വമ്പൻ നിരക്കുമായി കുമ്പള ടോൾപ്ലാസ ബുധനാഴ്ച മുതൽ യൂസർ ഫീസ് ഈടാക്കി തുടങ്ങും; സമരസമിതിയുടെ അപ്പീൽ ഹർജിയിൽ വിധി പറയുന്നത് 14 ന്

കാസർകോട്: (KasargodVartha) ദേശീയപാത 66-ൽ കാസർകോട് ജില്ലയിലെ കുമ്പള ടോൾപ്ലാസയിൽ യൂസർ ഫീസ് ഈടാക്കുന്നത് 2025 നവംബർ 12ന് രാവിലെ എട്ട് മണി മുതൽ ആരംഭിക്കും. ഭാരത സർക്കാർ ഗതാഗത-ദേശീയപാത മന്ത്രാലയം പുറത്തിറക്കിയ എസ്.ഒ.5037(ഇ) (04.11.2025) എന്ന വിജ്ഞാപനം അനുസരിച്ചാണ് ഈ നടപടി. ചൊവ്വാഴ്ച ഇറങ്ങിയ പത്രങ്ങളിൽ പരസ്യം നൽകിയാണ് ദേശീയപാത അതോറിറ്റി ഓഫ് ഇന്ത്യ (NHAI) ഈ വിവരം പൊതുജനങ്ങളെ അറിയിച്ചത്.

തലപ്പാടി മുതൽ ചെങ്കള വരെയുള്ള (എൻ.എച്ച്. 66–ലെ 00.00 മുതൽ 39.00 കിലോമീറ്റർ വരെ) റോഡ് ഭാഗത്തിനാണ് ഫീസ് ബാധകമാകുന്നത്. കുമ്പള ഗ്രാമത്തിലെ 20.00 കിലോമീറ്റർ ചെയിനേജ് ഭാഗത്താണ് ടോൾപ്ലാസ സ്ഥിതി ചെയ്യുന്നത്.

സമരസമിതിയുടെ നിയമനടപടിയും ടോൾ പിരിവും

ടോൾ പിരിവ് ആരംഭിക്കുന്ന ബുധനാഴ്ച കഴിഞ്ഞ് രണ്ടദിവസമാണ് ടോൾ പ്ലാസയ്ക്കെതിരെ സമരസമിതി ഹൈക്കോടതി ഡിവിഷൻ ബെഞ്ചിന് നൽകിയിട്ടുള്ള അപ്പീൽ ഹർജിയിൽ വിധി പ്രതീക്ഷിക്കുന്നത് എന്ന പ്രത്യേകതയുണ്ട്. കോടതി വിധി അനുകൂലമാകുമെന്ന ആത്മവിശ്വാസത്തോടെയാണ് ടോൾ പിരിവ് തുടങ്ങാൻ ധൃതിപ്പെട്ട് ദേശീയപാത അതോറിറ്റി തീരുമാനിച്ചതെന്നാണ് വിലയിരുത്തൽ.

നിലവിൽ 60 കിലോമീറ്റർ ദൂരത്തിനുള്ളിൽ രണ്ട് ടോൾ പ്ലാസകൾക്ക് ഫീസ് നൽകേണ്ടി വരുന്നുവെന്നതാണ് സമരസമിതിയുടെ പ്രധാന ആക്ഷേപം. ഇത് നിയമലംഘനമാണെന്നും സമരസമിതി ചൂണ്ടിക്കാട്ടുന്നു. ടോൾപ്ലാസയ്ക്കെതിരെ ജനകീയ സമരങ്ങൾ പല തവണ അരങ്ങേറിയിരുന്നു.

പുതിയ യൂസർ ഫീസ് നിരക്കുകൾ (രൂപയിൽ)

ദേശീയപാത അതോറിറ്റി പുറത്തുവിട്ട പുതിയ യൂസർ ഫീസ് നിരക്കുകൾ വാഹന വിഭാഗങ്ങൾ അനുസരിച്ച് താഴെ നൽകുന്നു:

ടോൾ പ്ലാസയിൽ നിന്ന് 20 കിലോമീറ്റർ ചുറ്റളവിലുള്ള വാണിജ്യേതര വാഹന ഉടമകൾക്ക് പ്രതിമാസം ₹340 അടച്ച് പാസ് എടുക്കാനുള്ള സൗകര്യവും ഉണ്ട്.

ഇളവുകളും മറ്റ് വ്യവസ്ഥകളും

• ഇളവുകൾ: 24 മണിക്കൂറിനകം തിരിച്ചുപോകുന്ന വാഹനങ്ങൾക്ക് ടോൾ നിരക്കിൽ 50% ഇളവ് ലഭിക്കും. മാസപാസ് എടുക്കുന്ന വാഹനങ്ങൾക്ക് 50 യാത്രകൾക്ക് 33% ഇളവും അനുവദിച്ചിട്ടുണ്ട്. ടോൾ പ്ലാസ സ്ഥിതി ചെയ്യുന്ന ജില്ലയിൽ രജിസ്റ്റർ ചെയ്ത, നാഷണൽ പെർമിറ്റ് ഇല്ലാത്ത വ്യവസായിക വാഹനങ്ങൾക്ക് 50% ഇളവ് ലഭിക്കും.

• വാർഷിക പാസ്: വ്യാവസായിക വാഹനങ്ങൾ ഒഴികെയുള്ളവയ്ക്ക് 'രാജ്മാർഗ് യാത്ര ആപ്പ്' (Rajmarg Yatra App) വഴി ₹3000 രൂപയുടെ വാർഷിക പാസ് ലഭ്യമാണ്. ഈ പാസ് 200 പ്രാവശ്യം അല്ലെങ്കിൽ ഒരു വർഷം – ഏത് ആദ്യം വരുന്നുവോ അത്രകാലം – സാധുവായിരിക്കും.

• ഒഴിവാക്കപ്പെട്ട വാഹനങ്ങൾ: 2020 ഡിസംബർ 3-ലെ ജി.എസ്.ആർ. 950(ഇ) വിജ്ഞാപനം പ്രകാരമുള്ള ആംബുലൻസ്, അഗ്നിശമന സേനയുടെ വാഹനങ്ങൾ, സർക്കാർ വാഹനങ്ങൾ തുടങ്ങിയവയ്ക്ക് ടോൾ നൽകേണ്ടതില്ല.

• അധിക ഫീസ്: അനുവദനീയമായ ഭാരം കവിയുന്ന വാഹനങ്ങൾ 2015 സെപ്റ്റംബർ 25-ലെ ജി.എസ്.ആർ. 920(ഇ) പ്രകാരമുള്ള അധിക ഫീസ് അടച്ച് മാത്രമേ റോഡ് ഉപയോഗിക്കാൻ പാടുള്ളൂ.

പരാതികൾക്കും വിവരങ്ങൾക്കും പ്രോജക്ട് ഡയറക്ടർ, ദേശീയപാത അതോറിറ്റി ഓഫ് ഇന്ത്യ (NHAI), കണ്ണൂർ ഓഫീസുമായി ബന്ധപ്പെടാവുന്നതാണ്.

വിലാസം: പ്രോജക്ട് ഡയറക്ടർ, ദേശീയപാത അതോറിറ്റി ഓഫ് ഇന്ത്യ (NHAI), ബിൽഡിംഗ് നമ്പർ 3460, 'സഹിറ', ദിനേഷ് ഓഡിറ്റോറിയത്തിന് സമീപം, സിവിൽ സ്റ്റേഷൻ പി.ഒ., കണ്ണൂർ – 670002. ഫോൺ: 0497-2940045 വെബ്സൈറ്റ്: http://tis(dot)nhai(dot)gov(dot)in

അതേസമയം വിഷയത്തിൽ ജില്ലാ കലക്ടറുമായും പൊലീസ് ചീഫുമായും സംസാരിച്ചതായും ബുധനാഴ്ച ടോൾ പിരിവ് തുടങ്ങാൻ നാട്ടുകാരും സമരസമിതിയും അനുവദിക്കില്ലെന്നും തടയുമെന്നും അറിയിച്ചതായും മഞ്ചേശ്വരം എം എൽ എ എകെഎം അശ്റഫ് പറഞ്ഞു. കോടതി വിധി വെള്ളിയാഴ്ച പ്രതീക്ഷിക്കുന്ന സാഹചര്യത്തിൽ അതുവരെ ടോൾ പിരിക്കില്ലെന്ന് കലക്ടറും എസ്പിയും പിന്നീട് അറിയിച്ചതായും എംഎൽഎ കൂട്ടിച്ചേർത്തു.

കുമ്പള ടോൾപിരിവ്‌ ആരംഭിക്കുന്നതിനെക്കുറിച്ച്‌ നിങ്ങളുടെ അഭിപ്രായങ്ങൾ പങ്കുവെക്കുക.

Updated

Article Summary: Kumbla Toll Plaza user fee starts Nov 12; high rates in effect.

#KumblaToll #NHAI #TollPlaza #Kasaragod #NationalHighway66 #UserFee