കുമ്പള റെയിൽവേ സ്റ്റേഷൻ വികസനം 'ടർഫിൽ' ഒതുങ്ങുമോ? നാട്ടുകാർക്കും, യാത്രക്കാർക്കും ആശങ്ക

കുമ്പള: (KasargodVartha) 37 ഏക്കറോളം സ്ഥലലഭ്യതയുള്ള കുമ്പള റെയിൽവേ സ്റ്റേഷൻ വികസനം ആവശ്യപ്പെടാൻ തുടങ്ങിയിട്ട് പതിറ്റാണ്ടുകളായി. നാട്ടുകാരും യാത്രക്കാരും മുന്നോട്ടുവെക്കുന്ന പ്രധാന ആവശ്യങ്ങളിലൊന്ന് റെയിൽവേ സ്റ്റേഷനിലെ കാടുകയറി കിടക്കുന്ന സ്ഥലം ഉപയോഗപ്പെടുത്തി കുമ്പള റെയിൽവേ സ്റ്റേഷനെ 'ടെർമിനൽ' സ്റ്റേഷനായി ഉയർത്തുക എന്നതാണ്.

ഇത്രയും സ്ഥലലഭ്യതയുള്ള റെയിൽവേ സ്റ്റേഷൻ മംഗലാപുരത്തിനും കണ്ണൂരിനുമിടയിൽ എവിടെയുമില്ല. ഈ കാരണംകൊണ്ടാണ് കുമ്പള ടെർമിനൽ സ്റ്റേഷനുവേണ്ടി നാട്ടുകാർ മുറവിളി കൂട്ടുന്നത്. ഇത് യാഥാർത്ഥ്യമായാൽ, കണ്ണൂരിൽ യാത്ര അവസാനിപ്പിക്കുന്ന ട്രെയിനുകൾക്കും മംഗലാപുരത്ത് യാത്ര അവസാനിപ്പിക്കുന്ന ട്രെയിനുകൾക്കും കുമ്പളയിൽ വിശാലമായ സ്ഥലസൗകര്യത്തോടെ ടെർമിനൽ സ്റ്റേഷനിൽ എത്താനാകുമെന്ന് ചൂണ്ടിക്കാണിക്കപ്പെടുന്നു.

ഇത് സംബന്ധിച്ച് റെയിൽവേ പാസഞ്ചേഴ്സ് അസോസിയേഷനും, സന്നദ്ധ സംഘടനകളും, വ്യാപാരി സംഘടനകളും, നാട്ടുകാരും നിരന്തരമായി മന്ത്രിമാരെയും റെയിൽവേ അധികൃതരെയും ജനപ്രതിനിധികളെയും കണ്ട് നിവേദനം നൽകി വരുന്നുണ്ട്.

കുമ്പളയിലെയും സമീപത്തെ ഏഴോളം വരുന്ന പഞ്ചായത്തുകളിലെയും ജനങ്ങൾ ട്രെയിൻ മാർഗമുള്ള യാത്രയ്ക്കായി ആശ്രയിക്കുന്നത് കുമ്പള റെയിൽവേ സ്റ്റേഷനെയാണ്. മംഗലാപുരത്തെ കോളേജുകളെ ആശ്രയിക്കുന്ന വിദ്യാർത്ഥികളും, ആശുപത്രികളിലേക്ക് പോകുന്ന രോഗികളും, വ്യാപാര ആവശ്യങ്ങൾക്കായി പോകുന്ന കച്ചവടക്കാരും നിത്യേന ആശ്രയിക്കുന്നത് കുമ്പള റെയിൽവേ സ്റ്റേഷനിൽ എത്തുന്ന ട്രെയിനുകളെയാണ്.

ജില്ലയിൽ വരുമാനത്തിൽ മികവ് പുലർത്തിപ്പോരുന്ന കുമ്പള റെയിൽവേ സ്റ്റേഷനിൽ ദീർഘദൂര ട്രെയിനുകൾക്ക് സ്റ്റോപ്പ് അനുവദിക്കാത്തത് നേരത്തെ തന്നെ വലിയ പ്രതിഷേധത്തിന് കാരണമായിരുന്നു. സന്നദ്ധ സംഘടനകളൊക്കെ ഇതുമായി ബന്ധപ്പെട്ട് പ്രക്ഷോഭ പരിപാടികളും സംഘടിപ്പിച്ചിരുന്നു. പ്ലാറ്റ്‌ഫോമിൽ മേൽക്കൂരയുടെ അഭാവവും യാത്രക്കാരെ ദുരിതത്തിലാക്കുന്നുണ്ട്. വെയിലും മഴയും കൊണ്ടാണ് യാത്രക്കാർ ട്രെയിൻ കാത്തുനിൽക്കേണ്ടത്.

നാട്ടുകാരുടെ ഏറെ നാളത്തെ മുറവിളിക്കൊടുവിലാണ് ഇപ്പോൾ പ്ലാറ്റ്‌ഫോമിലേക്ക് കടക്കാൻ ലിഫ്റ്റ് സംവിധാനം ഒരുക്കിക്കൊണ്ടിരിക്കുന്നത്. ശുചിമുറിയും വിശ്രമകേന്ദ്രവും ഇതിനകം തുറന്നു കൊടുത്തിട്ടുണ്ട്.

ഏറ്റവും ഒടുവിൽ ദക്ഷിണ റെയിൽവേ പ്രഖ്യാപിച്ച പദ്ധതികളിലൊന്നാണ് കുമ്പള റെയിൽവേ സ്റ്റേഷൻ സ്ഥലത്ത് 'ടർഫ്' മൈതാനം നിർമ്മിക്കുക എന്നത്. റെയിൽവേ സ്ഥലങ്ങൾ കാടുകയറി കിടക്കുന്ന അവസ്ഥയിൽ റെയിൽവേക്ക് വരുമാനം പ്രതീക്ഷിച്ചുകൊണ്ടാണ് ദക്ഷിണ റെയിൽവേ സ്വകാര്യ ഏജൻസികൾക്ക് ടർഫ് മൈതാനം പണിയാനായി കാസറഗോഡ് ജില്ലയിൽ മാത്രം 5 റെയിൽവേ സ്റ്റേഷനുകളെ പരിഗണിച്ചിട്ടുള്ളത്. 

ഫുട്‌ബോളിന്റെ നാടായ കുമ്പളയിൽ ടർഫ് മൈതാനം വരുന്നതിൽ ആർക്കും എതിർപ്പില്ല. എന്നാൽ, നാട്ടുകാരും യാത്രക്കാരും ആവശ്യപ്പെടുന്ന മറ്റ് വികസന പദ്ധതികൾ കൂടി പരിഗണിക്കണമെന്നാണ് ഇപ്പോൾ ആവശ്യമുയരുന്നത്.

കുമ്പള റെയിൽവേ സ്റ്റേഷൻ്റെ വികസന സാധ്യതകളെക്കുറിച്ചുള്ള ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ. നിങ്ങളുടെ അഭിപ്രായം അറിയിക്കുക. 

Article Summary: Kumbla Railway Station development prioritizes a turf ground, neglecting the long-standing demand for a terminal station despite its large land area.

#KumblaRailway #TerminalStation #RailwayDevelopment #Kasaragod #SouthernRailway #KeralaNews