കുമ്പള ടോൾ പിരിവ്: കേന്ദ്ര ഇടപെടലിന് തടസ്സം കോടതി വിധി; സമരവും എടുത്തുചാടിയുള്ള നിയമനടപടിയും തിരിച്ചടിയായെന്ന് അഡ്വ. കെ ശ്രീകാന്ത്

കാസർകോട്: (KasargodVartha) കുമ്പള ആരിക്കടിയിലെ താൽക്കാലിക ടോൾ പിരിവ് നിർത്തിവെക്കാൻ കേന്ദ്ര സർക്കാർ ഇടപെടുന്നതിന് പ്രധാന തടസ്സം നിലവിലെ നിയമങ്ങളും ഹൈക്കോടതി വിധിയുമാണെന്ന് ബിജെപി കോഴിക്കോട് മേഖലാ പ്രസിഡന്റ് അഡ്വ. കെ. ശ്രീകാന്ത്. 

കുമ്പളയിലെ ടോൾ പിരിവ് ഒഴിവാക്കണമെന്നാണ് ബിജെപിയുടെ നിലപാടെന്നും എന്നാൽ എടുത്തുചാടിയുള്ള ചിലരുടെ നീക്കങ്ങൾ കാര്യങ്ങൾ സങ്കീർണ്ണമാക്കിയെന്നും അദ്ദേഹം ആരോപിച്ചു.

നിലവിലുള്ള ചട്ടമനുസരിച്ച് ദേശീയപാതയുടെ നിർമ്മാണം പൂർത്തിയായി നോട്ടിഫിക്കേഷൻ പുറത്തിറക്കിയാൽ 45 ദിവസത്തിനകം ടോൾ പിരിവ് ആരംഭിക്കേണ്ടതുണ്ട്. ഈ ചട്ടം ലംഘിച്ച് സമയബന്ധിതമായി ടോൾ പിരിവ് നടത്താത്തതുമൂലം പലയിടങ്ങളിലും സർക്കാരിന് വലിയ വരുമാന നഷ്ടം ഉണ്ടായതായി 2023-ൽ സമർപ്പിച്ച കംപ്‌ട്രോളർ ആൻഡ് ഓഡിറ്റർ ജനറൽ (സിഎജി) റിപ്പോർട്ടിൽ ചൂണ്ടിക്കാട്ടിയിരുന്നു. 

സർക്കാരിന് വരുമാന നഷ്ടമുണ്ടാക്കിയ ഉദ്യോഗസ്ഥർ ഇതിന് ഉത്തരവാദികളാണെന്നും സിഎജി വിമർശിച്ചിരുന്നു. ഈ സാഹചര്യത്തിലാണ് നടപടി ഭയന്ന് ദേശീയപാത അതോറിറ്റിയിലെ ഉദ്യോഗസ്ഥർ താൽക്കാലിക ടോൾ പിരിവ് നടത്താൻ ധൃതിപിടിച്ച് ഉത്തരവിട്ടതെന്ന് ശ്രീകാന്ത് വിശദീകരിച്ചു.

ഇക്കാര്യം കേന്ദ്ര ഗതാഗത മന്ത്രിയുടെ ശ്രദ്ധയിൽപ്പെടുത്തി ആവശ്യമായ രാഷ്ട്രീയ-ഭരണഘടനാപരമായ ഇടപെടൽ ആവശ്യപ്പെടുന്നതിന് പകരം ചിലർ നേരിട്ട് ഹൈക്കോടതിയെ സമീപിക്കുകയാണ് ചെയ്തത്. ഇത് ടോൾ പിരിവിന് അനുകൂലമായ അല്ലെങ്കിൽ സ്റ്റേ ലഭിക്കാത്ത തരത്തിലുള്ള വിധി ഉണ്ടാക്കാൻ സാഹചര്യമൊരുക്കി. 

ഹൈക്കോടതിയിൽ കേസ് വന്നപ്പോൾ സംസ്ഥാന സർക്കാർ മൗനം പാലിക്കുകയായിരുന്നുവെന്നും അദ്ദേഹം കുറ്റപ്പെടുത്തി. നേരിട്ട് പ്രത്യക്ഷ സമരം നടത്തുകയും കോടതിയിൽ പോവുകയും ചെയ്തതാണ് തിരിച്ചടിയായത്.

ദേശീയപാത അതോറിറ്റിയിലെ ചില ഉദ്യോഗസ്ഥരുടെ നിലപാടുകളെയും ശ്രീകാന്ത് വിമർശിച്ചു. ദേശീയപാത നിർമ്മാണത്തിലെ അപാകതകൾക്കെതിരെ കേന്ദ്ര സർക്കാർ ശക്തമായ നടപടി സ്വീകരിച്ചിരുന്നു. ഇതിൽ അതൃപ്തിയുള്ള ചില ഉദ്യോഗസ്ഥർ കേന്ദ്ര സർക്കാരിനെതിരെ ജനവികാരമുണ്ടാക്കാൻ മനപ്പൂർവ്വം സാഹചര്യം ഒരുക്കിയതായും സംശയിക്കേണ്ടിയിരിക്കുന്നു.

ടോൾ പിരിവ് ബിജെപിക്കെതിരെ ആയുധമാക്കി രാഷ്ട്രീയ മുതലെടുപ്പ് നടത്താനാണ് മുസ്ലീം ലീഗും ചില സിപിഎം നേതാക്കളും ശ്രമിക്കുന്നത്. അക്രമ സമരം നടത്തി ലക്ഷക്കണക്കിന് രൂപയുടെ നഷ്ടമാണ് ഇവർ വരുത്തിവെച്ചത്. കോടിക്കണക്കിന് രൂപ ചിലവാക്കി ദേശീയപാത വികസിപ്പിച്ച് അത്യാധുനിക റോഡ് നിർമ്മിച്ചതിൽ മുസ്ലീം ലീഗിന് വിറളിയുണ്ട്. 

അത് മറച്ചുവെക്കാനും മോദി സർക്കാരിനെതിരെ അപപ്രചരണം നടത്തി രാഷ്ട്രീയ നേട്ടം കൊയ്യാനുമാണ് അവരുടെ ശ്രമം. ജനങ്ങളുടെ പ്രയാസം മാറ്റാൻ ബിജെപി ശക്തമായി ഇടപെടുകയും പരിഹാരം കാണാൻ ശ്രമിക്കുകയും ചെയ്യുമെന്ന് അഡ്വ. കെ. ശ്രീകാന്ത് കൂട്ടിച്ചേർത്തു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു

Article Summary: BJP leader Adv. K. Sreekanth stated that the High Court verdict and existing laws are hindering central intervention in the Kumbla toll issue. He blamed hasty legal actions and protests for complicating the situation and accused opposition parties of politicizing the matter.

#KumblaToll #Kasaragod #KSreekanth #BJP #NHAI #TollPlaza #KeralaNews