മഞ്ചേശ്വരത്ത് വൈദ്യുതി പ്രതിസന്ധി രൂക്ഷം; പ്രഖ്യാപനങ്ങൾ കടലാസിൽ ഒതുങ്ങി, ഉപഭോക്താക്കൾ ദുരിതത്തിൽ

കുമ്പള: (KasargodVartha) മഞ്ചേശ്വരം നിയോജകമണ്ഡലത്തിലെ എട്ട് പഞ്ചായത്തുകളിലെ വൈദ്യുതി പ്രതിസന്ധിക്ക് പരിഹാരം കാണാൻ കഴിഞ്ഞ മൂന്ന് വർഷത്തിനിടെ പ്രഖ്യാപിച്ച കോടികളുടെ പദ്ധതികൾ കടലാസിൽ ഒതുങ്ങിയതായി പരാതി. 2021 മുതൽ മഞ്ചേശ്വരം എംഎൽഎ എ കെ എം അഷ്റഫിന്റെ നേതൃത്വത്തിൽ കെഎസ്ഇബി ഉദ്യോഗസ്ഥരുമായി നിരവധി യോഗങ്ങൾ ചേർന്നിരുന്നു.

എന്നാൽ, 2021ൽ പ്രഖ്യാപിച്ച ഉപ്പളയിലെ 33 കെവി സബ്സ്റ്റേഷനായുള്ള സ്ഥലമെടുപ്പ്, ഗുരുതരമായ പ്രതിസന്ധി നേരിടുന്ന കുമ്പള സെക്ഷൻ ഓഫീസ് കെട്ടിട നിർമ്മാണം, സീതാംഗോളി സെക്ഷൻ ഓഫീസ് കെട്ടിട നിർമ്മാണം എന്നിവയൊന്നും മുന്നോട്ട് പോയില്ല. വിവിധ പദ്ധതികളിലൂടെ ട്രാൻസ്ഫോർമറുകളും ത്രീഫേസ് ലൈനുകളും സ്ഥാപിച്ച് വോൾട്ടേജ് ക്ഷാമം പരിഹരിക്കാനുള്ള തീരുമാനവും പാതിവഴിയിൽ നിലച്ചു.

2022ൽ മഞ്ചേശ്വരം മണ്ഡലത്തിലെ വോൾട്ടേജ് ക്ഷാമം പരിഹരിക്കാൻ 42.39 കോടി രൂപ അനുവദിച്ചതായി മന്ത്രി കെ കൃഷ്ണൻകുട്ടി നിയമസഭയിൽ അറിയിച്ചിരുന്നു. വൊർക്കാടി, ഉപ്പള എന്നിവിടങ്ങളിൽ സബ്സ്റ്റേഷൻ സ്ഥാപിക്കുന്നതിനുള്ള സാധ്യത പരിശോധിച്ചു വരികയാണെന്നും മന്ത്രി അന്ന് വ്യക്തമാക്കി. എന്നാൽ ഈ പദ്ധതിയും എങ്ങുമെത്തിയില്ല.

കേന്ദ്രാവിഷ്കൃത പദ്ധതിയായ ആർ ഡി എസ് എസ്സിൽ ഉൾപ്പെടുത്തി 2023-24-25 വർഷങ്ങളിൽ നടപ്പാക്കുമെന്ന് പറഞ്ഞ 15.93 കിലോമീറ്റർ 11 കെ വി ഒ എച്ച് ലൈൻ, 20.62 കിലോമീറ്റർ 11 കെ വി കണ്ടക്ടറിങ്ങ്, 145 കിലോമീറ്റർ 11 കെ വി എബിസി കേബിൾ സ്ഥാപിക്കൽ, 300.87 കിലോമീറ്റർ എൽ ടി റീ കണ്ടക്ടറിങ്ങ് എന്നീ പദ്ധതികളും ഇതുവരെ യാഥാർത്ഥ്യമായില്ല.

ഇതിൽ 15 കോടിയുടെ പദ്ധതികൾ പൂർത്തിയായെന്നാണ് അധികൃതരുടെ വിശദീകരണം. എന്നാൽ വൈദ്യുതി പ്രതിസന്ധിക്ക് മാത്രം മാറ്റമില്ലെന്ന് ഉപഭോക്താക്കൾ പറയുന്നു. ഉപഭോക്താക്കളുടെ എണ്ണം വർധിക്കുന്നതിനനുസരിച്ച് വൈദ്യുതി വിതരണ സംവിധാനം മെച്ചപ്പെടുത്താൻ അധികൃതർക്ക് കഴിയുന്നില്ലെന്നും ഇത് വോൾട്ടേജ് ക്ഷാമത്തിന് കാരണമാകുന്നുവെന്നും ആക്ഷേപമുണ്ട്.

വൈദ്യുതി വിതരണ രംഗം ആധുനികവൽക്കരിക്കുമെന്നും ഗുണമേന്മയുള്ള വൈദ്യുതി ഉറപ്പാക്കുമെന്നുമുള്ള മന്ത്രിയുടെ ഉറപ്പ് പാലിക്കപ്പെട്ടില്ല. കുബന്നൂരിലെ 110 കെ വി സബ്സ്റ്റേഷനിലെ ട്രാൻസ്ഫോർമറിന്റെ ശേഷി വർദ്ധിപ്പിക്കാനുള്ള ജോലിയും കഴിഞ്ഞ മൂന്ന് വർഷമായി എങ്ങുമെത്തിയിട്ടില്ല.

അവസാനമായി, അടുത്ത മൂന്ന് വർഷത്തേക്ക് 200 കോടിയുടെ ‘വെളിച്ചം’ പദ്ധതി നടപ്പാക്കുമെന്ന് അറിയിച്ചിട്ടുണ്ട്. എന്നാൽ മുൻ പദ്ധതികൾ പൂർത്തിയാക്കാത്തതിനെക്കുറിച്ച് അധികൃതർ മൗനം പാലിക്കുന്നു. പ്രഖ്യാപനങ്ങൾക്കപ്പുറം ആത്മാർത്ഥമായ പ്രവർത്തനമാണ് വേണ്ടതെന്ന് ഉപഭോക്താക്കൾ പറയുന്നു.

മണ്ഡലത്തിലെ പല കെഎസ്ഇബി ഓഫീസുകളിലും ജീവനക്കാരും കമ്പികളടക്കമുള്ള സാമഗ്രികളുമില്ല. കുമ്പളയിൽ ദിവസങ്ങളോളം വൈദ്യുതി തടസ്സം സാധാരണമാണ്. ഇതിന് പുറമെ രൂക്ഷമായ വോൾട്ടേജ് ക്ഷാമവും ഉണ്ട്. എന്നിട്ടും എങ്ങനെയാണ് പ്രതിസന്ധി പരിഹരിക്കുകയെന്ന് ഉപഭോക്താക്കൾ ചോദിക്കുന്നു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: Residents of Manjeshwaram constituency are facing severe power crisis due to the non-implementation of multi-crore projects announced over the past three years. Consumers suffer from frequent power outages and voltage drops, despite repeated promises and fund allocations.

#ManjeshwaramPowerCrisis, #KSEBfail, #VoltageIssue, #KeralaElectricity, #PowerOutage, #PublicGrievance