സാഹിത്യവും രാഷ്ട്രീയവും ഒന്നിച്ച് പോകണം: എം. മുകുന്ദന്‍

കാസര്‍കോട്: സാഹിത്യവും രാഷ്ട്രീയവും ഒന്നിച്ച് പോകണമെന്ന് പ്രശസ്ത സാഹിത്യകാരന്‍ എം. മുകുന്ദന്‍ അഭിപ്രായപ്പെട്ടു. എഴുത്തുകാരന് പേന മാത്രമേ കയ്യിലുള്ളൂ, അധികാരമില്ല. അധികാരം കയ്യാളുന്നത് രാഷ്ട്രീയക്കാരാണ്. അതിനാല്‍ സമൂഹത്തിന്റെ ശരിയായ മുന്നേറ്റത്തിന് സാഹിത്യവും രാഷ്ട്രീയവും ഒരുമിച്ച് പോകേണ്ടതാണെന്നും അദ്ദേഹം പറഞ്ഞു. കേരള സാഹിത്യ അക്കാദമി കാസര്‍കോട് സാഹിത്യ വേദിയുടെ സഹകരണത്തോടെ സംഘടിപ്പിച്ച വടക്കന്‍ പെരുമ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം

വര്‍ത്തമാന കാലത്ത് അച്ഛനും മകളും തമ്മിലുള്ള പവിത്ര ബന്ധത്തിന് ഉലച്ചില്‍ തട്ടിയിട്ടുണ്ടെന്നും മാധ്യമങ്ങളാണ് അത് പൊലിപ്പിച്ച് അവതരിപ്പിച്ചതെന്നും അദ്ദേഹം പറഞ്ഞു. കൊച്ചു കൊച്ചു കൂട്ടായ്മകളാണ് വടക്കന്‍ കേരളത്തിലെ സവിശേഷതകള്‍. ചെറിയതിനെ തിരിച്ചറിയാനും അതിലൂടെ ഒന്നിക്കാനും ഈ നാടിന് കഴിഞ്ഞു. ഏത് നാട്ടിലും വായനശാലകള്‍ ഉണ്ടെന്നതാണ് കേരളത്തെ മറ്റ് സംസ്ഥാനങ്ങളില്‍ നിന്ന് വ്യത്യ്‌സ്തമാക്കുന്നത്.
കേരളത്തില്‍ ഇപ്പോള്‍ പ്രാസംഗികര്‍ക്ക് ക്ഷാമമാണ്. കാര്‍ പാര്‍ക്ക് ചെയ്യാന്‍ സ്ഥലമില്ലാത്തത് കൊണ്ടാണ് പലരും പ്രസംഗിക്കാന്‍ പോവാത്തതെന്നും മുകുന്ദന്‍ പറഞ്ഞു. വടക്കന്‍ പെരുമ എന്നാല്‍ വലിയ ലോകമാണ്. മുച്ചിലോട്ട് ഭഗവതി മുതല്‍ കാവ്യാമാധവന്‍ വരെ വടക്കന്‍ പെരുമയുടെ ഭാഗമാണ്. മതനിരപേക്ഷമായ ഒരു സംസ്‌കാരം ഇവിടെയുണ്ട്. ഒരുപാട് ദൈവങ്ങളുടേയും മനുഷ്യരുടേയും നാടാണിത്-മുകുന്ദന്‍ പറഞ്ഞു.

പരിപാടിയില്‍ അക്കാദമി പ്രസിഡന്റ് പെരുമ്പടവം ശ്രീധരന്‍ അധ്യക്ഷത വഹിച്ചു. അക്ബര്‍ കക്കട്ടില്‍, വി.എസ്. അനില്‍കുമാര്‍, ആര്‍ ഗോപാലകൃഷ്ണന്‍, അഷ്‌റഫലി ചേരങ്കൈ, സി.എല്‍. ഹമീദ് പ്രസംഗിച്ചു.

തുടര്‍ന്ന് നടന്ന സെമിനാറില്‍ എം.എ. റഹ്മാന്‍, എന്‍. ശശിധരന്‍, പി.കെ. രാജശേഖരന്‍, ഇ.പി. രാജഗോപാലന്‍, നാരായണന്‍ പേരിയ, മാങ്ങാട് രത്‌നാകരന്‍, അംബികാസുതന്‍ മാങ്ങാട്, കെ.വി. മണികണ്ഠദാസ് എന്നിവര്‍ വിവിധ വിഷയങ്ങള്‍ അവതരിപ്പിച്ചു.

വി.വി. പ്രഭാകരന്‍, മുജീബ് അഹമ്മദ് പ്രസംഗിച്ചു.