കടലിൽ കല്ലിട്ട് കോടികൾ കളയുന്നു; സന്ദർശനം മാത്രം പോര, തീരസംരക്ഷണത്തിന് കോൺക്രീറ്റ് ഭിത്തി തന്നെ വേണമെന്ന് നാട്ടുകാർ
● ശാശ്വതമായ പരിഹാരത്തിനായി കോൺക്രീറ്റ് കടൽഭിത്തി വേണമെന്ന് നാട്ടുകാർ
● കരിങ്കൽ ഭിത്തികൾക്ക് പുറമെ ജിയോ ബാഗുകളും തീരസംരക്ഷണത്തിൽ പരാജയപ്പെടുന്നു
● തൃക്കണ്ണാട് കടപ്പുറത്ത് കടലാക്രമണത്തിൽ വീടുകളും തൊഴിൽ സാമഗ്രികളും നഷ്ടപ്പെട്ടിരുന്നു
● ചെറുകിട ജലസേചന വകുപ്പിൻ്റെ പ്രൊപ്പോസലുകൾ ഇപ്പോഴും കടലാസിലൊതുങ്ങുന്നു
● കഴിഞ്ഞ രണ്ട് പതിറ്റാണ്ടായി തീരദേശ മേഖല കടലാക്രമണത്തിൽ ദുരിതത്തിലാണ്
കാസർകോട്: (KasargodVartha) ജില്ലയിലെ 87.65 കിലോമീറ്റർ തീരത്തെ രൂക്ഷമായ കടലാക്രമണം നേരിടുന്ന പ്രദേശങ്ങളിൽ ശാസ്ത്രീയമായ തീരസംരക്ഷണ പദ്ധതി അടുത്ത വർഷമെങ്കിലും യാഥാർഥ്യമാകുമോ എന്ന ചോദ്യമാണ് ഉയരുന്നത്. കഴിഞ്ഞ രണ്ട് പതിറ്റാണ്ടുകാലമായി കാലവർഷത്തിൽ ഏറ്റവും അധികം ദുരിതം നേരിടുന്നത് തീരദേശ മേഖലയാണ്. ഈ കാലയളവിനുള്ളിൽ ശാസ്ത്രീയമായ ഒരു പദ്ധതികളും ഇതുവരെ തീരം തൊട്ടിട്ടില്ല.
പഠനമില്ലാതെയും ആസൂത്രണമില്ലാതെയും ഓരോ വർഷവും കരാറുകാരുടെ കീശ വീർപ്പിക്കാൻ മാത്രം കടലിൽ കല്ലിട്ട് കളയുന്നത് കോടികളാണ്. ഈ രണ്ട് പതിറ്റാണ്ടുകൾക്കിടയിൽ തീരദേശത്ത് കൊണ്ടിട്ട കരിങ്കല്ലുകൾ കൊണ്ടുള്ള കടൽഭിത്തികളൊന്നും ഇപ്പോൾ കാണാനേയില്ല. അതുകൊണ്ടാണ് പ്രദേശവാസികൾ ശാസ്ത്രീയമായ പദ്ധതി എന്ന നിലയിൽ കോൺക്രീറ്റ് കടൽഭിത്തികൾക്ക് പ്രഥമ പരിഗണന നൽകണമെന്ന് നിരന്തരം ആവശ്യപ്പെടുന്നത്.
ഒന്നാം പരിഗണന കോൺക്രീറ്റ് ഭിത്തികൾക്ക്
ശക്തമായ തിരമാലകളെ നേരിടാനും തീരശോഷണം ശാശ്വതമായി തടയാനും ഏറ്റവും ഫലപ്രദമായ മാർഗം ശാസ്ത്രീയമായി നിർമിക്കുന്ന കോൺക്രീറ്റ് ഭിത്തികളാണ്. പതിവായി കരിങ്കല്ലുകൾ കടലെടുക്കുന്ന സാഹചര്യത്തിൽ, ഉറപ്പുള്ള കോൺക്രീറ്റ് മതിലുകൾ നിർമിക്കുന്നത് ദീർഘകാലാടിസ്ഥാനത്തിൽ സാമ്പത്തിക ലാഭവും ജനങ്ങൾക്ക് സുരക്ഷയും നൽകും. കരിങ്കൽ ഭിത്തികൾക്ക് ബദലായി ടെട്രോപോഡുകൾ (Tetrapods) ഉപയോഗിക്കാറുണ്ടെങ്കിലും, പൂർണമായ സംരക്ഷണത്തിന് കോൺക്രീറ്റ് ഭിത്തികൾ തന്നെയാണ് അത്യന്താപേക്ഷിതമെന്ന് നാട്ടുകാർ ചൂണ്ടിക്കാട്ടുന്നു.
പരാജയപ്പെടുന്ന കരിങ്കൽ ഭിത്തികളും ജിയോ ബാഗുകളും
കരിങ്കൽ ഭിത്തികൾ പരാജയപ്പെടുന്ന സാഹചര്യത്തിൽ പകരമായി ഉപയോഗിക്കുന്ന ജിയോ ബാഗുകൾക്കും പൂർണമായി തീരസംരക്ഷണമൊരുക്കാൻ കഴിഞ്ഞിട്ടില്ല. ഉപ്പളയിലെയും ചേരങ്കൈ കടപ്പുറത്തെയും മണൽ ചാക്കുകൾ കൊണ്ടുള്ള ജിയോ ബാഗ് പ്രതിരോധം ഇതിന് ഉദാഹരണമാണ്. എല്ലായിടത്തും ചെറിയൊരു ഭാഗം 'അവശിഷ്ടം' എന്ന നിലയിൽ കരിങ്കല്ലുകളും ജിയോ ബാഗുകളും മാത്രമാണ് ഇപ്പോൾ അവശേഷിക്കുന്നത്.
ഓരോ വർഷവും കടൽക്ഷോഭ പ്രദേശങ്ങൾ അധികൃതർ സന്ദർശിക്കുമ്പോൾ വർഷങ്ങളായി അനുഭവിക്കുന്ന ദുരിതം ജനങ്ങൾ പറഞ്ഞുകൊണ്ടേയിരിക്കുന്നു. രണ്ട് പതിറ്റാണ്ടുകാലമായിട്ടും അധികൃതർ സന്ദർശനം മാത്രം നടത്തുമ്പോൾ പ്രദേശവാസികൾ സന്ദർശകരെ നോക്കി കൈമലർത്തുകയാണ്. പതിവ് സന്ദർശനം എന്നതിലുപരി തീരദേശ ജനത ബന്ധപ്പെട്ടവരിൽ നിന്ന് കൂടുതലൊന്നും പ്രതീക്ഷിക്കുന്നുമില്ല. മാറിമാറി ഭരണം വരുമെന്നല്ലാതെ തീരസംരക്ഷണ പദ്ധതികളിൽ മാറ്റം വരുന്നില്ലെന്ന് തീരദേശവാസികൾ പറയുന്നു.
കടലെടുക്കുന്ന കോടികൾ
കഴിഞ്ഞ വർഷം രൂക്ഷമായ കടലാക്രമണം നേരിട്ടത് തൃക്കണ്ണാട് കടപ്പുറത്താണ്. നിരവധി വീടുകളാണ് അന്ന് കടലെടുത്തത്. ഒപ്പം തോണികൾ ഉൾപ്പെടെയുള്ള തൊഴിൽ സാമഗ്രികളും മത്സ്യത്തൊഴിലാളികൾക്ക് നഷ്ടപ്പെട്ടു. ഈ വർഷം തുടക്കം തന്നെ തൃക്കണ്ണാട് കടൽക്ഷോഭത്തെ പ്രതിരോധിക്കാനെന്ന പേരിൽ കർണാടകയിൽ നിന്ന് കൊണ്ടുവന്ന് വീണ്ടും കരിങ്കല്ലുകൾ കൊണ്ടിട്ടു. അതും കടലെടുത്തുവെന്നത് അധികൃതരുടെ കണ്ണുതുറപ്പിക്കുന്നില്ല എന്നതിൻ്റെ നേർക്കാഴ്ചയാണ്.
കടലാസിലൊതുങ്ങുന്ന പ്രൊപ്പോസലുകൾ
ചെറുകിട ജലസേചന വകുപ്പ് ജില്ലയിലെ തലപ്പാടി മുതൽ തൃക്കണ്ണാട് വരെയുള്ള തീരത്ത് നടപ്പിലാക്കേണ്ട തീരസംരക്ഷണത്തിനായി സർക്കാരിന് പ്രൊപ്പോസൽ സമർപ്പിച്ച് രണ്ട് വർഷമായി അനുമതിക്കായി കാത്തിരിക്കുകയാണ്. ഇതിനിടയിലാണ് വീണ്ടും 50 ലക്ഷം രൂപ ചെലവിട്ട് തൃക്കണ്ണാട് കരിങ്കല്ല് ഭിത്തി നിർമിച്ചത് എന്നത് ഉദ്യോഗസ്ഥ അലംഭാവം തുറന്നുകാട്ടുന്നു.
മഞ്ചേശ്വരം താലൂക്കിൽ കോയിപ്പാടി, പെറുവാഡ് കടപ്പുറം, ഷിറിയ, കണ്വാതീർഥ, കാസർകോട് താലൂക്കിൽ ഉദുമ കാപ്പിൽ കൊപ്പൽ തുടങ്ങിയ സ്ഥലങ്ങളിൽ ശാസ്ത്രീയമായ കടൽഭിത്തിക്കായിട്ടാണ് ചെറുകിട ജലസേചന വകുപ്പ് സർക്കാരിന് പ്രൊപ്പോസൽ സമർപ്പിച്ചത്. അതേസമയം ജില്ലയിലെ മറ്റുള്ള സ്ഥലങ്ങളിൽ സമർപ്പിച്ച പ്രൊപ്പോസലിൽ പഴയ കരിങ്കല്ല് കൊണ്ടുള്ള കടൽഭിത്തിക്ക് തന്നെയാണ് മുൻഗണന നൽകിയിട്ടുള്ളത്. തീരദേശത്ത് വലിയ കരിങ്കല്ല് കൊണ്ട് നിർമിച്ച സംരക്ഷണഭിത്തിക്ക് പോലും ശക്തമായ കടൽക്ഷോഭത്തിൽ രക്ഷയുണ്ടായിരുന്നില്ല എന്നത് കോയിപ്പാടി കടപ്പുറത്തെ കടൽക്ഷോഭത്തിൽ നിന്ന് മനസിലാക്കാൻ സാധിക്കും.
ഈ വർഷം വലിയപറമ്പ്, തൃക്കണ്ണാട്, ഉദുമ, പള്ളിക്കര, സിപിസിആർഐ, മൊഗ്രാൽപുത്തൂർ കാവ്ഗോളി, കോയിപ്പാടി, ഉപ്പള ശാരദാനഗർ എന്നിവിടങ്ങളിൽ രൂക്ഷമായ കടലാക്രമണമാണ് നേരിട്ടത്. ഇവിടങ്ങളിൽ ഇപ്പോഴും സർക്കാർ ആലോചിക്കുന്നത് ജിയോ ബാഗ് കൊണ്ടുള്ള സംരക്ഷണഭിത്തി ഒരുക്കാനാണ്. ഇത് പൂർണമായി ഫലപ്രദമല്ലെന്ന് തെളിഞ്ഞതിനാൽ തീരദേശവാസികൾക്കിടയിൽ വലിയ പ്രതിഷേധത്തിന് കാരണമായിട്ടുമുണ്ട്.
തീരദേശവാസികളുടെ ഈ ദുരിതവാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.
Article Summary: Kasaragod coastal residents demand concrete seawalls as the primary solution against severe coastal erosion, citing the complete failure of repetitive stone dumping and the partial success of geo-bags.
#KasaragodNews #CoastalErosion #ConcreteSeawall #KeralaFishermen #GeoBags #Thrikkannad #SeaAttack #KeralaGovernment #AparnaNews
