മൊഗ്രാൽപുത്തൂർ സർവീസ് റോഡ് പുഴയായി: ദുരിതത്തിൽ വ്യാപാരികളും കാൽനടയാത്രക്കാരും

മൊഗ്രാൽപുത്തൂർ: (KasargodVartha) കാലവർഷം കനത്തതോടെ ദുരിതങ്ങൾ അവസാനിക്കുന്നില്ല. റെഡ് അലർട്ട് തുടരുന്ന കാസർകോട് ജില്ലയുടെ വിവിധ ഭാഗങ്ങളിൽ കനത്ത മഴ ജനജീവിതം ദുസ്സഹമാക്കി. വ്യാപകമായ വെള്ളക്കെട്ട് നാട്ടുകാർക്ക് വലിയ ദുരിതമായി മാറിയിരിക്കുകയാണ്.

മൊഗ്രാൽപുത്തൂരിൽ സർവീസ് റോഡ് ഒരു തോടായി മാറിയത് പ്രദേശവാസികൾക്കും കാൽനടയാത്രക്കാർക്കും വ്യാപാരികൾക്കും ദുരിതമായി. ഇറക്കമുള്ള പ്രദേശമായതിനാൽ മഴവെള്ളം ഒഴുകിപ്പോകാൻ ശരിയായ സംവിധാനമില്ലാത്തതാണ് ഈ വെള്ളക്കെട്ടിന് പ്രധാന കാരണം. 

ദേശീയപാതയിൽ നിന്ന് വരുന്ന മഴവെള്ളം സർവീസ് റോഡിലേക്കാണ് ഒഴുകിയെത്തുന്നത്. സർവീസ് റോഡിൽ നിർമ്മിച്ച ഓവുചാൽ സംവിധാനം അശാസ്ത്രീയമായതാണ് നിലവിലെ അവസ്ഥയ്ക്ക് ആക്കം കൂട്ടിയത്. വെള്ളം തൊട്ടടുത്ത മൊഗ്രാൽ പുഴയിലേക്ക് ഒഴുകിപ്പോകാനുള്ള സംവിധാനം ഒരുക്കാത്തതും റോഡ് തോടായി മാറാൻ കാരണമായി.

ഓട്ടോറിക്ഷകൾക്കും ഇരുചക്രവാഹനങ്ങൾക്കും ഇതുവഴി സഞ്ചരിക്കാൻ കഴിയാത്തവിധം വെള്ളക്കെട്ട് രൂക്ഷമാണ്. ഈ വെള്ളം തൊട്ടടുത്ത മൊഗ്രാൽപുത്തൂർ ടൗൺ അണ്ടർപാസിലേക്കും വ്യാപിച്ചതോടെ നാട്ടുകാരുടെ ദുരിതം ഇരട്ടിയായി.

മൊഗ്രാൽപുത്തൂരിലെ വെള്ളക്കെട്ടിന് പരിഹാരം കാണാൻ എന്ത് നടപടികളാണ് സ്വീകരിക്കേണ്ടത്? നിങ്ങളുടെ അഭിപ്രായങ്ങൾ പങ്കുവെക്കുക, 

Article Summary: Mogral Puthur service road waterlogged due to heavy rains, affecting locals.

#MogralPuthur, #KeralaFloods, #MonsoonMishap, #KasaragodRains, #Waterlogging, #PublicGrievance