ചെമ്മനാടിൻ്റെ പരിഷ്കരണ ചരിത്രം സ്വാനുഭവങ്ങളിലൂടെ പങ്കുവെച്ച് പ്രമുഖ പണ്ഡിതൻ; ഗുരുവിന് ശിഷ്യൻ്റെ സ്നേഹസമ്മാനമായി പുതിയ ഗ്രന്ഥം; കെ വി അബൂബക്കർ ഉമരിയുടെ ജീവചരിത്രം; 'അറിവടയാളങ്ങൾ' പ്രകാശനം 26-ന്

കാസർകോട്: (KasargodVartha) പ്രമുഖ പണ്ഡിതനും വിദ്യാഭ്യാസ പ്രവർത്തകനും പ്രഭാഷകനും അധ്യാപകനുമായ കെ വി അബൂബക്കർ ഉമരിയുടെ ജീവിതം പുസ്തകമാകുന്നു. 'അറിവടയാളങ്ങൾ' എന്ന പേരിലാണ് ആത്മകഥ പ്രസിദ്ധീകരണത്തിന് ഒരുങ്ങുന്നത്. ആലിയ അറബിക് കോളേജിന്റെ വിദ്യാർത്ഥി, അധ്യാപകൻ, പ്രിൻസിപ്പൽ, റെക്ടർ, മാനേജിങ് കമ്മിറ്റി അംഗം, വൈസ് പ്രസിഡന്റ് എന്നീ നിലകളിൽ 55 വർഷത്തോളം വൈജ്ഞാനിക സേവനം നിർവ്വഹിച്ച വ്യക്തിത്വമാണ് കെ വി അബൂബക്കർ ഉമരി. വലിയ ശിഷ്യസമ്പത്തുള്ള അദ്ദേഹത്തിന്റെ സമർപ്പിത ജീവിതവും വൈജ്ഞാനിക ഇടപെടലുകളുമാണ് പുസ്തകത്തിന്റെ പ്രധാന പ്രമേയം.

ചെമ്മനാടിന്റെ ചരിത്രം

കേവലം വ്യക്തിനിഷ്ഠ ആത്മകഥ എന്നതിനപ്പുറം, പൊതുവിൽ കാസർകോടിന്റെയും സവിശേഷമായി ചെമ്മനാട് ഗ്രാമത്തിന്റെയും സാമൂഹിക-സാംസ്കാരിക നവോത്ഥാന ചരിത്രമാണ് ഗ്രന്ഥം അനാവരണം ചെയ്യുന്നത്. കഴിഞ്ഞ നൂറ്റാണ്ടിന്റെ തുടക്കത്തിൽ തന്നെ നവോത്ഥാന മുന്നേറ്റങ്ങൾക്ക് സാക്ഷ്യം വഹിച്ച പ്രദേശമാണ് ചെമ്മനാട്. വൈഎംഎംഎ, എംഎസ്എസ്, വയോജന ക്ലാസുകൾ തുടങ്ങിയ നിരവധി സംവിധാനങ്ങളാണ് ഈ ഭാഗങ്ങളിലെ വൈജ്ഞാനിക സാമൂഹ്യ മുന്നേറ്റങ്ങൾക്ക് കരുത്തു പകർന്നത്. ചെമ്മനാടിന്റെ പരിഷ്കരണ ചരിത്രം സ്വാനുഭവങ്ങളിലൂടെ ഇതിൽ അടയാളപ്പെടുത്തുന്നു എന്നത് പുസ്തകത്തിന്റെ പ്രത്യേകതയാണ്. 1930-40 കാലഘട്ടത്തിൽ വിദ്യാഭ്യാസ നവോത്ഥാനത്തിന് വിസ്മയകരമായ തുടക്കമിടുകയും പ്രതിസന്ധികളെ മറികടന്ന് 85 വർഷങ്ങൾ പിന്നിടുകയും ചെയ്ത ആലിയ അറബിക് കോളേജിന്റെ നാൾവഴികളും ഗ്രന്ഥത്തിൽ കൃത്യമായി വിവരിക്കുന്നതായി ബന്ധപ്പെട്ടവർ വാർത്താസമ്മേളനത്തിൽ പറഞ്ഞു.

ഗുരുവിന് ശിഷ്യന്റെ സ്നേഹ സമ്മാനം

ആലിയയിലെ പൂർവ്വ വിദ്യാർത്ഥിയായ സദ്റുദ്ദീൻ വാഴക്കാടാണ് പുസ്തകം തയ്യാറാക്കിയിരിക്കുന്നത്. വിദ്യാർത്ഥി തന്റെ ഗുരുനാഥന് സമർപ്പിക്കുന്ന സ്നേഹ സമ്മാനം കൂടിയാണ് ഈ ആത്മകഥ. എഴുത്തുകാരനും പ്രഭാഷകനുമായ സദ്റുദ്ദീൻ വാഴക്കാടിന്റെ 17-ാമത് പുസ്തകമാണിത്. അൽ ആലിയ അലുംനി അസോസിയേഷനാണ് പുസ്തകം പ്രസിദ്ധീകരിക്കുന്നത്. 385 പേജുകളിലായി 42 അധ്യായങ്ങളാണ് പുസ്തകത്തിലുള്ളത്. കേരളീയ സാമൂഹിക-വിദ്യാഭ്യാസ ചരിത്രം പഠിക്കുന്നവർക്കും, കാസർകോടിന്റെ നവോത്ഥാന ചരിത്രം അന്വേഷിക്കുന്നവർക്കും ഈ ഗ്രന്ഥം വലിയ മുതൽക്കൂട്ടാകുമെന്ന് ഗ്രന്ഥകർത്താവ് സദ്റുദ്ദീൻ വാഴക്കാട് പറഞ്ഞു. 2026 സെപ്റ്റംബർ 26 ശനിയാഴ്ച വൈകീട്ട് 4.30 ന് പരവനടുക്കം ആലിയ ക്യാമ്പസിൽ വെച്ച് വിപുലമായ പരിപാടികളോടെ പുസ്തകം പ്രകാശനം ചെയ്യും.

സദ്റുദ്ദീൻ വാഴക്കാടിന്റെ മറ്റു കൃതികൾ
* പത്മശ്രീ അലി മണിക്ഫാൻ; കണ്ടുപിടുത്തങ്ങളുടെ കപ്പിത്താൻ (ബിഎസ്എം ട്രസ്റ്റ്)
* സംവാദത്തിന്റെ സംസ്കാരം (ഐപിഎച്ച്)
* കമലാ സുരയ്യ സഫലം ഈ യാത്ര (വചനം ബുക്സ്)
* കമലാ സുരയ്യ സംസാരിക്കുന്നു (തിരൂരങ്ങാടി ബുക്സ്)
* നവോത്ഥാന ധർമ്മങ്ങൾ (ഐപിഎച്ച്)
* പ്രസ്ഥാന യാത്രകൾ (ഐപിഎച്ച്)
* നടന്നു തീരാത്ത വഴികൾ (ഐപിഎച്ച്)
* നിലപാടുള്ള പ്രസ്ഥാനം (ഐപിഎച്ച്)
* ജീവിതം തൊട്ടറിയാൻ (ബിഎസ്എം ട്രസ്റ്റ്)
* ഇസ്ലാമിലെ ത്വരീഖത്തും ത്വരീഖത്തിലെ ഇസ്ലാമും (വചനം ബുക്സ്)
* നക്ഷത്രങ്ങളുടെ ആത്മകഥ (ഐപിഎച്ച് ബുക്സ്)
* ജ്ഞാനാന്വേഷിയുടെ സേവന യാത്രകൾ (ബിഎസ്എം ട്രസ്റ്റ്)
* കെ ടി അന്ത്രു മൗലവിയും പരിഷ്കരണ പ്രവർത്തകരും (കാരുണ്യ സെന്റർ)
* വേദസാരം (ഐപിഎച്ച് ബുക്സ്)

വാർത്താസമ്മേളനത്തിൽ സദ്റുദ്ദീൻ വാഴക്കാട്, സംഘാടക സമിതി വൈസ് ചെയർമാൻ ബദറു മുനീർ, ജനറൽ കൺവീനർ പി കെ അബ്ദുല്ല, കൺവീനർമാരായ ഷഫീക്ക് നസറുല്ലാഹ്, സെമീഹുല്ലാഹ് കെ വി, പ്രോഗ്രാം കമ്മിറ്റി ചെയർമാൻ ബി എച്ച് അബ്ദുൽ ഖാദർ, സാമ്പത്തിക കമ്മിറ്റി ചെയർമാൻ ജാഫർ പടുപ്പ് എന്നിവർ പങ്കെടുത്തു.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: The biography of prominent scholar and educator K.V. Aboobacker Umari, titled 'Arivadayalangal', authored by his student Sadruddin Vazhakkad, is set to be released on September 26, 2026, at the Alia campus in Paravanadukkam. The 385-page book highlights his 55 years of service at Alia Arabic College and explores the socio-cultural renaissance history of Kasaragod, specifically the Chemmanad village.

#KVAboobackerUmari #Arivadayalangal #KasaragodNews #AliaArabicCollege #BookRelease #MalayalamNews #Kvartha #Chemmanad #RenuNews