കിണറ്റിൽ വീണ ലീഗൽ മെട്രോളജി ഉദ്യോഗസ്ഥൻ മുങ്ങി മരിച്ചു; സഹായിക്കാൻ ഇറങ്ങിയ അനുജനെ നാട്ടുകാർ രക്ഷപ്പെടുത്തി

കുമ്പള: (KasargodVartha) കിണറ്റിൽ വീണ ലീഗൽ മെട്രോളജി വകുപ്പ് ഉദ്യോഗസ്ഥൻ മുങ്ങി മരിച്ചു. ഇദ്ദേഹത്തെ രക്ഷപ്പെടുത്താൻ കിണറ്റിൽ ഇറങ്ങിയ അനുജൻ കിണറിൽ കുടുങ്ങിയെങ്കിലും നാട്ടുകാരുടെ അവസരോചിതമായ ഇടപെടൽ കാരണം രക്ഷപ്പെട്ടു. കാസർകോട് ലീഗൽ മെട്രോളജി വകുപ്പ് ഉദ്യോഗസ്ഥനും കുമ്പള നായ്ക്കാപ്പ് നാരായണ മംഗലത്തെ താമസക്കാരനുമായ വിവേക് (32) ആണ് മരിച്ചത്.

ഞായറാഴ്ച (19.10.2025) രാത്രി 8.30 മണിയോടെ വീട്ടു മുറ്റത്തെ കിണറ്റിലാണ് സംഭവം. വിവേക് കിണറ്റിൽ ചാടുകയായിരുന്നുവെന്നും പറയുന്നുണ്ട്. ജ്യേഷ്ഠൻ കിണറിൽ വീണത് കണ്ട അനുജൻ തേജസ്, സമീപത്തുണ്ടായിരുന്ന കയർ എടുത്ത് കിണറിലേക്ക് രക്ഷപ്പെടുത്താൻ ഇറങ്ങുകയായിരുന്നു.

ഇതിനിടയിൽ, കിണറിൽ കുടുങ്ങിയ തേജസിനെ നാട്ടുകാർ എത്തി കയർ ഉപയോഗിച്ച് രക്ഷപ്പെടുത്തി. ഇതിന്‍റെ ഫലമായി, തേജസിന് കാര്യമായ പരിക്കേൽക്കാതെ പുറത്തെത്താൻ സാധിച്ചു. വിവേകിനെ കിണറിൽ നിന്ന് പുറത്തെടുക്കാൻ ശ്രമിച്ചെങ്കിലും പരാജയപ്പെടുകയായിരുന്നു.

പിന്നീട്, ഉപ്പളയിൽ നിന്നെത്തിയ അഗ്‌നിരക്ഷാ സേനയാണ് വിവേകിന്റെ മൃതദേഹം കിണറ്റിൽ നിന്ന് പുറത്തെടുത്തത്. തുടർ നടപടികൾക്കായി മൃതദേഹം കാസർകോട് ജനറൽ ആശുപത്രി മോർച്ചറിയിലേക്ക് മാറ്റി. സംഭവത്തിൽ കുമ്പള പൊലീസ് അന്വേഷണം ആരംഭിച്ചിട്ടുണ്ട്.

ശ്രദ്ധിക്കുക: സ്വയം ജീവനൊടുക്കുന്നത് ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. അത്തരം ചിന്തകളുളളപ്പോള്‍ 'ദിശ' ഹെല്‍പ് ലൈനില്‍ വിളിക്കുക. ടോൾ ഫ്രീ ഹെൽപ് ലൈൻ നമ്പർ: 1056, 0471-2552056

കിണർ അപകടങ്ങളെക്കുറിച്ച് നിങ്ങളുടെ പ്രദേശത്തെ ജനങ്ങൾക്ക് അവബോധം നൽകാനായി ഈ വാർത്ത ഷെയർ ചെയ്യുക.

Article Summary: Legal Metrology Officer S Sanu drowns in well; brother rescued by locals.

#KasargodNews #Kumbala #DrowningAccident #LegalMetrology #FireForceRescue #Tragedy