മൊഗ്രാൽപുത്തൂരിൽ മീൻ ലോറി മറിഞ്ഞു; ദേശീയ പാതയിൽ ഗതാഗതം തടസ്സപ്പെട്ടത് 2 മണിക്കൂർ
● കോഴിക്കോട് നിന്ന് മംഗളൂരു ഉള്ളാളിലേക്ക് പോവുകയായിരുന്ന മീൻ ലോറിയാണ് മറിഞ്ഞത്.
● ലോറിയുടെ ടയർ പൊട്ടി നിയന്ത്രണം വിട്ടതാണ് അപകട കാരണം.
● വടകര സ്വദേശി വിജിൻ കുമാർ അത്ഭുതകരമായി പരിക്കുകൾ ഇല്ലാതെ രക്ഷപ്പെട്ടു.
● കാസർകോട് അഗ്നിരക്ഷാസേനയുടെ നേതൃത്വത്തിൽ ലോറി നീക്കം ചെയ്തു.
● റോഡിൽ പരന്ന ഓയിലും മീൻ വെള്ളവും അഗ്നിരക്ഷാസേനാംഗങ്ങൾ വൃത്തിയാക്കി.
കാസർകോട്: (KasargodVartha) മൊഗ്രാൽപുത്തൂരിൽ ദേശീയ പാതയിൽ മീൻ കയറ്റി പോവുകയായിരുന്ന ലോറി മറിഞ്ഞുണ്ടായ അപകടത്തെ തുടർന്ന് വ്യാഴാഴ്ച (13.11.2025) രാത്രി ഗതാഗതം മണിക്കൂറുകളോളം തടസപ്പെട്ടു. കോഴിക്കോട് നിന്ന് മീൻ കയറ്റി മംഗളൂരു ഉള്ളാളിലെ ഒരു ഫാക്ടറിയിലേക്ക് പോകുകയായിരുന്ന ലോറിയുടെ ടയർ പൊട്ടി നിയന്ത്രണം വിട്ട് റോഡിന് കുറുകെ മറിയുകയായിരുന്നു. രാത്രി എട്ടു മണിയോടെയാണ് അപകടം സംഭവിച്ചത്. ലോറി ഓടിച്ച വടകര സ്വദേശി വിജിൻ കുമാർ (35) അപകടത്തിൽ നിന്ന് അത്ഭുതകരമായി പരിക്കുകൾ ഒന്നുമില്ലാതെ രക്ഷപ്പെട്ടു.
അപകടശബ്ദം കേട്ട് ഓടിക്കൂടിയ പരിസരവാസികൾ ഉടൻ തന്നെ കാസർകോട് അഗ്നിരക്ഷാസേനയെ വിവരം അറിയിച്ചു. തുടർന്ന് സീനിയർ ഫയർ ആൻഡ് റെസ്ക്യൂ ഓഫീസർ വി. എൻ. വേണുഗോപാലിൻ്റെ നേതൃത്വത്തിൽ രണ്ട് യൂണിറ്റ് വാഹനങ്ങളുമായി സംഘം സ്ഥലത്തെത്തി. മറിഞ്ഞ ലോറിയിലെ മീൻ മറ്റു രണ്ട് വാഹനങ്ങളിലേക്ക് മാറ്റിയ ശേഷം റോഡ് കരാർ കമ്പനിയുടെ ക്രെയിൻ ഉപയോഗിച്ച് ലോറി ഉയർത്തി റോഡരികിലേക്ക് മാറ്റി.
ഈ സംഭവത്തെ തുടർന്ന് ദേശീയ പാതയിലെ ഗതാഗതം രണ്ടുമണിക്കൂർ തടസ്സപ്പെട്ടു. ഗതാഗതം സർവ്വീസ് റോഡിലൂടെ വഴിതിരിച്ചു വിട്ടിരുന്നു. റോഡിൽ ഒഴുകി പരന്ന ഓയിലും മീൻ വെള്ളവും അഗ്നിരക്ഷാസേനാംഗങ്ങൾ സോപ്പുപൊടി വിതറി വെള്ളം പമ്പ് ചെയ്ത് നീക്കം ചെയ്തു. രാത്രി 11 മണിയോടെയാണ് ഗതാഗതം പൂർണമായും പുനഃസ്ഥാപിച്ചത്.
അഗ്നി രക്ഷാസേനയിലെ ഇ. പ്രസീദ്, സി. വി. ഷബിൽകുമാർ, പി. രാജേഷ്, എസ്. അരുൺകുമാർ, കെ. വി. ജിതിൻ കൃഷ്ണൻ, ജെ.ബി. ജിജോ, അതുൽ രവി, ഹോം ഗാർഡുമാരായ പി.വി. രഞ്ജിത്ത്, കെ. സുമേഷ് എന്നിവരും രക്ഷാപ്രവർത്തനത്തിൽ പങ്കെടുത്തു.
ദേശീയ പാതയിലെ ഇത്തരം അപകടങ്ങൾ ഒഴിവാക്കാൻ എന്ത് ചെയ്യണം? നിങ്ങളുടെ അഭിപ്രായം പങ്കുവെക്കുക.
Article Summary: Fish lorry overturned on NH at Mogral Puthur; traffic blocked for two hours.
#MogralPuthur #LorryAccident #NationalHighway #KasaragodNews #TrafficBlock #FireRescue
