കുമ്പള ടോൾ സമരം കടുപ്പിക്കുന്നു! റിപ്പബ്ലിക് ദിനത്തിൽ വനിതാ മാർച്ച് നടത്തും; കോടതിയിലെ ഹർജിയെച്ചൊല്ലി എസ്ഡിപിഐയും ആക്ഷൻ കമ്മിറ്റിയും തമ്മിൽ കൊമ്പുകോർത്തു

കുമ്പള (KasargodVartha): ആരിക്കാടിയിലെ ജനവിരുദ്ധ ടോൾ പ്ലാസയ്ക്കെതിരായ പ്രക്ഷോഭം ശക്തമാക്കാൻ ടോൾഗേറ്റ് വിരുദ്ധ സമരസമിതി തീരുമാനിച്ചു. കോടതി വിധി നീണ്ടുപോവുകയും ഫാസ്റ്റ് ടാഗ് വഴി ടോൾ പിരിവ് നിർബാധം തുടരുകയും ചെയ്യുന്ന സാഹചര്യത്തിലാണ് സമരം വ്യാപിപ്പിക്കാൻ ആക്ഷൻ കമ്മിറ്റി തീരുമാനിച്ചത്. റിപ്പബ്ലിക് ദിനത്തിൽ ജില്ലയിലെ മുഴുവൻ വനിതാ സംഘടനകളെയും കൂട്ടായ്മകളെയും ഉൾപ്പെടുത്തി ടോൾ പ്ലാസയിലേക്ക് വനിതാ മാർച്ച് സംഘടിപ്പിക്കും.
ടോൾ പ്ലാസ പൂട്ടുന്നത് വരെ പ്രക്ഷോഭം മുന്നോട്ട് കൊണ്ടുപോകാനും നിയമപോരാട്ടം ശക്തമാക്കാനും കുമ്പള ഖുബ ഹാളിൽ ചേർന്ന ആക്ഷൻ കമ്മിറ്റി യോഗം തീരുമാനിച്ചു. മൂന്നാം ഘട്ട സമരപരിപാടികളുടെ ഭാഗമായി ജില്ലയിൽ ഹർത്താൽ ഉൾപ്പെടെയുള്ള കാര്യങ്ങൾ ആലോചനയിലുണ്ട്.

ഹർജിയെച്ചൊല്ലി തർക്കം 

ടോൾ പ്ലാസയ്ക്കെതിരെ ഹൈക്കോടതിയിൽ സമർപ്പിച്ച ഹർജികളെച്ചൊല്ലി ടോൾഗേറ്റ് വിരുദ്ധ സമരസമിതിയും എസ്ഡിപിഐയും തമ്മിലുള്ള തർക്കം സാമൂഹ്യമാധ്യമങ്ങളിൽ ചർച്ചയയിട്ടുണ്ട്. ജനുവരി 28-ന് കോടതി പരിഗണിക്കുന്നത് തങ്ങളുടെ ഹർജിയാണെന്നാണ് അവകാശപ്പെടുന്നത്.
എസ്ഡിപിഐ കുമ്പള പഞ്ചായത്ത് പ്രസിഡന്റ് നാസർ ബംബ്രാണ നൽകിയ പരാതിയുടെ അടിസ്ഥാനത്തിലാണ് കേസ് പരിഗണിക്കുന്നതെന്നാണ് എസ്ഡിപിഐയുടെ വാദം. എന്നാൽ, തുടക്കം മുതൽ തങ്ങൾ നൽകിയ ഹർജിയിന്മേലുള്ള വാദമാണ് ഇപ്പോൾ നടക്കുന്നതെന്ന് ആക്ഷൻ കമ്മിറ്റി ഭാരവാഹികൾ വാട്സ്ആപ്പ് ഗ്രൂപ്പുകളിലൂടെയും മറ്റും വ്യക്തമാക്കുന്നു. രണ്ട്പേരുടെയും ഇത് സംബന്ധിച്ച വീഡിയോ ഏതാനും ദിവസങ്ങളായി ഗ്രൂപ്പുകളിൽ പ്രചരിക്കുന്നുണ്ട്.

കോടതിയിലെ വാദങ്ങൾ 

ടോൾ പ്ലാസയുടെ നിർമ്മാണം പൂർത്തിയായതിനാൽ ടോൾ പിരിക്കാൻ അനുമതി നൽകണമെന്നും ഹർജിക്കാരുടെ വാദം ബാലിശമാണെന്നുമാണ് ദേശീയപാത അതോറിറ്റിയുടെ അഭിഭാഷകൻ കോടതിയിൽ വാദിച്ചത്. എന്നാൽ, സർവീസ് റോഡ് പോലുമില്ലാതെ എന്തിനാണ് ടോൾ പിരിക്കുന്നതെന്നാണ് കോടതി ചോദിച്ചത്. ഹർജിക്കാരുടെ മുതിർന്ന അഭിഭാഷകർ എൻഎച്ച്എഐയുടെ വാദത്തെ ശക്തമായി എതിർത്തു. വിഷയത്തിൽ വിശദമായ വാദം ആവശ്യമായതിനാൽ ജസ്റ്റിസ് ബച്ചു കുര്യൻ തോമസ് കേസ് ജനുവരി 28-ലേക്ക് മാറ്റുകയായിരുന്നു.

സമരസമിതി യോഗം 

കുമ്പളയിൽ ചേർന്ന യോഗത്തിൽ ആക്ഷൻ കമ്മിറ്റി ജനറൽ കൺവീനർ സി.എ സുബൈർ അധ്യക്ഷത വഹിച്ചു. അഷ്റഫ് കർള, അസീസ് കളത്തൂർ, എ.കെ ആരിഫ്, വി.പി അബ്ദുൽ ഖാദർ, ലക്ഷ്മണ പ്രഭു, താജുദ്ദീൻ മൊഗ്രാൽ, അബ്ദുല്ലത്തീഫ് കുമ്പള, ബി.എൻ മുഹമ്മദലി, ഫാറൂഖ് ഷിറിയ, കെ.വി യൂസുഫ്, സത്താർ ആരിക്കാടി, മുഹമ്മദ് കുഞ്ഞി തുടങ്ങിയവർ സംബന്ധിച്ചു.

അന്യായമായ ടോൾ പിരിവിനെതിരെ നേരത്തെ സമരസമിതി നടത്തിയ പ്രക്ഷോഭത്തെത്തുടർന്ന് സംഘർഷമുണ്ടാവുകയും ടോൾ പിരിവ് താൽക്കാലികമായി നിർത്തിവെക്കുകയും ചെയ്തിരുന്നു. പൊതുമുതൽ നശിപ്പിച്ചെന്നാരോപിച്ച് കമ്പനി അധികൃതർ നൽകിയ പരാതിയിൽ കുമ്പള പോലീസ് കേസെടുക്കുകയും രണ്ട് പേരെ അറസ്റ്റ് ചെയ്യുകയും ചെയ്തിരുന്നു. ഇവരെ അന്ന് തന്നെ ജാമ്യത്തിൽ വിടുകയും ചെയ്തിരുന്നു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. പുതിയ അപ്‌ഡേറ്റുകൾ ഉടൻ ലഭിക്കാൻ ഞങ്ങളുടെ ഫേസ്ബുക്ക് പേജ് ഫോളോ ചെയ്യുക. ഈ വാർത്ത സുഹൃത്തുകൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Action Committee to hold women's march to Kumbala Toll Plaza on Republic Day; dispute arises between SDPI and Action Committee over ownership of the court petition listed for January 28.

#KumbalaTollPlaza #KasaragodNews #TollProtest #RepublicDayMarch #ActionCommittee #SDPI