മൊഗ്രാലിലെ കോൺക്രീറ്റ് റോഡുകൾ തകർത്ത് കുടിവെള്ള പൈപ്പ്; കുഴികളിൽ വീണ് വാഹനങ്ങൾക്ക് കേടുപാട്, നാട്ടുകാർ പരാതിയുമായി

മൊഗ്രാൽ: (KasargodVartha) കുമ്പള ഗ്രാമപഞ്ചായത്തിന് കീഴിലുള്ള മൊഗ്രാലിലെ നിരവധി കോൺക്രീറ്റ്, ടാറിങ് ലിങ്ക് റോഡുകൾ കുടിവെള്ള പൈപ്പുകൾ സ്ഥാപിക്കാനായി തകർക്കുകയും, എന്നാൽ ഭാഗികമായി മാത്രം മണ്ണിട്ട് മൂടി കരാറുകാരൻ സ്ഥലം വിടുകയും ചെയ്തതിനെതിരെ നാട്ടുകാർ പോലീസിൽ പരാതി നൽകി.

പഴയതും പുതിയതുമായ നിരവധി റോഡുകളാണ് ഇത്തരത്തിൽ കുഴിയെടുത്ത ശേഷം പൂർവ്വസ്ഥിതിയിലാക്കാതെ ഉപേക്ഷിച്ചത്. ഇത്തരം റോഡുകളിലെ കുഴികളിൽ വാഹനങ്ങൾ വീണ് കേടുപാടുകൾ സംഭവിക്കുന്നത് നിത്യസംഭവമായതോടെയാണ് നാട്ടുകാർ പോലീസിനെ സമീപിച്ചത്. 

കാറിന് വലിയ കേടുപാടുകൾ സംഭവിച്ച മൊഗ്രാൽ ദേശീയവേദി ആക്ടിംഗ് പ്രസിഡൻ്റ് എം.എ. അബൂബക്കർ സിദ്ദീഖ് ഇന്നലെ കുമ്പള പോലീസ് സ്റ്റേഷനിലെത്തി പരാതി നൽകി. ഗോവയിൽ നിന്നുള്ള നൂറുദ്ദീനാണ് ഈ പ്രവൃത്തിയുടെ കരാറുകാരൻ.

കേടുപാടുകൾ സംഭവിച്ച കാറുകൾക്ക് നഷ്ടപരിഹാരം വേണമെന്നും, തകർത്ത റോഡുകൾ കോൺക്രീറ്റ് ചെയ്തോ, ടാറിങ് ചെയ്തോ പഴയതുപോലെ ഗതാഗത യോഗ്യമാക്കണമെന്നുമാണ് അബൂബക്കർ സിദ്ദീഖ് പരാതിയിൽ ആവശ്യപ്പെട്ടിട്ടുള്ളത്.

കുടിവെള്ള പൈപ്പുകൾ സ്ഥാപിക്കുന്നതിനും ടെലികോം കേബിളുകൾ സ്ഥാപിക്കുന്നതിനും റോഡ് തകർത്ത് കുഴിയെടുക്കുന്നവർ അത് പൂർവ്വസ്ഥിതിയിലാക്കി നൽകണമെന്ന് നേരത്തെ ജില്ലാ കലക്ടറും ഒരു പരാതിയിന്മേൽ തീർപ്പുണ്ടാക്കിയിരുന്നു. എന്നിട്ടും കരാറുകാരുടെ അലംഭാവം തുടരുകയാണ്. 

തകർത്ത റോഡുകൾ പുനഃസ്ഥാപിച്ച് നൽകാൻ കരാറുകാരന് നോട്ടീസ് നൽകുമെന്ന് കുമ്പള ഗ്രാമപഞ്ചായത്ത് വൈസ് പ്രസിഡൻ്റ് നാസർ മൊഗ്രാലും അറിയിച്ചിട്ടുണ്ട്.

മൊഗ്രാലിൽ ഇതിനുമുമ്പും നിരവധി തവണ വിവിധ ഭാഗങ്ങളിൽ റോഡുകൾ കിളച്ച് കുടിവെള്ള പൈപ്പുകൾ സ്ഥാപിച്ചിരുന്നെങ്കിലും ഒരു തുള്ളി വെള്ളം പോലും നാട്ടുകാർക്ക് പ്രസ്തുത പൈപ്പുകളിലൂടെ ലഭിച്ചിട്ടില്ല. 

നാട്ടുകാരുടെ കാത്തിരിപ്പ് വെറുതെയാകുകയായിരുന്നു. മുമ്പ് സ്ഥാപിച്ച എല്ലാ പൈപ്പുകളും മണ്ണിനോട് ചേർന്ന് നശിച്ചുപോവുകയും ചെയ്തു. വീണ്ടും വീണ്ടും പൈപ്പുകൾ സ്ഥാപിച്ച് കരാറുകാർക്ക് ലാഭം ഉണ്ടാക്കുന്ന ഈ നടപടി പുനഃപരിശോധിക്കണമെന്ന് മൊഗ്രാൽ ദേശീയവേദി ആവശ്യപ്പെട്ടു.

മൊഗ്രാലിലെ റോഡുകളുടെ ഈ അവസ്ഥയെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: Mogral roads damaged by pipe laying, contractor abandons work, causing vehicle damage.

#Mogral #RoadDamage #Potholes #Kasaragod #PublicComplaint #ContractorNegligence