കിണർ വൃത്തിയാക്കുന്നതിനിടെ കയർ പൊട്ടി 80 അടി താഴ്ചയിലേക്ക്; 52-കാരനെ ജീവിതത്തിലേക്ക് കൈപിടിച്ചു കയറ്റി ഫയർഫോഴ്സ്

കാസർകോട്: (KasargodVartha)

ചെങ്കളയിൽ 80 അടി താഴ്ചയുള്ള കിണർ വൃത്തിയാക്കുന്നതിനിടെ കയർ പൊട്ടി കിണറ്റിൽ വീണ 52-കാരനെ അഗ്നിരക്ഷാ സേന സാഹസികമായി രക്ഷപ്പെടുത്തി. ചെങ്കള പഞ്ചായത്ത് പതിനഞ്ചാം വാർഡിൽ സുലൈമാൻ എന്നയാളുടെ കിണറ്റിലാണ് അപകടം നടന്നത്. അബ്ദുൽ റഹ്‌മാൻ (52) ആണ് അത്ഭുതകരമായി രക്ഷപ്പെട്ടത്.

കിണർ വൃത്തിയാക്കുന്നതിനായി ഇറങ്ങുന്നതിനിടെ അപ്രതീക്ഷിതമായി കയർ പൊട്ടുകയും അബ്ദുൽ റഹ്മാൻ 80 അടിയോളം താഴ്ചയുള്ള കിണറ്റിലേക്ക് വീഴുകയുമായിരുന്നു. പത്തടി വ്യാസമുള്ള കിണറാണ് ഇത്. അപകടം നടന്ന ഉടൻ തന്നെ പുറത്തുണ്ടായിരുന്ന തോമസ് ഉൾപ്പെടെയുള്ള മൂന്ന് പേർ കാസർകോട് അഗ്നിരക്ഷാ സേനയെ വിവരമറിയിച്ചു.

വിവരമറിഞ്ഞ ഉടൻ തന്നെ സീനിയർ ഫയർ ആൻഡ് റെസ്ക്യൂ ഓഫീസർ സണ്ണി ഇമ്മാനുവലിന്റെ നേതൃത്വത്തിലുള്ള സേനാംഗങ്ങൾ സ്ഥലത്തെത്തി രക്ഷാപ്രവർത്തനം ആരംഭിച്ചു. ഫയർ ആൻഡ് റെസ്ക്യൂ ഓഫീസർ ഗോകുൽ കൃഷ്ണൻ റിംഗ് നെറ്റിന്റെ സഹായത്തോടെ കിണറ്റിലിറങ്ങിയാണ് അബ്ദുൽ റഹ്മാനെ സുരക്ഷിതമായി കരയ്ക്ക് എത്തിച്ചത്.

കിണറ്റിൽ നിന്ന് പുറത്തെടുത്ത ഉടൻ തന്നെ സേനയുടെ ആംബുലൻസിൽ വെച്ച് അദ്ദേഹത്തിന് ആവശ്യമായ പ്രാഥമിക ശുശ്രൂഷകൾ നൽകി. തുടർന്ന് വിദഗ്ധ ചികിത്സയ്ക്കായി കാസർകോട് ജനറൽ ആശുപത്രിയിലേക്ക് മാറ്റി.

സീനിയർ ഫയർ ആൻഡ് റെസ്ക്യൂ ഓഫീസർമാരായ രമേശ എം, അജേഷ് കെ ആർ, ഫയർ ആൻഡ് റെസ്ക്യൂ ഓഫീസർമാരായ ഉമേഷൻ, അഭിലാഷ്, ഹോം ഗാർഡുകളായ വിജിത്ത് നാഥ്, സുഭാഷ്, സോബിൻ എന്നിവരും രക്ഷാപ്രവർത്തനത്തിൽ പങ്കാളികളായി. സമയബന്ധിതമായ ഇടപെടലാണ് വലിയൊരു ദുരന്തം ഒഴിവാക്കി അബ്ദുൽ  റഹ്‌മാനെ ജീവിതത്തിലേക്ക് മടക്കിക്കൊണ്ടുവന്നത്.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു

Article Summary: A 52-year-old man named Abdul Rahman was rescued by the Kasaragod Fire Force after falling into an 80ft deep well in Chengala when the rope broke while cleaning.

#Kasaragod #FireForce #RescueMission #Chengala #News #Kerala #SafetyFirst