മൊഗ്രാൽ ജിവിഎച്ച്എസ്എസ്സിൽ ക്ലാസ് റൂം ക്ഷാമത്തിന് നേരിയ ആശ്വാസം; അൺഫിറ്റായ കെട്ടിടം അഞ്ച് ലക്ഷം രൂപ ചെലവഴിച്ച് നന്നാക്കി ഫിറ്റ്നസ് നേടി പിടിഎ

മൊഗ്രാൽ: (KasargodVartha) തദ്ദേശസ്വയംഭരണ സ്ഥാപനത്തിലെ അസിസ്റ്റൻ്റ് എൻജിനീയർമാർ നൽകുന്ന ഫിറ്റ്നസ് സർട്ടിഫിക്കറ്റില്ലാതെ സ്കൂളുകൾ പ്രവർത്തിക്കാൻ പാടില്ലെന്ന സർക്കാർ വ്യവസ്ഥ കർശനമായി നിലനിൽക്കെ, ക്ലാസ് റൂമുകളുടെ അഭാവം പരിഹരിക്കാൻ ഇടപെട്ട് മൊഗ്രാൽ ജിവിഎച്ച്എസ്എസ് പിടിഎ കമ്മിറ്റി. അൺഫിറ്റായ മൂന്ന് ക്ലാസ് റൂമുകൾ ഉള്ള സ്കൂൾ കെട്ടിടം അഞ്ച് ലക്ഷം രൂപ ചെലവഴിച്ച് നന്നാക്കിയാണ് പിടിഎ ഒരു വർഷത്തേക്കുള്ള ഫിറ്റ്നസ് സർട്ടിഫിക്കറ്റ് നേടിയെടുത്തത്. ഇതോടെ സ്കൂളിലെ ക്ലാസ് റൂം ക്ഷാമത്തിന് നേരിയ ആശ്വാസമായി.

അൺഫിറ്റായ കെട്ടിടം

മൊഗ്രാലിലെ രണ്ട് ഓട് മേഞ്ഞ ഹൈസ്കൂൾ കെട്ടിടങ്ങൾക്ക് കഴിഞ്ഞ വർഷം മഴക്കാലത്ത് കുമ്പള ഗ്രാമപഞ്ചായത്ത് അസിസ്റ്റൻ്റ് എൻജിനീയർ വിഭാഗം അൺഫിറ്റ് നൽകി ക്ലാസുകൾ ഒഴിപ്പിച്ചിരുന്നു. മേൽക്കൂരയുടെ അപകടാവസ്ഥയും ചോർച്ചയുമായിരുന്നു കാരണം. 

ഇതോടെ സ്കൂളിൽ ക്ലാസ് റൂമുകളുടെ കുറവ് വന്നത് അധ്യാപകർക്കും വിദ്യാർഥികൾക്കും ഒരുപോലെ വലിയ പ്രയാസമുണ്ടാക്കി. പിന്നീട് ക്ലാസ് ഷിഫ്റ്റ് സമ്പ്രദായം വഴിയുമാണ് കഴിഞ്ഞ അധ്യയന വർഷം പൂർത്തിയാക്കിയത്. ഈ വർഷവും കെട്ടിടത്തിൻ്റെ അഭാവം ചർച്ചയായപ്പോഴാണ് കെട്ടിടത്തിൻ്റെ മേൽക്കൂരയും മറ്റും നന്നാക്കി ഫിറ്റ്നസ് സർട്ടിഫിക്കറ്റ് നേടിയെടുക്കാൻ പിടിഎ തീരുമാനിച്ചത്.

കർശന നിബന്ധനകൾ

അതേസമയം, ഫിറ്റ്നസ് സർട്ടിഫിക്കറ്റ് ലഭിച്ച സ്കൂൾ കെട്ടിടങ്ങളിൽ ഒരു മാസത്തിനകം വിവിധ വകുപ്പുകളിൽ നിന്ന് സുരക്ഷാ സംബന്ധിച്ച സർട്ടിഫിക്കറ്റുകൾ വാങ്ങണമെന്ന നിബന്ധനകളോടെയാണ് അനുമതി നൽകിയിട്ടുള്ളത്. ഫയർഫോഴ്സിൽ നിന്നും ഫയർ സേഫ്റ്റി സർട്ടിഫിക്കറ്റ് ലഭ്യമാക്കണം.

വൈദ്യുതി ഉപകരണങ്ങളുടെയും വൈദ്യുതീകരണത്തിൻ്റെയും സുരക്ഷ സംബന്ധിച്ച് കെഎസ്ഇബിയുടെ സർട്ടിഫിക്കറ്റും വാങ്ങണം. ഒപ്പം എ ഗ്രേഡ് ലൈസൻസ് ഉള്ള വയർമാനെ വിളിച്ച് വൈദ്യുതീകരണം പരിശോധിക്കുകയും വേണം. ഇക്കാര്യങ്ങൾ പാലിച്ചാൽ മാത്രമേ ഫിറ്റ്നസ് സർട്ടിഫിക്കറ്റിന് മൂല്യമുണ്ടാകൂവെന്ന് പ്രത്യേകം സൂചിപ്പിച്ചിട്ടുണ്ട്.

മൈതാനവും കെട്ടിട നിർമ്മാണവും

മൊഗ്രാൽ ഗവൺമെൻ്റ് വൊക്കേഷണൽ ഹയർ സെക്കൻഡറിക്ക് അനുവദിച്ച രണ്ട് ക്ലാസ് റൂമുകൾ നിർമ്മിക്കുന്നതിനുള്ള തടസ്സം ഇതുവരെ മാറിയിട്ടില്ല. സ്കൂൾ മൈതാനം സംരക്ഷിച്ചുവേണം കെട്ടിടങ്ങൾ നിർമ്മിക്കാൻ എന്ന നാട്ടുകാരുടെയും കായിക പ്രേമികളുടെയും നിർദ്ദേശമാണ് തടസ്സമായി നിൽക്കുന്നത്. 

മറ്റൊരു സ്ഥലം കണ്ടെത്താൻ സ്കൂൾ അധികൃതരും പിടിഎയും ശ്രമിക്കുന്നുണ്ടെങ്കിലും തീരുമാനമായിട്ടില്ല. അതിനാൽ തന്നെ ഹയർ സെക്കൻഡറി വിഭാഗത്തിൽ ലാബിനും മറ്റുമായി സ്ഥലസൗകര്യത്തിൻ്റെ അപര്യാപ്തത വലിയ പ്രതിസന്ധി സൃഷ്ടിക്കുന്നുണ്ട്. ഈ വിവരം ഹയർ സെക്കൻഡറി വിഭാഗം പ്രിൻസിപ്പാൾ ബന്ധപ്പെട്ട അധികൃതരെ അറിയിച്ചിട്ടുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: The PTA committee of Mogral GVHSS spent ₹5 lakhs to repair an 'unfit' school building, securing a one-year fitness certificate and relieving the severe classroom shortage. However, the construction of two newly allocated classrooms remains stalled due to locals protesting to protect the school playground.

#MogralGVHSS #KasaragodNews #SchoolFitness #KeralaEducation #PTAInitiative #MalayalamNews