പുഴയോരത്തെ മാലിന്യ നിക്ഷേപം: നടപടിയുമായി കുമ്പള പഞ്ചായത്തും ആരോഗ്യ വകുപ്പും

മൊഗ്രാൽ: (KasargodVartha) മൊഗ്രാൽ പുഴയോരത്തെ കണ്ടൽക്കാടുകളിലേക്കും ജലാശയത്തിലേക്കും രാത്രിയുടെ മറവിൽ വ്യാപകമായി മാലിന്യങ്ങൾ തള്ളുന്നതായും, മൊഗ്രാൽ തീരത്ത് മാലിന്യങ്ങൾ വലിച്ചെറിഞ്ഞ് കത്തിക്കുന്നതായും കാണിച്ച് കൊപ്പളം ഫ്രണ്ട്സ് ക്ലബ് നൽകിയ പരാതിയെ തുടർന്ന് ജില്ലാ കലക്ടർ അർജുൻ പാണ്ഡ്യൻ പരിശോധന നടത്താനും നടപടി സ്വീകരിക്കാനും കുമ്പള പഞ്ചായത്ത് - ആരോഗ്യ വകുപ്പ് അധികൃതരോട് ആവശ്യപ്പെട്ടു.

പരിശോധനയും കടുത്ത പിഴ മുന്നറിയിപ്പും

ഇതിന്റെ അടിസ്ഥാനത്തിൽ കുമ്പള പഞ്ചായത്ത് - ആരോഗ്യ വകുപ്പ് വിഭാഗം എച്ച്ഐ സൗമ്യയുടെ നേതൃത്വത്തിൽ സംഭവസ്ഥലം സന്ദർശിച്ചു. പുഴയോരത്ത് പ്ലാസ്റ്റിക് കവറിലാക്കി തള്ളിയ മാലിന്യങ്ങൾ ഹരിതകർമസേനാ അംഗങ്ങൾ മുഖേന പരിശോധിച്ചു. 

ക്ലബ് പ്രതിനിധി ജലീൽ കൊപ്പളവും അനുഗമിച്ചു. വിശദമായ റിപ്പോർട്ട് ജില്ലാ കലക്ടർക്ക് സമർപ്പിക്കുമെന്നും മാലിന്യം വലിച്ചെറിയുന്നവർക്കെതിരെ 25,000 രൂപയിൽ കുറയാത്ത പിഴ ഉൾപ്പെടെയുള്ള ശിക്ഷാനടപടികൾ സ്വീകരിക്കുമെന്നും എച്ച്ഐ സൗമ്യ പറഞ്ഞു. പൊതുസ്ഥലങ്ങളിൽ മാലിന്യം നിക്ഷേപിക്കുന്നവർക്കെതിരെ കേരള പഞ്ചായത്ത് രാജ് നിയമപ്രകാരം കർശനമായ നടപടികൾ സ്വീകരിക്കാനാണ് ഭരണകൂടത്തിന്റെ തീരുമാനം.

ആരോഗ്യ ഭീഷണിയും രോഗസാധ്യതയും

ജലാശയത്തിലേക്ക് മാലിന്യം തള്ളുന്നതും വലിച്ചെറിയുന്നതും വലിയ കുറ്റമാണ്. പുഴയുമായി ബന്ധപ്പെട്ട് ജോലി ചെയ്യുന്നവർക്ക് ത്വക്‌രോഗങ്ങൾ ഉൾപ്പെടെയുള്ളവ വരാൻ ഇത് കാരണമാകും. ഡയപ്പറുകൾ അടങ്ങിയ മാലിന്യം ജലാശയത്തിലേക്ക് വലിച്ചെറിയുന്നത് മഞ്ഞപ്പിത്തം പോലുള്ള ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്ന് ആരോഗ്യ വകുപ്പ് അധികൃതർ പറയുന്നു.

സിസിടിവി കാമറകൾ സ്ഥാപിക്കണം

മാലിന്യ നിക്ഷേപത്തിനെതിരെ നടപടിയുടെ ഭാഗമായി പുഴയോരത്ത് സിസിടിവി സ്ഥാപിക്കണമെന്ന് നേരത്തെ കൊപ്പളം ഫ്രണ്ട്സ് ക്ലബ് കുമ്പള പഞ്ചായത്ത് അധികൃതരോട് ആവശ്യപ്പെട്ടിരുന്നു. ബദിയടുക്കയിൽ ഏതാനും ദിവസം മുമ്പാണ് പൊതുസ്ഥലങ്ങളിൽ മാലിന്യം വലിച്ചെറിയുന്നവരെ പിടികൂടാൻ കാമറകൾ സ്ഥാപിച്ചത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ രാഷ്ട്രീയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Kumbla officials inspect Mogral riverbank waste dumping after order.

#Mogral #Kasarkode #WasteManagement #Kumbla #KeralaHealth #Environment #AparnaNews