മണല്‍ ക്ഷാമം: ജില്ലാ ഭരണകൂടം ജനങ്ങളെ പെരുവഴിയിലാക്കി: എ.അബ്ദുര്‍ റഹ്മാന്‍
Jul 23, 2012, 18:59 IST
സുതാര്യമായി മണല്‍ ലഭ്യമാക്കാനും അനധികൃത മണല്‍കടത്ത് തടയാനുമെന്ന പേരില്‍ ജില്ലാ ഭരണകൂടം നടപ്പിലാക്കിയ ഇ- മണല്‍ സംവിധാനം നിര്‍മ്മാണ മേഖലയെ പാടെ തകിടം മറിച്ചിരിക്കുകയാണ്. പുതിയ സംവിധാനം വരുന്നതിന് മുമ്പ് ജനങ്ങള്‍ക്ക് 3000 രൂപക്ക് ലഭിച്ചിരുന്ന പണലിന് ഇപ്പോള്‍ 13,000 രൂപ മുതല്‍ 18,000 രൂപവരെ നല്‍കേണ്ടിവരുന്ന അവസ്ഥയാണുള്ളത്. ഇതും ആവശ്യത്തിന് ലഭിക്കാത്ത സാഹചര്യം നിലനില്‍ക്കുന്നു. നേരത്തെ യഥേഷ്ടം മണല്‍ ലഭിക്കുമായിരുന്ന ഘട്ടത്തില്‍ പ്രവൃത്തി ആരംഭിച്ച വീടുകളുടെയും മറ്റു കെട്ടിടങ്ങളുടെയും നിര്‍മ്മാണം കടുത്ത മണല്‍ക്ഷാമം മൂലം സ്തംഭിച്ചിരിക്കുകയാണ്.
ആവശ്യത്തിന് മണല്‍ ലഭിക്കാത്തതുമൂലം പാവപ്പെട്ട കുടുംബങ്ങള്‍ വീട് നിര്‍മ്മാണത്തിന് കരുതിയ മുഴുവന്‍ പണവും മണലിന് നല്‍കേണ്ട സ്ഥിതിയാണുള്ളത്. ഇതുമൂലം പാതിവഴിയില്‍ നിര്‍മ്മാണം നിലച്ച നൂറുക്കണക്കിന് സാധാരണക്കാരായ വീട്ടുടമകള്‍ ദുരിതമനുഭവിക്കുകയാണ്. നിര്‍മ്മാണം ആരംഭിച്ച് പൂര്‍ത്തിയാക്കാന്‍ കഴിയാത്തവരും മേല്‍ക്കൂര കോണ്‍ക്രീറ്റ് ചെയ്യാന്‍ കമ്പികെട്ടി കാത്തിരിക്കുന്നവരും ധനകാര്യ സ്ഥാപനങ്ങളില്‍നിന്നും വായ്പയെടുത്ത് പ്രവര്‍ത്തി നടത്താന്‍ സാധിക്കാത്തതിനാല്‍ ഗഡുകള്‍ ലഭ്യമാകാത്തവരുമായ സാധാരണക്കാരായ ജനങ്ങള്‍ ജില്ലാ ഭരണകൂടത്തിന്റെ മണല്‍ പരിഷ്‌ക്കാരം മൂലം പെരുവഴിയിലായിരിക്കുകയാണ്.
മണല്‍ മാഫിയയും ജില്ലാ ഭരണകൂടത്തിലെ ചില ഉദ്യോഗസ്ഥരും തമ്മിലുള്ള ഒത്തുകളിമൂലമാണ് ഈ ദുരവസ്ഥയുണ്ടായതെന്ന് ജനങ്ങള്‍ സംശയിക്കുന്നു. ഇക്കാര്യം പരിശോധിച്ച് ആവശ്യക്കാര്‍ക്ക് ന്യായമായ വിലക്ക് യഥാസമയം മണല്‍ ലഭ്യമാക്കാനും അനധികൃത മണല്‍ കടത്ത് തടയുന്നതിനും ഈ മേഖലയിലെ പകല്‍ കൊള്ള അവസാനിപ്പിക്കുന്നതിനും തൊഴിലാളികളെ സംരക്ഷിക്കുന്നതിനും ആവശ്യമായ നടപടി സ്വീകരിക്കാന്‍ ബന്ധപ്പെട്ടവര്‍ക്ക് നിര്‍ദ്ദേശം നല്‍കണമെന്ന് അബ്ദുര്‍ റഹ്മാന്‍ ആവശ്യപ്പെട്ടു.
Keywords: Kasaragod, A. Abdul Rahman, IUML, Sand.
Tags
Share this story
