ഗൃഹനാഥന്‍ പുഴയില്‍ ഒഴുക്കില്‍പെട്ട് മരിച്ചു

മഞ്ചേശ്വരം: (www.kasargodvartha.com 18.07.2017) ഗൃഹനാഥന്‍ പുഴയില്‍ ഒഴുക്കില്‍പെട്ട് മരിച്ചു. മിയാപദവ് അട്ക്കകളായിയിലെ മൊയ്തീന്‍ കുഞ്ഞി (62) യാണ് മരിച്ചത്. ചൊവ്വാഴ്ച രാത്രി വീട്ടിനു മുന്നിലുള്ള ഉപ്പള പുഴയിലാണ് സംഭവം. ഏറെ വൈകിയിട്ടും വീട്ടിലെത്താത്തതിനെ തുടര്‍ന്ന് അന്വേഷിച്ചു വരുന്നതിനിടെയാണ് മൊയ്തീന്‍ കുഞ്ഞിയുടെ മൃതദേഹം മൂന്നു കിലോമീറ്റര്‍ അകലെയുള്ള കളായി ദര്‍ഗക്കടുത്ത് പുഴയില്‍ കണ്ടെത്തിയത്.

കളായിയിലെ ഇരുപതോളം കുടുംബങ്ങള്‍ ഉപ്പള പുഴ മുറിച്ചു കടന്നാണ് മിയാപദവിലും മറ്റും പോകുന്നത്. സാധനങ്ങള്‍ വാങ്ങാനായി വീട്ടില്‍ നിന്നിറങ്ങിയതായിരുന്നു മൊയ്തീന്‍ കുഞ്ഞി. സാധനങ്ങള്‍ വാങ്ങിയ ശേഷം തിരിച്ചു വരുമ്പോള്‍ പുഴയോരത്തുണ്ടായിരുന്ന ആളോടു സംസാരിച്ച ശേഷമാണ് മൊയ്തീന്‍ കുഞ്ഞി പുഴയിലിറങ്ങിയത്.

പരേതരായ ഹസന്‍ കുഞ്ഞി- ഖദീജ ദമ്പതികളുടെ മകനാണ് കര്‍ഷകനായ മൊയ്തീന്‍ കുഞ്ഞി. ഭാര്യ: ബീഫാത്വിമ. മക്കള്‍: ഹസന്‍, കാസിം, അബ്ദുല്ല, ഇബ്രാഹിം, ജാഫര്‍, അബ്ബാസ്, ഹനീഫ. സഹോദരങ്ങള്‍: അബ്ദുല്‍ ഖാദര്‍, ആഇശ. മൃതദേഹം മംഗല്‍പാടി ഗവ. ആശുപത്രി മോര്‍ച്ചറിയില്‍ എത്തിച്ചു.