കാത്തിരിപ്പ് തുടങ്ങിയിട്ട് രണ്ട് പതിറ്റാണ്ട്; മഞ്ചേശ്വരം ഹൊസങ്കടി റെയിൽവേ മേൽപ്പാലം യാഥാർത്ഥ്യമാകുമോ?

മഞ്ചേശ്വരം: (KasargodVartha) കാസർകോട് ജില്ലയിലെ മഞ്ചേശ്വരം താലൂക്കിലെ പ്രധാന നഗരിയായ ഹൊസങ്കടിയിൽ റെയിൽവേ മേൽപ്പാലത്തിനായുള്ള കാത്തിരിപ്പ് തുടരുകയാണ്. കേന്ദ്രത്തിലെ യുപിഎ ഭരണകാലത്ത് ഇ അഹമ്മദ് കേന്ദ്ര റെയിൽവേ സഹമന്ത്രിയായിരുന്നപ്പോഴാണ് ഹൊസങ്കടിയിൽ റെയിൽവേ മേൽപ്പാലം അനുവദിക്കുമെന്ന അറിയിപ്പ് വന്നത്. 

ആവശ്യമായ ഫണ്ട് അനുവദിച്ചിട്ടും രണ്ട് പതിറ്റാണ്ടിലേറെ പിന്നിട്ടിട്ടും തുടർനടപടികൾ എങ്ങുമെത്തിയിട്ടില്ല. മഞ്ചേശ്വരം താലൂക്കിൽ മാത്രമായി നാലോളം റെയിൽവേ ക്രോസിങ് സംവിധാനങ്ങളാണുള്ളത്. ഹൊസങ്കടിക്ക് പുറമെ മഞ്ചേശ്വരം, മുട്ടം, ഉപ്പള എന്നിവിടങ്ങളിലാണ് റെയിൽവേ ഗേറ്റുകളുള്ളത്. ഇതിൽ ഹൊസങ്കടിയിലാണ് മേൽപ്പാലം റെയിൽവേയുടെ സജീവ പരിഗണനയിലുള്ളത്.

അലൈൻമെൻ്റിൽ മാറ്റം

പ്രസ്തുത മേൽപ്പാലത്തിന് നേരത്തെ 40.4 കോടി രൂപ പദ്ധതിക്കായി അനുവദിച്ചിരുന്നതാണ്. ഇതിനാവശ്യമായ സ്ഥലം ഏറ്റെടുക്കുന്നതിനുള്ള വിജ്ഞാപനം പോലും സർക്കാർ പുറപ്പെടുവിച്ചിരുന്നു. കേരള റോഡ്സ് ആൻഡ് ബ്രിഡ്ജസ് ഡെവലപ്മെൻ്റ് കോർപ്പറേഷനാണ് നിർമാണ ചുമതല നൽകിയിരുന്നത്. എന്നാൽ ദേശീയപാത 66-ൽ പുതിയ ആറുവരിപ്പാത വന്നതോടുകൂടി നിർദിഷ്ട റെയിൽവേ മേൽപ്പാലത്തിൻ്റെ അലൈൻമെൻ്റിൽ ആവശ്യമായ ചില മാറ്റങ്ങൾ വരുത്താനുള്ള സർവേ നടപടികൾ പൂർത്തിയായി വരുന്നുണ്ടെന്നാണ് അധികൃതർ പറയുന്നത്.

അപകടങ്ങൾ വർധിക്കുന്നു; പുതിയ ആവശ്യങ്ങൾ

സംസ്ഥാനത്ത് റെയിൽവേ ഗേറ്റുകളിൽ അപകടങ്ങൾ ഏറിവരുന്ന സാഹചര്യത്തിൽ അനുമതി നൽകിയ മേൽപ്പാലങ്ങളുടെ ജോലി യുദ്ധകാലാടിസ്ഥാനത്തിൽ ചെയ്തുതീർക്കാനുള്ള ശ്രമത്തിലാണ് റെയിൽവേ അധികൃതർ. കഴിഞ്ഞ ആറ് മാസത്തിനുള്ളിൽ വാഹനങ്ങൾ ഇടിച്ചത് 24 റെയിൽവേ ഗേറ്റുകളിലാണ്. 129 ഗേറ്റുകളുള്ള പാലക്കാട് ഡിവിഷനിൽ മാത്രം കഴിഞ്ഞ വർഷം 55 അപകടങ്ങൾ രജിസ്റ്റർ ചെയ്തിരുന്നു. 

അശ്രദ്ധയോടെ വാഹനമോടിച്ച ഡ്രൈവർമാരുടെ ലൈസൻസുകൾ റദ്ദാക്കിയും ഇവരിൽ നിന്ന് 17.28 ലക്ഷം രൂപ നഷ്ടപരിഹാരമായി ഈടാക്കിയുമാണ് റെയിൽവേ നടപടിയെടുത്തത്. അതിനിടെ ജില്ലയിലെ വിവിധ ഭാഗങ്ങളിൽ റെയിൽവേ ഫുട്ട് ഓവർ ബ്രിഡ്ജുകൾ വേണമെന്ന ആവശ്യവും ശക്തമായിട്ടുണ്ട്. 

വയോധികർക്കും വിദ്യാർഥികൾക്കും റെയിൽവേ ഇരട്ടപ്പാത കടന്നുപോകാൻ ബുദ്ധിമുട്ടുള്ള സാഹചര്യത്തിലാണ് ഇങ്ങനെയൊരു നിർദേശം മുന്നോട്ട് വെച്ചിട്ടുള്ളത്. ഇതിൽ മൊഗ്രാൽ കൊപ്പളം ഫുട്ട് ഓവർ ബ്രിഡ്ജ് റെയിൽവേയുടെ പരിഗണനയിലുണ്ട്. ഉദ്യോഗസ്ഥർ പരിശോധിച്ച ഈ പദ്ധതിക്ക് തടസ്സങ്ങളൊന്നുമില്ലെങ്കിലും തുടർനടപടികൾ ഉണ്ടായിട്ടില്ല. മെട്രോമാൻ ഇ ശ്രീധരൻ മുന്നോട്ടുവെച്ച അതിവേഗ പാതയും കേന്ദ്ര റെയിൽവേ മന്ത്രാലയത്തിൻ്റെ പരിഗണനയിലുള്ള നാലുവരിപ്പാതയുമൊക്കെ ചർച്ചയാകുമ്പോഴാണ് മേൽപ്പാലങ്ങളുടെയും ഫുട്ട് ഓവർ ബ്രിഡ്ജുകളുടെയും ആവശ്യകത ഏറിവരുന്നത്. 

പ്രാദേശിക വികസനവുമായി ബന്ധപ്പെട്ട ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്തുക.

Article Summary: The wait for the Hosangadi railway overbridge in Manjeshwar continues even two decades after its initial announcement, while alignment changes due to the NH-66 expansion and increasing railway gate accidents highlight the urgent need for swift infrastructure development.

#HosangadiOverbridge #Manjeshwar #KasaragodNews #KeralaRailway #NH66 #MalayalamNews #AparnaNews