മൊഗ്രാൽ കൊപ്പളത്തെ ആരോഗ്യ കേന്ദ്രം: പേരിൽ ആയുഷ്മാൻ, പക്ഷേ ഡോക്ടറില്ല!

മൊഗ്രാൽ: (KasargodVartha) കുമ്പള ഗ്രാമപഞ്ചായത്തിലെ 19-ാം വാർഡിൽ, മൊഗ്രാൽ കൊപ്പളം സിറാജുൽ ഉലൂം മദ്രസ പരിസരത്ത് കഴിഞ്ഞ മൂന്ന് വർഷമായി പ്രവർത്തിക്കുന്ന ആയുഷ്മാൻ ആരോഗ്യ കേന്ദ്രത്തിൽ (ജനകീയ ആരോഗ്യ കേന്ദ്രം) സ്ഥിരമായി ഒരു ഡോക്ടറുടെ സേവനം ലഭ്യമാക്കാത്തതിൽ നാട്ടുകാർക്കിടയിൽ ശക്തമായ പ്രതിഷേധം ഉയരുന്നു. നിലവിൽ കുഞ്ഞുങ്ങൾക്കുള്ള കുത്തിവെപ്പിനായി രണ്ട് ആരോഗ്യപ്രവർത്തകരുടെ സേവനം മാത്രമാണ് ഇവിടെ ലഭ്യം.

ദേശീയപാത വികസനവുമായി ബന്ധപ്പെട്ട് മൊഗ്രാൽ കൊപ്ര ബസാറിലുണ്ടായിരുന്ന ആരോഗ്യ കേന്ദ്രം പൊളിച്ചു മാറ്റിയതോടെയാണ് കൊപ്പളത്ത് താൽക്കാലികമായി ഈ കേന്ദ്രം അനുവദിച്ചത്. നേരത്തെ ഏകാധ്യാപക വിദ്യാലയം പ്രവർത്തിച്ചിരുന്ന കെട്ടിടത്തിലാണ് ഇപ്പോൾ ജനകീയ ആരോഗ്യ കേന്ദ്രം പ്രവർത്തിക്കുന്നത്.

ദേശീയപാത, റെയിൽവേ വികസനം എന്നിവ പടിഞ്ഞാറൻ പ്രദേശത്തുകാരുടെ യാത്രാക്ലേശം വർദ്ധിപ്പിച്ചതിനാൽ, പ്രായമായവർക്കും കുട്ടികൾക്കും അസുഖം വന്നാൽ ആശുപത്രികളിൽ പോകാൻ വലിയ ബുദ്ധിമുട്ടാണ് നേരിടുന്നത്. ഈ സാഹചര്യത്തിൽ കൊപ്പളം ജനകീയ ആരോഗ്യ കേന്ദ്രത്തിൽ സ്ഥിരമായി ഒരു ഡോക്ടറുടെ സേവനം ലഭ്യമാക്കണമെന്ന് നാട്ടുകാരും, കൊപ്പളം സിറാജുൽ ഉലൂം മദ്രസ കമ്മിറ്റിയും നേരത്തെ തന്നെ ബന്ധപ്പെട്ട അധികാരികളോട് നിവേദനം വഴി ആവശ്യപ്പെട്ടിരുന്നു. 

എന്നാൽ, ഇതുവരെ ഒരു നടപടിയുമുണ്ടായില്ലെന്നാണ് നാട്ടുകാരുടെ പ്രധാന പരാതി. കെട്ടിടത്തിൽ ആവശ്യമായ മരുന്നുകളും ഉപകരണങ്ങളും സൂക്ഷിക്കുന്നതിനുള്ള അടിസ്ഥാന സൗകര്യങ്ങൾ ഒരുക്കണമെന്നും നാട്ടുകാർ ആവശ്യപ്പെടുന്നുണ്ട്.

ഈ വിഷയത്തിൽ നിങ്ങളുടെ അഭിപ്രായങ്ങൾ പങ്കുവെക്കുക. കൂടുതൽ ആളുകളിലേക്ക് ഈ വാർത്ത എത്തിക്കാൻ സഹായിക്കുക.

Article Summary: Mogral Koppalam's Ayushman Health Center lacks a permanent doctor, causing public protest.

#Mogral #HealthCenter #PublicProtest #KeralaNews #DoctorShortage #HealthcareCrisis