Tribute | 'കൂറത്ത് തങ്ങൾ: അഹ്ലുസ്സുന്നയ്ക്ക് മാതൃകയായ നേതാവ്'

പുത്തിഗെ:(KasaragodVartha) സയ്യിദ് ഫസൽ കോയമ്മ തങ്ങൾ അൽ ബുഖാരി (കൂറത്ത് തങ്ങൾ) അഹ്ലുസ്സുന്നയ്ക്ക് മാതൃകയായ നേതാവായിരുന്നുവെന്ന് സമസ്ത കർണാടക ജനറൽ സെക്രട്ടറി കെ പി ഹുസൈൻ സഅദി കെ സി റോഡ് അഭിപ്രായപ്പെട്ടു. പ്രതിസന്ധി ഘട്ടങ്ങളിൽ തങ്ങൾ കാണിച്ച ആർജ്ജവവും ലളിത ജീവിതവും കർമ്മനിഷ്ഠയും അദ്ദേഹം പ്രശംസിച്ചു.

പുത്തിഗെയിൽ സംഘടിപ്പിച്ച അനുസ്‌മരണ ആത്മീയ സമ്മേളനത്തിൽ മുഖ്യ പ്രഭാഷണം നടത്തിയ കെ പി ഹുസൈൻ സഅദി, തങ്ങളുടെ ജീവിതം അശരണർക്കും ആലംബഹീനർക്കും കരുണയുടെയും സാന്ത്വനത്തിന്റെയും പുതിയ ഏടുകൾ സമ്മാനിച്ചതാണെന്ന് പറഞ്ഞു.
സിയാറത്ത്, അനുസ്‌മരണ പ്രഭാഷണം, ഖത്മുൽ ഖുർആൻ, മഹ്‌ളറത്തുൽ ബദ്‌രിയ്യ, കൂട്ട പ്രാർത്ഥന, തബറുക് തുടങ്ങിയ പരിപാടികൾ സമ്മേളനത്തിൽ ഉണ്ടായിരുന്നു.

മുഹിമ്മാത്ത് ട്രഷറർ ഹാജി അമീറലി ചൂരിയുടെ അധ്യക്ഷതയിൽ നടന്ന സമ്മേളനം കേരള മുസ്ലിം ജമാഅത്ത് സംസ്ഥാന വൈസ് പ്രസിഡന്റ് ബി എസ് അബ്ദുല്ല കുഞ്ഞി ഫൈസി ഉദ്ഘാടനം ചെയ്തു. അബൂബക്കർ കാമിൽ സഖാഫി സ്വാഗതം പറഞ്ഞു.
സമ്മേളനത്തിൽ വൈ എം അബ്ദുൽ റഹ്മാൻ അഹ്‌സനി, അബ്ദുൽ ഖാദിർ സഖാഫി മൊഗ്രാൽ, സുലൈമാൻ കരിവെള്ളൂർ, അബ്ദുസ്സലാം അഹ്‌സനി പഴമള്ളൂർ, സയ്യിദ് മുനീർ അഹ്ദൽ തങ്ങൾ, സയ്യിദ് ഹാമിദ് അൻവർ അഹ്ദൽ തങ്ങൾ, മുസ്തഫ സഖാഫി പട്ടാമ്പി, അബ്ബാസ് സഖാഫി മണ്ടമ, ജമാൽ സഖാഫി പെർവാഡ് തുടങ്ങിയവർ പങ്കെടുത്തു.