മൊഗ്രാൽ ‘ലീഗ് ഓഫീസ്’ ബസ് സ്റ്റോപ്പ്‌ വിവാദം: പേര് മാറ്റിയതിൽ പ്രതിഷേധം ശക്തം, വോട്ട് ബഹിഷ്കരിക്കാൻ ഒരുങ്ങി 17, 18 വാർഡുകളിലെ ലീഗ് പ്രവർത്തകർ

മൊഗ്രാൽ: (KasargodVartha) കാലങ്ങളായി ‘ലീഗ് ഓഫീസ്’ എന്ന പേരിൽ അറിയപ്പെട്ടിരുന്ന മൊഗ്രാൽ ജംഗ്ഷനിലെ ബസ് സ്റ്റോപ്പിന്റെ പേര് പുതിയ ഹൈവേ വികസനത്തിന് ശേഷം മാറ്റിയത് വലിയ വിവാദങ്ങൾക്ക് വഴിവെക്കുന്നു. അന്തരിച്ച ഒരു ലീഗ് നേതാവിൻ്റെ പേര് ബസ് സ്റ്റോപ്പിന് നൽകിയതാണ് ലീഗ് പ്രവർത്തകർക്കിടയിലും, നാട്ടുകാർക്കിടയിലും പ്രതിഷേധത്തിന് കാരണമായത്.

പ്രതിഷേധം ശക്തമായപ്പോൾ ആദ്യം സ്ഥാപിച്ച പേരുള്ള ബോർഡ് അധികൃതർ എടുത്തുമാറ്റിയെങ്കിലും, വീണ്ടും അതേ പേരിൽ ബോർഡ് സ്ഥാപിച്ചത് പ്രകോപനം വർദ്ധിപ്പിച്ചു. കെകെ പുറം, മൊഗ്രാൽ കടവത്ത്, മീത്തൽ വളപ്പ് തുടങ്ങിയ പ്രദേശങ്ങളിലെ ആളുകൾക്ക് ഒരു ലാൻഡ്മാർക്ക് കൂടിയായ 'ലീഗ് ഓഫീസ്' എന്ന പേര് നിലനിർത്തണമെന്ന് ആവശ്യപ്പെട്ടാണ് 17, 18 വാർഡുകളിലെ ലീഗ് പ്രവർത്തകർ ശക്തമായ നിലപാടെടുക്കാൻ തീരുമാനിച്ചത്. ഇതിനായി അടുത്ത ആഴ്ച വിപുലമായ യോഗം ചേരാനും തീരുമാനിച്ചിട്ടുണ്ട്.

വിഷയം ഇത്ര ഗൗരവമായിട്ടും മഞ്ചേശ്വരം എംഎൽഎ ഇടപെടാത്തതും, സ്ഥലം സന്ദർശിക്കാത്തതും അദ്ദേഹത്തിനെതിരേയും പ്രതിഷേധത്തിന് കാരണമായിട്ടുണ്ട്.

ബസ് സ്റ്റോപ്പിന്റെ പേര് മാറ്റിയതുമായി ബന്ധപ്പെട്ട് കുമ്പള ഗ്രാമപഞ്ചായത്തിനെ സമീപിച്ചപ്പോൾ റോഡ് നിർമാണക്കമ്പനിയായ യുഎൽസിസി ആണ് ഇതിന് പിന്നിലെന്ന് അവർ പറയുന്നു. എന്നാൽ യുഎൽസിസിയെ സമീപിച്ചപ്പോൾ പഞ്ചായത്തിൻ്റെ നിർദ്ദേശപ്രകാരമാണ് പേര് നൽകിയതെന്നാണ് അവരുടെ വിശദീകരണം. 

ഇതേ നിലപാടാണ് എംഎൽഎയും സ്വീകരിക്കുന്നത്. എല്ലാവരും പരസ്പരം പഴിചാരുമ്പോൾ, ഇതിന് പിന്നിൽ പ്രവർത്തിച്ച യഥാർത്ഥ വ്യക്തിയെ കണ്ടെത്തി ബസ് സ്റ്റോപ്പിന് പഴയ പേര് തിരികെ നൽകാൻ ഏതറ്റം വരെയും പോരാടാൻ തയ്യാറാണെന്നാണ് ലീഗ് പ്രവർത്തകർ പറയുന്നത്. കഴിഞ്ഞ തവണ 18-ാം വാർഡിൽ മുസ്ലിം ലീഗിനുണ്ടായ ദയനീയ തോൽവി ഓർമ്മിപ്പിച്ചുകൊണ്ടാണ് ഈ പ്രതിഷേധം.

ഈ വാർത്തയെക്കുറിച്ച് നിങ്ങൾക്കെന്താണ് പറയാനുള്ളത്? താഴെ കമൻ്റ് ചെയ്യൂ!

Article Summary: Local protest by Muslim League over bus stop name change.

#Mogral #Kasaragod #MuslimLeague #BusStop #NameChange #KeralaPolitics