'ഓരോ ഫയലും ഒരു ജീവിതം' വെറും വാക്ക്; മഞ്ചേശ്വരത്ത് ഭൂമി തരംമാറ്റത്തിന് കാലതാമസം

ഉപ്പള: (KasargodVartha) ഭൂമി തരംമാറ്റത്തിനായി കാസർകോട് ജില്ലയിലെ വിവിധ റവന്യൂ ഡിവിഷൻ ഓഫീസുകളിലായി പതിനായിരത്തോളം അപേക്ഷകൾ കെട്ടിക്കിടക്കുമ്പോൾ, മഞ്ചേശ്വരം താലൂക്കിൽ മാത്രം ആയിരത്തിലധികം അപേക്ഷകളാണ് പരിഹാരമില്ലാതെ കെട്ടിക്കിടക്കുന്നത്. 

ഇതിൽ ഭൂരിഭാഗവും കോയിപ്പാടി, മംഗൽപാടി ഗ്രൂപ്പ് വില്ലേജുകളിലെ അപേക്ഷകളാണ്. രണ്ടും മൂന്നും വർഷം പഴക്കമുള്ള അപേക്ഷകളും ഇതിൽ ഉൾപ്പെടുന്നു. രണ്ടാം പിണറായി സർക്കാരിന്റെ നാല് വർഷത്തിനിടെ വിവിധ പേരുകളിൽ മൂന്നോളം പരാതി പരിഹാര അദാലത്തുകൾ സംഘടിപ്പിച്ചിട്ടും ഭൂമി സംബന്ധമായ ഫയലുകളിൽ കാര്യമായ പുരോഗതി ഉണ്ടായിട്ടില്ല. 

ഇതിനു പുറമെ ജില്ലാ കളക്ടർ വില്ലേജ് ഓഫീസുകൾ സന്ദർശിച്ച് പരാതികൾ തീർപ്പാക്കാനും പോരായ്മകൾ പരിഹരിക്കാനും ശ്രമം നടത്തിയെങ്കിലും ഭൂമി സംബന്ധമായ ഫയലുകൾക്ക് പരിഹാരം കണ്ടെത്താനായില്ല. ഓരോ വില്ലേജ് ഓഫീസുകളിലുമുള്ള ജീവനക്കാരുടെ ഒഴിവുകൾ നികത്തുന്നതിൽ സാമ്പത്തിക പ്രതിസന്ധി കാരണം സർക്കാരിന് താല്പര്യക്കുറവുണ്ടായി. 

നിലവിലുള്ള ജീവനക്കാരെ വെച്ച് ഇത്രയധികം ഫയലുകളിൽ തീർപ്പുണ്ടാക്കാൻ ഉദ്യോഗസ്ഥർക്കും കഴിഞ്ഞില്ല. ജില്ലയിലെ എല്ലാ റവന്യൂ ഓഫീസുകളിലും നിലവിലുള്ള ജീവനക്കാർ അമിത ജോലിഭാരം കൊണ്ട് വീർപ്പുമുട്ടുകയാണ്. ഇതിനിടയിൽ ജോലിഭാരം കാരണം പലരും സ്ഥലം മാറ്റത്തിനായി അപേക്ഷിച്ച് കാത്തിരിക്കുന്നുമുണ്ട്. കൂടാതെ, തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് ജോലികൾക്കായും നിലവിലുള്ള ജീവനക്കാരെ പറഞ്ഞയക്കുന്നുണ്ട്.

ഭൂമി തരംമാറ്റ അപേക്ഷകൾ ഓരോ ദിവസവും ഓഫീസുകളിൽ കുന്നുകൂടുകയാണ്. ‘ഓരോ ഫയലും ഒരു ജീവിതമാണ്’ എന്ന് സർക്കാർ പറയുന്നുണ്ടെങ്കിലും, അവയ്ക്ക് പരിഹാരം കാണാനും വേഗത്തിലാക്കാനും ആത്മാർത്ഥമായ നടപടികളൊന്നും ഉണ്ടാകുന്നില്ല. കടംകൊണ്ട് പൊറുതിമുട്ടുന്ന സാധാരണക്കാർ വീടും പറമ്പും വിൽക്കാനും, മക്കളുടെ പഠനത്തിനും വിവാഹത്തിനും വായ്പയെടുക്കാനും, ബാങ്ക് ലോൺ തിരിച്ചടവുമായി ബന്ധപ്പെട്ട ജപ്തി നടപടികളിൽ നിന്ന് ഒഴിവായി കിട്ടാനും വേണ്ടിയാണ് പലരും ഭൂമി തരംമാറ്റത്തിന് അപേക്ഷ നൽകുന്നത്. 

ഈ അപേക്ഷകളിലാണ് കാലതാമസം നേരിടുന്നത്. പോക്കുവരവ് നടപടികൾ പൂർത്തിയാകാത്ത ഭൂമിക്ക് നികുതി സ്വീകരിക്കുന്നില്ലെന്നതും അപേക്ഷകർക്ക് വലിയ ബുദ്ധിമുട്ടുകൾ സൃഷ്ടിക്കുന്നുവെന്നാണ് പരാതി. അതിനിടെ, ഭൂമി തരംമാറ്റൽ അതിവേഗ തീർപ്പാക്കൽ പദ്ധതി 2002-ൽ സർക്കാർ ആവിഷ്കരിച്ചിരുന്നുവെങ്കിലും അതും ചുവപ്പുനാടയിൽ കുടുങ്ങി. 

ആയിരത്തോളം ജീവനക്കാരെ പുനർവിന്യസിപ്പിച്ച് എല്ലാ അപേക്ഷകളും തീർപ്പാക്കുകയായിരുന്നു സർക്കാർ ലക്ഷ്യമിട്ടിരുന്നത്. ഈ പദ്ധതിക്ക് 50 കോടി രൂപയുടെ ചെലവ് ധനവകുപ്പ് അംഗീകരിക്കാത്തതാണ് പിന്നീട് നടക്കാതെ പോയത്. ക്ലർക്കുമാർ, ഡാറ്റാ എൻട്രി ഓപ്പറേറ്റർമാർ, ഫീൽഡ് പരിശോധനയ്ക്ക് വാടക വാഹനങ്ങൾ, കൂടുതൽ സർവേയർമാർ എന്നിവർക്കായി ധനവകുപ്പിൽ ശുപാർശ സമർപ്പിച്ചിരുന്നു.

മഞ്ചേശ്വരത്തെ ഈ പ്രശ്നത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Land reclassification delays plague Manjeshwaram, affecting thousands.

#LandReclassification #Manjeshwaram #KeralaRevenue #GovernmentDelay #PublicGrievance #Kasaragod