എൻജിനിൽ നിന്ന് പുക; ഓടിക്കൊണ്ടിരുന്ന കാർ തീപിടിച്ച് കത്തി നശിച്ചു; സീറ്റ് ബൽറ്റ് ഊരി ഡ്രൈവർ രക്ഷപ്പെട്ടു

കാസർകോട്: (KasargodVartha) നെല്ലിക്കട്ടയിലേക്ക് പോകുന്നതിനിടെ അതുർക്കുഴി കയറ്റത്തിൽ ഓടിക്കൊണ്ടിരുന്ന മാരുതി 800 കാറിന് തീപിടിച്ച് പൂർണമായും കത്തിനശിച്ചു. 2026 സെപ്റ്റംബർ 19 ശനിയാഴ്ചയാണ് സംഭവം.

വാഹനത്തിലുണ്ടായിരുന്ന ഡ്രൈവർ സീറ്റ് ബെൽറ്റ് ഊരി പുറത്തേക്ക് ചാടി രക്ഷപ്പെട്ടു. വിനോദ് എന്നയാളുടെ ഉടമസ്ഥതയിലുള്ള കെഎൽ 13 ക്യു 6777 നമ്പർ കാറിനാണ് തീപിടിച്ചത്.

പുക കണ്ടു, പിന്നോട്ട് ഉരുണ്ടു

അതുർക്കുഴി കയറ്റത്തിൽ എത്തിയപ്പോഴാണ് വാഹനത്തിൻ്റെ എൻജിനിൽ നിന്ന് പുക ഉയരുന്നത് ഡ്രൈവർ അഷറഫിൻ്റെ ശ്രദ്ധയിൽപ്പെട്ടത്. ഉടൻ തന്നെ ബ്രേക്ക് ചവിട്ടി വാഹനം നിർത്താൻ ശ്രമിച്ചെങ്കിലും നിയന്ത്രണം നഷ്ടപ്പെട്ട കാർ പുറകിലേക്ക് നീങ്ങി സമീപത്തെ കോൺക്രീറ്റ് തൂണിൽ ഇടിച്ചാണ് നിന്നത്.

പുക ഉയരുന്നത് ശ്രദ്ധയിൽപ്പെട്ടതോടെ മല്ലം സ്വദേശിയായ അഷറഫ് സീറ്റ് ബെൽറ്റ് അഴിച്ച് ഉടൻ വാഹനത്തിൽ നിന്ന് പുറത്തേക്ക് ചാടുകയായിരുന്നു. തൊട്ടു പിന്നാലെ തീ ആളിപ്പടർന്ന് കാർ പൂർണമായും കത്തിനശിച്ചു. സംഭവത്തിൽ ആർക്കും പരിക്കുകളില്ല.

ഓടിയെത്തി അഗ്നിരക്ഷാസേന

വിവരമറിഞ്ഞ് കാസർകോട് അഗ്നിരക്ഷാ നിലയത്തിൽ നിന്ന് സീനിയർ ഫയർ ആൻഡ് റെസ്ക്യൂ ഓഫീസർ സുകു വർഗീസിൻ്റെ നേതൃത്വത്തിലുള്ള സംഘം സ്ഥലത്തെത്തിയാണ് തീ പൂർണമായും നിയന്ത്രണവിധേയമാക്കിയത്.

ഫയർ ആൻഡ് റെസ്ക്യൂ ഓഫീസർമാരായ  അമൽ ടി, സിറാജുദ്ദീൻ പിസി, വൈശാഖ് എം എ, ഡ്രൈവർ പ്രസീത് ഇ, ഹോം ഗാർഡുമാരായ രാജേന്ദ്രൻ എ, ശ്രീജിത്ത് പി എന്നിവരും രക്ഷാപ്രവർത്തനത്തിൽ പങ്കെടുത്തു.

വാഹനത്തിലെ വൈദ്യുത സംവിധാനത്തിലുണ്ടായ ഷോർട്ട് സർക്യൂട്ടാകാം തീപിടിത്തത്തിന് കാരണമെന്നാണ് ഫയർഫോഴ്സിൻ്റെ പ്രാഥമിക നിഗമനം. സംഭവത്തെ തുടർന്ന് പ്രദേശത്ത് ഗതാഗത തടസ്സവും അനുഭവപ്പെട്ടു.

കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Maruti 800 car catches fire at Athurkuzhi incline; driver escapes unhurt.

#KasargodVartha #KasaragodNews #CarFireAccident #KeralaFireForce #Athurkuzhi #MalayalamNews #RenuNews