'സിപിഎം സ്ഥാനാർത്ഥി വാറണ്ട് കേസ് മറച്ചുവെച്ചു': തെരഞ്ഞെടുപ്പ് ചട്ടലംഘനം ചൂണ്ടിക്കാട്ടി യുഡിഎഫ് പരാതി; ബിജെപിയുടെ പിന്മാറ്റം ഒത്തുകളിയോ?

മംഗൽപ്പടി: (KasargodVartha) വാറണ്ട് കേസിൽ പ്രതിയായ സിപിഎം ലോക്കൽ കമ്മിറ്റിയംഗം നാമനിർദേശ പത്രികയിൽ കേസ് വിവരങ്ങൾ മറച്ചുവെച്ചെന്നും ഇത് തെരഞ്ഞെടുപ്പ് ചട്ടങ്ങളുടെ ലംഘനമാണെന്നും ചൂണ്ടിക്കാട്ടി യുഡിഎഫ് പരാതിയുമായി രംഗത്ത്. മംഗൽപ്പടി പഞ്ചായത്തിലെ ഷിറിയ വാർഡിലാണ് ഈ ഗുരുതരമായ ആരോപണം ഉയർന്നിരിക്കുന്നത്. യുഡിഎഫ് സ്ഥാനാർത്ഥിയായ മുസ്‌ലിം ലീഗ് പഞ്ചായത്ത് കമ്മിറ്റി കൗൺസിലർ അബൂബക്കർ സിദ്ധീഖാണ് റിട്ടേണിംഗ് ഓഫീസർക്ക് പരാതി നൽകിയിട്ടുള്ളത്.

എൽഡിഎഫ് സ്വതന്ത്ര സ്ഥാനാർത്ഥിയായി മത്സരിക്കുന്ന മുഹമ്മദ് ഇഖ്ബാൽ തൻ്റെ പേരിൽ നിലവിലുള്ള വാറണ്ട് കേസ് ഉൾപ്പെടെയുള്ള ക്രിമിനൽ കേസുകൾ നാമനിർദേശ പത്രികയിൽ വെളിപ്പെടുത്തിയില്ല എന്നാണ് സിദ്ദീഖിൻ്റെ പരാതി. ഇഖ്ബാൽ നിലവിൽ സിപിഎം ബന്തിയോട് ലോക്കൽ കമ്മിറ്റി മെമ്പറാണ്. ആദ്യം എൽഡിഎഫ് സ്വതന്ത്ര സ്ഥാനാർത്ഥിയായി രംഗത്ത് വന്ന ഇഖ്ബാൽ പിന്നീട് 'പൊതു സ്വതന്ത്രൻ' എന്ന നിലക്കാണ്‌ പുതിയ പോസ്റ്ററുകളിൽ പ്രത്യക്ഷപ്പെട്ടിരിക്കുന്നതെന്നും ലീഗ് നേതൃത്വം ആരോപിക്കുന്നു.

ഒത്തുകളി ആരോപണത്തിൽ ബിജെപിയും എസ്ഡിപിഐയും

കഴിഞ്ഞ തെരഞ്ഞെടുപ്പിൽ 200 ഓളം വോട്ട് നേടിയ ബിജെപി ഇത്തവണ ഷിറിയ വാർഡിൽ സ്ഥാനാർത്ഥിയെ നിർത്തിയിട്ടില്ല എന്നതും മുസ്‌ലിം ലീഗ് നേതൃത്വം ആരോപണമായി ഉന്നയിക്കുന്നു. സിപിഎം സ്ഥാനാർത്ഥിയെ സഹായിക്കാനായാണ് ബിജെപി മത്സരത്തിൽ നിന്ന് പിന്മാറിയതെന്നും ഇതിന് പിന്നിൽ രഹസ്യധാരണയുണ്ടെന്നും ലീഗ് ആരോപിച്ചു. വരുന്ന നിയമസഭ തെരഞ്ഞെടുപ്പിൽ ബിജെപിക്ക് തിരിച്ച് സഹായം നൽകും എന്ന കരാറിലാണ് ഈ പിന്മാറ്റമെന്നും മുസ്‌ലിം ലീഗ് നേതൃത്വം പറയുന്നു.

കൂടാതെ, കഴിഞ്ഞ തിരഞ്ഞെടുപ്പിൽ മത്സരിച്ച എസ്ഡിപിഐയും ഇത്തവണ ഇഖ്ബാലിനെ സഹായിക്കാൻ വേണ്ടി മത്സരരംഗത്ത് ഇറങ്ങിയിട്ടില്ല. ഇതിന് ചുക്കാൻ പിടിച്ചത് ഇഖ്ബാലിൻ്റെ സഹോദരനായ എസ്ഡിപിഐ നേതാവാണെന്നും ലീഗ് നേതൃത്വം ആരോപിക്കുന്നുണ്ട്. ഈ നീക്കങ്ങളെല്ലാം സിപിഎം സ്ഥാനാർത്ഥിക്ക് അനുകൂലമായ ഒത്തുകളിയുടെ ഭാഗമാണെന്നാണ് മുസ്‌ലിം ലീഗ് ആരോപണം.

ഉദ്യോഗസ്ഥർ ഭരണകക്ഷിക്കുവേണ്ടി പ്രവർത്തിക്കുന്നു?

വാറണ്ട് പ്രതിയെന്നതും കേസ് ഉണ്ടെന്ന കാര്യവും മറച്ചുവെക്കുന്നത് തെരെഞ്ഞടുപ്പ് ചട്ടങ്ങളുടെ ലംഘനമാണെന്ന് യുഡിഎഫ് വ്യക്തമാക്കുന്നു. ജില്ലാ വരണാധികാരിയായ ജില്ലാ കലക്ടർക്കും സംസ്ഥാന തെരെഞ്ഞടുപ്പ് കമ്മിഷനും പരാതി നൽകിയതായി മുസ്‌ലിം ലീഗ് നേതാവ് ഗോൾഡൺ റഹ്മാൻ പ്രതികരിച്ചു. തെരെഞ്ഞടുപ്പ് ചുമതലയുള്ള ഉദ്യോഗസ്ഥർ കേസ് വിവരം മറച്ചുവെച്ച സ്ഥാനാർത്ഥിക്കും ഭരണ പാർട്ടിയായ സിപിഎമ്മിനും വേണ്ടി പ്രവർത്തിക്കുകയാണെന്നും ഗോൾഡൺ റഹ്മാൻ പറഞ്ഞു.

സ്ഥാനാർത്ഥിക്കെതിരെ പരാതി ഉന്നയിച്ചപ്പോൾ തെരെഞ്ഞടുപ്പ് കഴിഞ്ഞ ശേഷം അവർ വിജയിക്കുകയാണെങ്കിൽ അയോഗ്യനാക്കാൻ കോടതിയെ സമീപിക്കാമെന്ന വിചിത്ര ഉപദേശമാണ്  ഉദ്യോഗസ്ഥർ നൽകിയതെന്നും ഗോൾഡൺ റഹ്മാൻ കൂട്ടിച്ചേർത്തു. നിലവിൽ ഷിറിയ വാർഡിൽ ശക്തമായ മത്സരത്തിന് വഴിയൊരുങ്ങുകയാണ്. ഇഖ്ബാലിൻ്റെ നാമനിർദേശ പതിക തള്ളുകയാണെങ്കിൽ മംഗൽപ്പടിയിൽ എതിരില്ലാതെ വിജയിക്കുന്ന രണ്ടാമത്തെ യുഡിഎഫ് സ്ഥാനാർത്ഥിയായി സിദ്ദിഖ് ഷിറിയ മാറും.

മംഗൽപ്പടിയിലെ ഈ രാഷ്ട്രീയ നീക്കങ്ങളെക്കുറിച്ച് നിങ്ങളുടെ വിലയിരുത്തൽ എന്താണ്? കമൻ്റ് ചെയ്യുക.

Article Summary: UDF files complaint against CPM candidate in Mangalpady for concealing warrant case.

#Kasaragod #LocalBodyPolls #CPMVoters #UDFComplaint #ElectionControversy #KeralaPolitics