നഗരത്തില്‍ ഗുണ്ടാവിളയാട്ടം; കുത്തേറ്റ് യുവാവിന് പരിക്ക്, കടയുടെ മുന്നില്‍ വെച്ച ഗ്ലാസും തകര്‍ത്തു

By Web Desk - MainMar 21, 2018, 19:53 IST

കാസര്‍കോട്: (www.kasargodvartha.com 21.03.2018) നഗരത്തില്‍ ഗുണ്ടാവിളയാട്ടം. കുത്തേറ്റ് യുവാവിന് പരിക്കേറ്റു. അക്രമത്തിനിടയില്‍ കടയുടെ മുന്നില്‍ വെച്ച ഗ്ലാസും തകര്‍ത്തു. ബുധനാഴ്ച വൈകിട്ട് 6.30 മണിയോടെ കാസര്‍കോട് പഴയ ബസ് സ്റ്റാന്‍ഡിലാണ് സംഭവം. ബസ് സ്റ്റാന്‍ഡില്‍ ചെരിപ്പ് നന്നാക്കിക്കൊടുക്കുന്ന രാജേഷിനെയാണ് അക്രമിച്ചത്. പൊട്ടിയ ഗ്ലാസിന്റെ കഷ്ണമെടുത്ത് കൈത്തണ്ടയില്‍ സലീം എന്നയാളാണ് കുത്തിയത്.

സ്ഥലത്തെത്തിയ കാസര്‍കോട് ടൗണ്‍ എസ് ഐ അജിത് കുമാര്‍ അക്രമം നടത്തിയ സലീമിനെ വിരട്ടിയോടിച്ചു. സലീം അക്രമക്കേസുമായി ബന്ധപ്പെട്ട് അടുത്തിടെയാണ് ജയിലില്‍ നിന്നും പുറത്തിറങ്ങിയത്. മദ്യപിക്കാനായി പണം നല്‍കാത്തതിന്റെ വൈരാഗ്യത്തിലാണ് രാജേഷിനെ കുത്തിയതെന്നാണ് വിവരം. രാജേഷിന്റെ പരിചയക്കാരന്‍കൂടിയാണ് സലീമെന്ന് പോലീസ് പറഞ്ഞു.