48 പടികൾ കയറണം; ലിഫ്റ്റില്ലാതെ മൂന്നാം നിലയിൽ മഞ്ചേശ്വരം താലൂക്ക് ഓഫീസ്, മിനി സിവിൽ സ്റ്റേഷൻ നിർമാണം വൈകുന്നു

കാസർകോട്: (KasargodVartha) മഞ്ചേശ്വരം താലൂക്ക് രൂപീകൃതമായത് മുതൽ വർഷങ്ങൾ പിന്നിട്ടിട്ടും സ്വന്തമായൊരു കെട്ടിടം ഇനിയും യാഥാർഥ്യമായില്ല. നിലവിൽ ഉപ്പളയിലെ ഒരു സ്വകാര്യ കെട്ടിടത്തിൻ്റെ മൂന്നാം നിലയിലാണ് താലൂക്ക് ഓഫീസ് വാടകയ്ക്ക് പ്രവർത്തിച്ചു വരുന്നത്. ഈ കെട്ടിടത്തിൽ ലിഫ്റ്റ് സൗകര്യം പോലുമില്ല. വിവിധ ആവശ്യങ്ങൾക്കായി ഓഫീസിലെത്താൻ താഴെ നിന്ന് 48 പടികൾ കയറണം.

ഇത് ജീവനക്കാർക്കും, ദിവസേനയെത്തുന്ന പൊതുജനങ്ങൾക്കും പ്രയാസമുണ്ടാക്കുന്നു. പടികൾ കയറി മുകളിലെത്തുമ്പോൾ വയോജനങ്ങൾ ഉൾപ്പെടെയുള്ളവർ ശാരീരിക അസ്വസ്ഥതകൾ നേരിടുന്നതായി പരാതിയുണ്ട്.

വാടക കെട്ടിടത്തിലെ പ്രവർത്തനം

സാധാരണക്കാരായ ജനങ്ങൾ സർട്ടിഫിക്കറ്റുകൾക്കും പെൻഷൻ ആവശ്യങ്ങൾക്കും ഭൂമി സംബന്ധമായ കാര്യങ്ങൾക്കുമായി ആശ്രയിക്കുന്ന താലൂക്ക് ഓഫീസ് പോലൊരു പ്രധാന സർക്കാർ കേന്ദ്രം വയോജനങ്ങൾക്ക് കടന്നുചെല്ലാൻ കഴിയാത്ത വിധം പ്രവർത്തിക്കുന്നതിനെതിരെ വിമർശനം ഉയരുന്നുണ്ട്. സ്വന്തമായി ഭൂമി ലഭ്യമായിട്ടും നിർമാണം വൈകിപ്പിച്ച് സ്വകാര്യ വ്യക്തിക്ക് വാടക നൽകുന്നത് പൊതുഖജനാവിന് നഷ്ടമുണ്ടാക്കുന്നുവെന്നും നാട്ടുകാർ ആരോപിക്കുന്നു.

ഉപ്പളയിൽ നിരവധി സർക്കാർ സ്ഥാപനങ്ങൾ ഉപയോഗശൂന്യമായി കിടക്കുമ്പോഴാണ്, താഴത്തെ നിലകളിലുള്ള കെട്ടിടങ്ങളിലേക്ക് മാറാതെ താലൂക്ക് ഓഫീസ് മൂന്നാം നിലയിൽ തന്നെ പ്രവർത്തിക്കുന്നത്. സ്വന്തമായി കെട്ടിടം നിർമിക്കുന്നതിനുള്ള നടപടികൾ പുരോഗമിക്കുന്നുണ്ടെന്ന് ബന്ധപ്പെട്ടവർ പറയുമ്പോഴും പ്രാരംഭ പ്രവർത്തനങ്ങൾ തുടങ്ങിയിട്ടില്ല.

മിനി സിവിൽ സ്റ്റേഷൻ വൈകുന്നു

മംഗൽപാടി വില്ലേജിൽ ഉൾപ്പെടുന്ന ഉപ്പള കൈക്കമ്പയിൽ റവന്യൂ വകുപ്പിൻ്റെ കീഴിലുള്ള സ്ഥലം പുതിയ കെട്ടിടത്തിനായി നീക്കിവെച്ചതായി അധികൃതർ പറയുന്നു. എ.കെ.എം. അഷ്റഫ് എം.എൽ.എ.യുടെ നിരന്തരമായ ഇടപെടലിലൂടെ ഇതിൻ്റെ പ്രാഥമിക പ്രവർത്തനങ്ങൾക്ക് കഴിഞ്ഞ സർക്കാർ ഫണ്ട് നീക്കിവെച്ചിരുന്നു.

താലൂക്ക് ഓഫീസിന് പുറമേ മറ്റ് പ്രധാന സർക്കാർ ഓഫീസുകൾ കൂടി ഒരു കുടക്കീഴിൽ കൊണ്ടുവരാനുള്ള രീതിയിലാണ് അത്യാധുനിക സൗകര്യങ്ങളോട് കൂടിയുള്ള 'മിനി സിവിൽ സ്റ്റേഷൻ' പണിയാൻ ആലോചിച്ചിരുന്നത്. ഇതിനുള്ള രൂപരേഖയും തയ്യാറായിട്ടുണ്ട്. എന്നാൽ പ്രാരംഭ പ്രവർത്തനങ്ങൾക്കുള്ള മണ്ണ് പരിശോധന ഇനിയും നടന്നിട്ടില്ല.

പൊതുമരാമത്ത് വകുപ്പിൻ്റെ പ്രത്യേക സാങ്കേതിക അനുമതി വൈകുന്നതാണ് കാലതാമസത്തിന് കാരണമായി അധികൃതർ പറയുന്നത്. കാസർകോട് ജില്ലയിൽ ഏറെ ജനകീയ ആവശ്യമായിരുന്നു മഞ്ചേശ്വരത്ത് താലൂക്ക് രൂപീകരണം എന്നത്. എന്നാൽ സ്വന്തം കെട്ടിടത്തിനായുള്ള കാത്തിരിപ്പ് നീളുന്നത് കാരണം താലൂക്ക് ഓഫീസുമായി ബന്ധപ്പെട്ട കാര്യങ്ങൾക്ക് ഓഫീസിലെത്താനും, പടികൾ കയറാനും കഴിയാത്ത അവസ്ഥയിലാണ് പൊതുജനങ്ങൾ.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Despite being formed years ago, the Manjeshwaram Taluk Office continues to operate on the third floor of a private building in Uppala without a lift, forcing elderly citizens to climb 48 steps for essential services. 

#KasargodVartha #ManjeshwaramTaluk #KasaragodNews #Uppala #CivicIssue #KeralaGovernment #AKMAshrafMLA #PWD #MalayalamNews #AparnaNews