വീട്ടുമുറ്റത്ത് പുലിയുടെ വിളയാട്ടം; നായയെ കടിച്ചെടുത്തു കൊണ്ടുപോയി

കാസർകോട്: (KasargodVartha) ബോവിക്കാനം ഇരിയണ്ണിയിൽ ജനവാസ മേഖലയിലിറങ്ങിയ പുലി വീട്ടുമുറ്റത്ത് വെച്ച് വളർത്തുനായയെ കടിച്ചെടുത്തു കൊണ്ടുപോയി. മുളിയാർ പഞ്ചായത്തിലെ ഇരിയണ്ണി കുണിയേരി പ്രദേശത്താണ് പുലി ഇറങ്ങിയത്. വെള്ളാട്ട് നാരായണന്റെ വീട്ടിലെ വളർത്തുനായയെയാണ് പുലി ആക്രമിച്ചത്. സംഭവത്തിന്റെ ഭീതിപ്പെടുത്തുന്ന സിസിടിവി ദൃശ്യങ്ങൾ ഇപ്പോൾ പുറത്തു വന്നിട്ടുണ്ട്. 2025 ഡിസംബർ 20 ശനിയാ ഴ്ചയാണ് സംഭവം പുറംലോകം അറിയുന്നത്.

വീട്ടുമുറ്റത്തെത്തിയ പുലിയെ കണ്ട് കുരച്ചുകൊണ്ട് വീടിനകത്തേക്ക് ഓടിയ നായയെ പിന്തുടർന്നെത്തിയ പുലി മുറ്റത്ത് വെച്ച് തന്നെ കീഴ്‌പ്പെടുത്തുകയായിരുന്നു. തുടർന്ന് നായയെ കടിച്ചുപിടിച്ചു പുലി കൊണ്ടുപോകുന്നതും വീട്ടിലെ സിസിടിവിയിൽ വ്യക്തമായി പതിഞ്ഞിട്ടുണ്ട്. നായയുടെ നിലവിളി കേട്ടാണ് വീട്ടുകാർ വിവരമറിയുന്നത്.

സംഭവം ശ്രദ്ധയിൽപ്പെട്ടതോടെ വനംവകുപ്പ് ഉദ്യോഗസ്ഥർ ഇരിയണ്ണിയിലെത്തി പരിശോധനകൾ പൂർത്തിയാക്കി. മുളിയാർ ഇരിയണ്ണി മേഖലകളിൽ നേരത്തെയും പലതവണ പുലി ഇറങ്ങിയതായി റിപ്പോർട്ടുകളുണ്ടായിരുന്നു. വീണ്ടും പുലി സാന്നിധ്യം സ്ഥിരീകരിച്ചതോടെ നാട്ടുകാർ വലിയ ഭീതിയിലാണ്. പുലിയെ പിടികൂടാൻ അടിയന്തരമായി കൂട് സ്ഥാപിക്കാനുള്ള നടപടികൾ വനംവകുപ്പ് ആരംഭിച്ചിട്ടുണ്ട്.

പുലി സാന്നിധ്യമുള്ള പ്രദേശമായതിനാൽ നാട്ടുകാർ രാത്രികാലങ്ങളിൽ പുറത്തിറങ്ങുമ്പോൾ ജാഗ്രത പാലിക്കണമെന്ന് വനംവകുപ്പ് അധികൃതർ മുന്നറിയിപ്പ് നൽകി. കുട്ടികളുടെയും വളർത്തുമൃഗങ്ങളുടെയും കാര്യത്തിൽ പ്രത്യേക ശ്രദ്ധ വേണമെന്നും നിർദ്ദേശമുണ്ട്. വനംവകുപ്പിന്റെ നേതൃത്വത്തിൽ പ്രദേശത്ത് നിരീക്ഷണം ശക്തമാക്കാനാണ് തീരുമാനം.

ബോവിക്കാനം ഇരിയണ്ണിയിൽ പുലിയിറങ്ങി വളർത്തുനായയെ കൊണ്ടുപോയ ദൃശ്യങ്ങൾ ഉൾപ്പെടെയുള്ള ഈ വാർത്ത ഷെയർ ചെയ്ത് ജാഗ്രത നിർദ്ദേശം നൽകൂ.

Article Summary: Leopard snatches dog in Iriyanni, Kasaragod; CCTV visuals viral.

#Kasaragod #Bovikanam #LeopardAttack #ForestDepartment #KeralaNews