ച ഇരുമ്പ് തൂണുകൾക്ക് ബലക്കുറവുണ്ടെന്ന് നേരത്തെ തന്നെ പരാതികൾ ഉയർന്നിരുന്നു. അതുകൊണ്ടാണ് ഇതുവരെ നെറ്റ് വല സ്ഥാപിക്കാതിരുന്നത് എന്നും ആരോപണമുണ്ട്. തകർന്ന തൂണുകൾ നീക്കം ചെയ്ത് കൂടുതൽ ബലമുള്ള തൂണുകളും നെറ്റ് വലയും സ്ഥാപിക്കാൻ അധികൃതർ അടിയന്തിര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം കമൻ്റ് ചെയ്യൂ  

Article Summary: Iron poles at Mogral school ground collapsed, luckily no one was injured as schools were closed for students on ground.

#Mogral #Kasargod #SchoolAccident #SafetyAlert #IronPoleCollapse #KeralaNews